ഡിസംബർ 9 ന് പ്രദർശനത്തിന് എത്താൻ ഒരുങ്ങുന്ന ഒരു റൊമാന്റിക് കോമഡി ഡ്രാമ തമിഴ് ചിത്രമാണ് വരലാരു മുക്കിയം. നടൻ ജീവ കേന്ദ്ര കഥാപാത്രത്തെ അവതരിപ്പിക്കുന്ന ഈ ചിത്രത്തിന്റെ ഒഫീഷ്യൽ ട്രൈലർ ഇപ്പോൾ പ്രേക്ഷക ശ്രദ്ധ നേടുകയാണ്. ഇതിനോടകം പുറത്തിറങ്ങിയ ചിത്രത്തിന്റെ ഫസ്റ്റ് ലുക്ക് പോസ്റ്റും ഗാനങ്ങളും ഏറെ ശ്രദ്ധ നേടിയിരുന്നു. ഇപ്പോൾ പുറത്തിങ്ങിയ ട്രൈലർ വീഡിയോയും പ്രേക്ഷകർ ഏറ്റെടുത്തിരിക്കുകയാണ്. സരിഗമ തമിഴ് യൂടൂബ് ചാനലിലൂടെ പുറത്തിറങ്ങിയ ഈ ട്രൈലർ വീഡിയോ പത്ത് ലക്ഷത്തിലധികം കാഴ്ചക്കാരെയാണ് ഇതിനോടകം നേടിയത്. രണ്ടര മിനുട്ടോളം ദൈർഘ്യമുള്ള ഈ ട്രൈലർ വീഡിയോ നർമ്മ രംഗങ്ങൾ കൊണ്ട് നിറഞ്ഞിരിക്കുകയാണ്.
ചിത്രത്തിൽ ഒരു റൊമാന്റിക് ഹീറോ ആയാണ് നടൻ ജീവ എത്തുന്നത്. താരത്തിന്റെ റൊമാന്റിക് രംഗങ്ങളും ആക്ഷൻ രംഗങ്ങളും ഏറെ ശ്രദ്ധിക്കപ്പെടുന്നുണ്ട്. ജീവയെ കൂടാതെ കാശ്മീര പർദേശി , പ്രഗ്യ നഗ്ര, ഗണേഷ്, കെ.എസ് രവികുമാർ , മൊട്ട രാജേന്ദ്രൻ , ശരണ്യ, സിദ്ദിഖ്, വിജി രതീഷ് , ടി.എസ്.കെ, ഇ. രാംദോസ്, സ്വാമിനാഥൻ, ലോലു സഭാ മനോഹർ, കാളി രാജ്കുമാർ , ആധിരൈ സൗന്ദർരാജൻ എന്നിവരും പ്രധാന വേഷങ്ങളിൽ ഈ ചിത്രത്തിൽ എത്തുന്നുണ്ട്.
നവാഗത സംവിധായകൻ സന്തോഷ് രാജനാണ് ഈ ചിത്രം ഒരുക്കുന്നത്. സൂപ്പർ ഗുഡ് ഫിലിംസിന്റെ ബാനറിൽ ഒരുങ്ങുന്ന ഈ ചിത്രം നിർമ്മിക്കുന്നത് ആർ ബി ചൗധരി ആണ്. ശക്തി ശരവണൻ ക്യാമറ ചലിപ്പിച്ച ഈ ചിത്രത്തിന്റെ എഡിറ്റിംഗ് കൈകാര്യം ചെയ്തിരിക്കുന്നത് ശ്രീകാന്ത് എൻ ബി ആണ്. ശക്തി ശരവണൻ ആണ് ചിത്രത്തിലെ ആക്ഷൻ രംഗങ്ങൾ ഒരുക്കിയിട്ടുള്ളത്. ഷാൻ റഹ്മാനാണ് ചിത്രത്തിന്റെ സംഗീത സംവിധായകൻ . പശ്ചാത്തല സംഗീതം ഒരുക്കിയിട്ടുള്ളതും അദ്ദേഹം തന്നെയാണ്.
ഈ വർഷം പുറത്തിറങ്ങുന്ന ജീവയുടെ മൂന്നാമത്തെ ചിത്രമാണ് വരലാരു മുക്കിയം. ഇതിന് മുൻപ് റിലീസ് ചെയ്തത് കോഫി വിത്ത് കാതൽ എന്ന ചിത്രമായിരുന്നു. നിതം ഒരു വാനം എന്ന ചിത്രത്തിൽ അതിഥി വേഷത്തിലും ജീവ എത്തിയിരുന്നു. താരത്തിന്റേതായി ചിത്രീകരണം നടന്നു കൊണ്ടിരിക്കുന്ന മറ്റൊരു പുത്തൻ ചിത്രമാണ് ഗോൽമാൽ .