May 3, 2022

മലയാളത്തിന്റെ ലേഡി സൂപ്പർസ്റ്റാർ മഞ്ജുവാര്യർ പ്രധാന വേഷത്തിൽ എത്തുന്ന ഏറ്റവും പുതിയ ചിത്രമാണ് ജാക്ക് ആൻഡ് ജിൽ. സന്തോഷ് ശിവൻ അണിയിച്ചൊരുക്കുന്ന ഈ ചിത്രത്തിന്റെ ഒഫീഷ്യൽ ട്രൈലർ ഇപ്പോൾ റിലീസ് ചെയ്തിരിക്കുകയാണ്. കോമഡിയും ആക്ഷനും സസ്പൻസും നിറഞ്ഞ ഒരു കിടിലൻ ട്രൈലറാണ് ഇപ്പോൾ പ്രേക്ഷകർക്ക് മുന്നിലേക്ക് എത്തിയിരിക്കുന്നത്. നടി മഞ്ജുവാര്യരുടെ ആക്ഷനും കോമഡി രംഗങ്ങളും തന്നെയാണ് ട്രൈലറിന്റെ ഹൈലൈറ്റ്. ട്രൈലറിൽ മഞ്ജുവാര്യരെ കൂടാതെ സൗബിൻ ഷാഹിർ , കാളിദാസ് ജയറാം എന്നിവരുടെയും മനോഹര അഭിനയ മുഹൂർത്തങ്ങൾ കാണാം.

മഞ്ജുവാര്യർ , സൗബിൻ ഷാഹിർ , കാളിദാസ് ജയറാം എന്നിവരെ കൂടാതെ നെടുമുടി വേണു, അജു വർഗ്ഗീസ് , ഇന്ദ്രൻസ്, ബേസിൽ ജോസഫ് , ഷൈല ക്രിഷൻ എന്നിവരും പ്രധാന വേഷങ്ങളിൽ എത്തുന്നു.

സംവിധായകൻ സന്തോഷ് ശിവൻ തന്നെയാണ് ചിത്രത്തിന്റെ രചന നിർവഹിച്ചിട്ടുള്ളത്. ഗോകുലം ഗോപാലൻ, സന്തോഷ് ശിവൻ, എം. പ്രശാന്ത് ദാസ് എന്നിവർ ചേർന്ന് നിർമ്മിച്ചിരിക്കുന്ന ഈ ചിത്രം ശ്രീ ഗോകുലം മൂവീസ്, സിവാസ് ഫിലിംസ് എന്നിവയുടെ ബാനറിൽ ആണ് ഒരുങ്ങുന്നത്. വി.സി പ്രവീൺ, ബൈജു ഗോപാലൻ എന്നിവർ ചിത്രത്തിന്റെ സഹ നിർമ്മാതാക്കൾ ആണ്. ബി.കെ ഹരിനാരായണൻ വരികൾ രചിച്ച ചിത്രത്തിലെ ഗാനങ്ങൾക്ക് സംഗീതം നൽകിയിരിക്കുന്നത് ജേക്സ് ബിജോയ്, റാം സുരേന്ദർ , ഗോപി സുന്ദർ എന്നിവരാണ്. എഡിറ്റിംഗ് നിർവഹിച്ചിരിക്കുന്നത് രഞ്ജിത്ത് ആണ്.

മോഹൻലാലിനെ നായകനാക്കി ജിത്തു ജോസഫ് ഒരുക്കുന്ന ഏറ്റവും പുതിയ ചിത്രമാണ് ട്വൽത്ത് മാൻ . ഈ ചിത്രത്തിന്റെ ഒഫീഷ്യൽ ട്രൈലർ ഇപ്പോൾ റിലീസ് ചെയ്തിരിക്കുകയാണ്. ഒരു ദിവസത്തെ കഥപറയുന്ന ഈ ചിത്രം സസ്‌പെൻസും എന്റർടൈൻമെന്റും നിറഞ്ഞതാണ്. നേരത്തെ തന്നെ ഈ ചിത്രത്തിന്റെ ഒരു പോസ്റ്റർ റിലീസ് ചെയ്യുകയും അത് വളരെയധികം പ്രേക്ഷക ശ്രദ്ധ നേടുകയും ചെയ്തിരുന്നു.

