ഒരുകാലത്ത് എന്റെ ശബ്ദം കാരണം പുറത്തിറങ്ങാൻ പോലും മടിച്ചിരുന്ന സാഹചര്യമുണ്ടായിരുന്നു; കലാരഞ്ജിനി

ഒരുകാലത്ത് തന്റെ ശബ്ദം നഷ്ടപ്പെട്ടതിനെ തുടർന്ന് പുറത്തിറങ്ങാൻ പോലും മടിച്ചിരുന്നുവെന്ന് നടി കലാരഞ്ജിനി. എന്നാൽ ഇന്ന് തന്റെ ഏറ്റവും വലിയ ശക്തിയായി മാറിയിരിക്കുന്നത് അതേ ശബ്ദമാണെന്നും താരം പറഞ്ഞു. വനിതയ്ക്ക് നൽകിയ അഭിമുഖത്തിലാണ് കലാരഞ്ജിനി തന്റെ സിനിമാ ജീവിതത്തിലെ അനുഭവങ്ങൾ പങ്കുവെച്ചത്.

ശബ്ദം നഷ്ടപ്പെട്ട കാലത്ത് സിനിമകളിലും സീരിയലുകളിലും മറ്റുള്ളവരുടെ ശബ്ദത്തിലാണ് തന്റെ കഥാപാത്രങ്ങൾ സംസാരിച്ചിരുന്നതെന്ന് കലാരഞ്ജിനി പറഞ്ഞു. 'നന്ദനം' എന്ന ചിത്രത്തിൽ ഉർവശിയാണ് തന്റെ കഥാപാത്രത്തിന് ശബ്ദം നൽകിയതെന്നും പല സിനിമകളിലും കൽപന ഡബ്ബ് ചെയ്തിട്ടുണ്ടെന്നും താരം വ്യക്തമാക്കി.

എന്നാൽ 'ഹൗ ഓൾഡ് ആർ യൂ' എന്ന സിനിമയിലെത്തിയപ്പോൾ സംവിധായകൻ റോഷൻ ആൻഡ്രൂസ് തന്റെ യഥാർഥ ശബ്ദം തന്നെ ഉപയോഗിക്കണമെന്ന് നിർബന്ധം പിടിച്ചിരുന്നുവെന്ന് കലാരഞ്ജിനി പറയുന്നു.

'ഈ സിനിമയ്ക്ക് ഈ ശബ്ദം തന്നെ മതിയെന്ന് റോഷൻ ആൻഡ്രൂസ് വാശിപിടിച്ചു. മറ്റൊരിടത്തും കാണാത്ത തരത്തിലുള്ള സഹകരണമാണ് ആ സെറ്റിൽ നിന്ന് ലഭിച്ചത്. ഡയലോഗ് പറയുമ്പോൾ ഒരു സൂചി വീണാൽ കേൾക്കാവുന്ന നിശബ്ദതയായിരുന്നു സെറ്റിൽ. എങ്കിലേ എന്റെ ശബ്ദം ഒപ്പം അഭിനയിക്കുന്ന ആളിന് കേൾക്കാൻ കഴിയൂ. കേട്ടാലല്ലേ അവർക്ക് റിയാക്ട് ചെയ്യാൻ കഴിയൂ,' എന്നാണ് കലാരഞ്ജിനി പറഞ്ഞത്.

'ഭരതനാട്യം', 'മോഹിനിയാട്ടം' തുടങ്ങിയ സിനിമകളിലും തന്റെ യഥാർഥ ശബ്ദം തന്നെ ഉപയോഗിക്കണമെന്ന് സംവിധായകർ ആവശ്യപ്പെട്ടിരുന്നുവെന്നും താരം പറഞ്ഞു. ശബ്ദത്തിന്റെ കാര്യത്തിൽ നേരിട്ട പ്രതിസന്ധികൾക്കിടയിലും തന്നെ പിന്തുണച്ച അണിയറപ്രവർത്തകരോടുള്ള നന്ദിയും കലാരഞ്ജിനി പങ്കുവെച്ചു.

ഒരു കാലത്ത് സംസാരിക്കാൻ ബുദ്ധിമുട്ടിയതുകൊണ്ട് ആളുകളെ കാണുന്നതും പുറത്തിറങ്ങുന്നതും ഒഴിവാക്കിയിരുന്ന കാലമുണ്ടായിരുന്നു. എന്നാൽ ഇന്ന് അതേ ശബ്ദം തന്നെ തന്റെ അഭിനയജീവിതത്തിലെ ഏറ്റവും വലിയ പ്ലസ് പോയിന്റായി മാറിയെന്ന് കലാരഞ്ജിനി പറയുന്നു.

'സംസാരിക്കാനുള്ള വിഷമം കൊണ്ട് പുറത്തിറങ്ങാതെ കഴിഞ്ഞ ഒരു കാലമുണ്ടായിരുന്നു എനിക്ക്. ഇപ്പോൾ ഈ ശബ്ദം എന്റെ ഏറ്റവും വലിയ പ്ലസ് ആയി മാറി,' എന്നും താരം കൂട്ടിച്ചേർത്തു.

1978ൽ പുറത്തിറങ്ങിയ 'മദനോത്സവം' എന്ന ചിത്രത്തിലൂടെ ബാലതാരമായാണ് കലാരഞ്ജിനി അഭിനയരംഗത്തേക്ക് എത്തിയത്. പിന്നീട് മലയാളത്തിലും തമിഴിലുമായി നിരവധി സിനിമകളുടെ ഭാഗമായ താരം വ്യത്യസ്ത കഥാപാത്രങ്ങളിലൂടെ പ്രേക്ഷക ശ്രദ്ധ നേടി. അടുത്തിടെ പുറത്തിറങ്ങിയ 'മോഹിനിയാട്ടം', 'ഭരതനാട്യം' തുടങ്ങിയ ചിത്രങ്ങളിലെ പ്രകടനവും ശ്രദ്ധ നേടിയിരുന്നു.