തെലുങ്ക് സൂപ്പർ താരം ബാലയ്യ എന്നറിയപ്പെടുന്ന നന്ദമുരി ബാലകൃഷ്ണ കേന്ദ്ര കഥാപാത്രത്തെ അവതരിപ്പിക്കുന്ന ഏറ്റവും പുതിയ ചിത്രമാണ് വീരസിംഹ റെഡ്ഢി . ഈ വരുന്ന ജനുവരിയിൽ സംക്രാന്തി റിലീസായാണ് ഈ ചിത്രം എത്തുന്നത്. ഗോപിചന്ദ് മല്ലിനേനി ആണ് ഈ ചിത്രത്തിൻറെ സംവിധായകൻ. ഇപ്പോഴിതാ വീരസിംഹ റെഡ്ഢിയിലെ ഒരു സ്റ്റൈലിഷ് ഗാനം സോഷ്യൽ മീഡിയ ശ്രദ്ധ പിടിച്ചു പറ്റുകയാണ്. ബാലയ്യയും നടി ശ്രുതി ഹാസനുമാണ് ഈ ഗാനരംഗത്തിൽ അഭിനയിച്ചിരിക്കുന്നത്. സരസ്വതിപുത്ര രാമജോഗയ്യ ശാസ്ത്രിയാണ് ഈ ഗാനത്തിന് വരികൾ തയ്യാറാക്കിയത്.
എസ് എസ് തമന്റെ സംഗീത സംവിധാനത്തിൽ ഒരുങ്ങിയ ഈ ഗാനം ആലപിച്ചിരിക്കുന്നത് റാം മിറിയാല, സ്നിഗ്ധ ശർമ്മ എന്നിവർ ചേർന്നാണ്. ഈ ഗാനത്തിന്റെ ലിറിക് വീഡിയോ ഇപ്പോൾ പുറത്തുവന്നിട്ടുള്ളത്. ജയ് ബാലയ്യ എന്ന ഈ ചിത്രത്തിലെ മറ്റൊരു ഗാനം നേരത്തെ തന്നെ പുറത്തിറങ്ങിയിരുന്നു. ബാലയ്യ ആരാധകർക്കായി ഒരുക്കിയ ഈ ഗാനത്തിന് മികച്ച പ്രേക്ഷക സ്വീകാര്യതയാണ് ലഭിച്ചത്.
ഈ ചിത്രത്തിൽ നന്ദമുറി എത്തുന്നത് കറുത്ത ഷർട്ട് ധരിച്ച് മുണ്ടുടുത്ത് , നരച്ച താടിയും പിരിച്ചു വെച്ച മീശയും ഒപ്പം ഒരു കൂളിംഗ് ഗ്ലാസും അണിഞ്ഞ് മാസ്സ് ലുക്കിലാണ്. ശ്രുതി ഹാസനെ കൂടാതെ ദുനിയ വിജയ്, വരലക്ഷ്മി ശരത്കുമാർ, ചന്ദ്രിക രവി തുടങ്ങിയവരും ഈ ചിത്രത്തിൽ പ്രധാന വേഷങ്ങളിൽ എത്തുന്നുണ്ട്. ഈ കിടിലൻ മാസ് ആക്ഷൻ ചിത്രം പ്രധാനമായും ബാലയ്യ ആരാധകരെ ലക്ഷ്യം വെച്ച് ഒരുക്കിയതാണ്. സംവിധായകൻ ഗോപിചന്ദ് മല്ലിനേനി തന്നെയാണ് ഈ ചിത്രത്തിൻറെ കഥയും തിരക്കഥയും ഒരുക്കിയിട്ടുള്ളത്. ബാലയ്യയുടെ കരിയറിലെ നൂറ്റിയേഴാം ചിത്രമായ വീരസിംഹ റെഡ്ഢി നിർമ്മിക്കുന്നത് മൈത്രി മൂവി മേക്കേഴ്‌സ് ആണ്. ഈ ചിത്രത്തിൻറെ സംഭാഷണങ്ങൾ തയ്യാറാക്കിയിട്ടുള്ളത് പ്രശസ്ത എഴുത്തുകാരൻ സായ് മാധവ് ബുറ ആണ്. ഋഷി പഞ്ചാബി ഛായാഗ്രഹണം നിർവഹിച്ച ഈ ചിത്രത്തിൻറെ എഡിറ്റ് നവീൻ നൂലി ആണ് . ഈ ചിത്രത്തിൻറെ ഹൈലൈറ്റ് ആയി മാറാൻ ഒരുങ്ങി നിൽക്കുന്ന ഇതിലെ സംഘട്ടന രംഗങ്ങൾ ഒരുക്കിയിട്ടുള്ളത് വെങ്കട്, റാം- ലക്ഷ്മൺ ടീം എന്നിവർ ചേർന്നാണ്.