ജിത്തു ജോസഫ് – മോഹൻലാൽ കൂട്ടുകെട്ട് പ്രേക്ഷക പ്രതീക്ഷകൾ വാനോളം ഉയർത്തുകയാണ്. ഇപ്പോൾ പുറത്തിറങ്ങിയ ട്രൈലറും ഈ പ്രതീക്ഷ ഊട്ടി ഉറപ്പിക്കുകയാണ് പതിനൊന്ന് സുഹൃത്തുക്കളും അവരുടെ ഒരു ദിവസത്തെ കൂടിച്ചേരലും ആ ദിവസത്തെ നിഗൂഢത നിറഞ്ഞ സംഭവ വികാസങ്ങളുമാണ് ഈ ട്രൈലറിലൂടെ കാണാനാകുന്നത്. ഡിസ്നി പ്ലസ് ഹോട്ട് സ്റ്റാറിലൂടെയാണ് ഈ ട്രൈലർ പുറത്തു വിട്ടിരിക്കുന്നത്. മണിക്കൂറുകൾ പിന്നിടുമ്പോഴേക്കും നിരവധി കാഴ്ച്ചക്കാരെയാണ് ഈ വീഡിയോ സ്വന്തമാക്കിയത്.

കേന്ദ്ര കഥാപാത്രമായ മോഹൻലാലിനെ കൂടാതെ ഉണ്ണിമുകുന്ദൻ , സൈജു കുറുപ്പ്, അനു സിത്താര, അനുശ്രീ, പ്രിയങ്ക നായർ , അനു മോഹൻ , രാഹുൽ മാധവ് , ലിയോണ ലിഷോയ്, ചന്തു നാഥ് , അദിതി രവി , ശിവദ എന്നിവരും പ്രധാന വേഷങ്ങളിൽ എത്തുന്നു. ജിത്തു ജോസഫ് സംവിധാനം ചെയ്ത ഈ ചിത്രം നിർമ്മിക്കുന്നത് ആന്റണി പെരുമ്പാവൂരാണ്. ആശിർവാദ് സിനിമാസിന്റെ ബാനറിൽ ഒരുങ്ങുന്ന ഈ ചിത്രം മെയ് 20 മുതൽ ഡിസ്നി പ്ലസ് ഹോട്ട് സ്റ്റാറിൽ സ്ട്രീമിങ് ആരംഭിക്കും.

ടൊവിനോയെ നായകനാക്കി ഖാലിദ് റഹ്മാൻ സംവിധാനം ചെയ്യുന്ന ഏറ്റവും പുതിയ ചിത്രമാണ് തല്ലുമാല . ഈ ചിത്രത്തിലെ ഒരു ഗാനം പ്രേക്ഷകർക്കായി ഇപ്പോൾ റിലീസ് ചെയ്തിരിക്കുകയാണ്. കണ്ണിൽ പെട്ടോളെ എന്ന ഈ ഗാനത്തിൽ വ്യത്യസ്തമാർന്ന ലുക്കിൽ ചിത്രത്തിലെ കേന്ദ്ര കഥാപാത്രങ്ങളായ ടൊവിനോയും കല്യാണി പ്രിയദർശനും എത്തുന്നുണ്ട്. ഇരുവരും ഒന്നിച്ചെത്തുന്ന ആദ്യ ചിത്രമാണിത്. ഈ ഗാന രംഗത്തിൽ സ്‌റ്റൈലിഷ് ലുക്കിലെത്തിയ കല്യാണിയേയും ഫ്രീക്കൻ ലുക്കിൽ എത്തിയ ടൊവിനോയേയും നമുക്ക് കാണാനാകും .

വിഷ്ണു വിജയ്, ഇർഫാന ഹമീദ് എന്നിവരാണ് ഈ ഗാനം ആലപിചിരിക്കുന്നത്. സംഗീത സംവിധാനം നിർവഹിച്ചിരിക്കുന്നത് വിഷ്ണു വിജയ് തന്നെയാണ്. റിലീസ് ചെയ്ത് മണിക്കൂറുകൾ പിന്നിടുമ്പോഴേക്കും നിരവധി കാഴ്ചക്കാരെയാണ് ഈ വീഡിയോ സ്വന്തമാക്കിയത്. ഈ ചിത്രത്തിന്റെ പോസ്റ്റർ വളരെയധികം പ്രേക്ഷക ശ്രദ്ധ നേടിയിരുന്നു. മണവാളൻ വസീം എന്നാണ് ചിത്രത്തിൽ ടൊവിനോ അവതരിപ്പിക്കുന്ന കഥാപാത്രത്തിന്റെ പേര്. നടി കല്യാണി പ്രിയദർശനാണ് ചിത്രത്തിൽ ടൊവിനോയുടെ നായികയായി എത്തുന്നത്.

ആഷിഖ് ഉസ്മാൻ പ്രൊഡക്ഷൻസിന്റെ ബാനറിൽ ആഷിഖ് ഉസ്മാൻ ആണ് ഈ ചിത്രം നിർമ്മിക്കുന്നത്. ഈ ചിത്രത്തിന്റെ രചന നിർവഹിച്ചിരിക്കുന്നത് മുഹ്സിൻ പരാരി, അഷ്റഫ് ഹംസ എന്നിവർ ചേർന്നാണ്. ചിത്രത്തിൽ ഷൈൻ ടോം ചാക്കോ , ലുഖ്മാൻ , ജോണി ആന്റണി, ബിനു പപ്പു എന്നിവരും പ്രധാന വേഷങ്ങളിൽ എത്തുന്നുണ്ട്. നിഷാദ് യൂസഫ് ആണ് ചിത്രം എഡിറ്റ് ചെയ്തിരിക്കുന്നത്.

മെഗാ സ്റ്റാർ മമ്മൂട്ടി കേന്ദ്ര കഥാപാതമായി എത്തുന്ന ഏറ്റവും പുതിയ ചിത്രങ്ങളിൽ ഒന്നാണ് പുഴു. നേരിട്ടുള്ള ഒറ്റിറ്റി റിലീസായി എത്തുന്ന അദ്ദേഹത്തിന്റെ ആദ്യത്തെ ഈ ചിത്രം, സോണി ലൈവ് പ്ലാറ്റ്‌ഫോമിലാണ് പ്രദർശനത്തിന് എത്താൻ ഒരുങ്ങുന്നത്. നേരത്തെ തന്നെ പുറത്തുവിട്ട ഈ ചിത്രത്തിന്റെ പോസ്റ്ററുകൾ, അതുപോലെതന്നെ ടീസർ എന്നിവ ഇരു കൈയ്യും നീട്ടിയാണ് പ്രേക്ഷകർ സ്വീകരിച്ചതും സോഷ്യൽ മീഡിയയിൽ തരംഗമായതും . ഇപ്പോഴിതാ പ്രേക്ഷകർക്ക് മുന്നിലേക്ക് ഈ ചിത്രത്തിന്റെ ട്രൈലെർ കൂടി ഇന്ന് റിലീസ് ചെയ്തിരിക്കുകയാണ്. ചിത്രത്തിലെ പ്രധാന കഥാപാത്രങ്ങളെ പ്രേക്ഷകർക്ക് പരിചയപ്പെടുത്തി തരുന്ന ഈ ട്രൈലർ ചിത്രത്തിന്റെ സ്വഭാവം എന്താണെന്ന് മനസ്സിലാക്കി തരുന്നുമുണ്ട്. കൂടാത അതോടൊപ്പം ഈ ചിത്രത്തിന്റെ സ്‌ട്രീമിംഗ്‌ ഡേറ്റ് കൂടി പുറത്തുവിട്ടിട്ടുണ്ട്. ഈ ചിത്രം സ്‌ട്രീമിംഗ്‌ ആരംഭിക്കുന്നത് മെയ് പതിമൂന്നിനാണ്.

ഈ ചിത്രം സംവിധാനം ചെയ്തിരിക്കുന്നത് നവാഗതയായ രഥീനയാണ് . എസ്. ജോര്‍ജ്ജ് നിർമ്മിച്ച ഈ ചിത്രം സിന്‍ സില്‍ സെല്ലുലോയ്ഡിന്റെ ബാനറില്‍ ആണ് ഒരുങ്ങിയിട്ടുള്ളത് . ഈ ചിത്രം രചിച്ചത് ഹര്‍ഷാദ്, ഷറഫു, സുഹാസ് എന്നിവർ ചേർന്നാണ്. വേ ഫെറർ ഫിലിംസ് എന്ന ദുൽക്കർ സൽമാന്റെ പ്രൊഡക്ഷൻ ബാനറും ഈ ചിത്രത്തിന്റെ നിർമ്മാണ പങ്കാളിയാണ്. മമ്മൂട്ടിയ്ക്ക് പുറമേ പാർവതി തിരുവോത്ത്, നെടുമുടി വേണു, ഇന്ദ്രന്‍സ്, മാളവിക മോനോന്‍ തുടങ്ങി നിരവധി താരങ്ങളും ഈ ചിത്രത്തിൽ പ്രധാന വേഷത്തിൽ എത്തുന്നുണ്ട്. തേനി ഈശ്വർ ആണ് ചിത്രത്തിന്റെ ക്യാമറമാൻ . ഈ ചിത്രത്തിന് സംഗീതമൊരുക്കിയത് ജേക്സ് ബിജോയ് ആണ് . ചിത്രം എഡിറ്റ് ചെയ്തിരിക്കുന്നത് ദീപു ജോസഫ് ആണ്.