June 3, 2022

സിജു വിൽസൺ നായകനായി എത്തിയ വരയൻ എന്ന ചിത്രത്തിന്റെ മറ്റൊരു പ്രൊമോ വീഡിയോ കൂടി പുറത്തു വിട്ടിരിക്കുകയാണ്. ഈ ചിത്രത്തിലെ പ്രൊമോ വീഡിയോ , സ്നീക്ക് പീക്ക് വീഡിയോ എന്നിവ സാമൂഹ്യ മാധ്യമങ്ങളിലൂടെ റിലീസ് ചെയ്തിരുന്നു. അവയ്ക്കെല്ലാം വളരെയധികം പ്രേക്ഷക ശ്രദ്ധ ലഭിക്കുകയും ചെയ്തിരുന്നു.

ഈ കഴിഞ്ഞ ദിവസമാണ് ചിത്രത്തിലെ നായിക ലിയോണ ലിഷോയിയും മണിയൻപ്പിള്ള രാജുവും തമ്മിലുള്ള ഒരു കോമ്പിനേഷൻ സീൻ പുറത്തുവിട്ടത്. ആ രംഗത്തിൽ സിജു അവതരിപ്പിക്കുന്ന എബി കപ്പൂച്ചിൻ എന്ന വൈദികനെ കുറിച്ച് ഇരുവരും സംസാരിക്കുന്നതായി കാണിച്ചിരുന്നു. “ഈ നാട്ടുകാരോടും കിളവൻ അച്ചൻമാരോടും കളിച്ച കളിയും കൊണ്ട് നല്ല ചുള്ളൻ ചെക്കന്മാർടെ അടുത്ത് ചെന്നാലേ ഇസ്താക്കി അണ്ണൻ വെവരറിയും ” എന്ന് ലിയോണ പറയുന്ന ഡയലോഗും ഏറെ ശ്രദ്ധിക്കപ്പെട്ടു. എന്നാൽ അതിൽ സിജുവിന്റെ കഥാപാത്രത്തെ കാണിച്ചിരുന്നില്ല.

ഇപ്പോൾ പുറത്തുവിട്ട പ്രൊമോയിൽ മണിയൻപ്പിള്ള രാജുവിന്റെ കഥാപാത്രവും സിജു വിൽസണും തമ്മിലുള്ള കോമ്പിനേഷൻ രംഗമാണ്. എബി കപ്പൂച്ചിൻ എന്ന വൈദികനെ ഇസ്താക്കിയുടെ ഗുണ്ടകൾ ആക്രമിക്കുന്നതും അതിന് അദ്ദേഹം പ്രതികരിക്കുന്നതുമായ കിടിലൻ രംഗമാണ് ഇപ്പോൾ പുറത്തുവിട്ട പ്രൊമോ വീഡിയോയിൽ കാണാൻ സാധിക്കുക . ഇതുവരെ പുറത്തിറങ്ങിയ മിക്ക വീഡിയോയിലും നിറഞ്ഞു നിന്നിരുന്ന ഒരു കഥാപാത്രമാണ് മണിയൻപിള്ള രാജു അവതരിപ്പിക്കുന്ന ഇസ്താക്കി. ചിത്രത്തിൽ നെഗറ്റീവ് റോളിലാണ് അദ്ദേഹം എത്തുന്നത് എന്നാണ് ഈ വീഡിയോയിൽ നിന്നും മനസിലാക്കാൻ സാധിക്കുന്നത് .

ഉലകനായകൻ കമൽ ഹാസൻ പ്രധാന വേഷത്തിൽ എത്തുന്ന വിക്രം എന്ന ചിത്രം തിയറ്ററുകളിൽ പ്രദർശനം ആരംഭിച്ചിരിക്കുകയാണ്. മാനഗരം, കൈദി, മാസ്റ്റർ തുടങ്ങി ബ്ലോക്ക്ബസ്റ്റർ ചിത്രങ്ങൾ ഒരുക്കിയ ലോകേഷ് കനകരാജ് ആണ് വിക്രം സംവിധാനം ചെയ്യുന്നത്. ഒരു വമ്പൻ താരനിര തന്നെയാണ് ഈ ചിത്രത്തിൽ അണിനിരക്കുന്നത്. കമൽഹാസനൊപ്പം മലയാളത്തിലെ യുവതാരം ഫഹദ് ഫാസിൽ, തമിഴിലെ മക്കൾ സെൽവൻ വിജയ് സേതുപതി എന്നിവരും വേഷമിടുന്നുണ്ട്. ഇത് കൂടാതെ നടിപ്പിന് നായകൻ സൂര്യയും ഈ ചിത്രത്തിൽ അതിഥി വേഷത്തിൽ എത്തുന്നുണ്ട്. ഈ വമ്പൻ താരനിരയെ കൂടാതെ അർജുൻ ദാസ് മലയാളി താരങ്ങളായ ചെമ്പൻ വിനോദ്, കാളിദാസ് ജയറാം, നരൻ, തുടങ്ങിയവരും ഈ ചിത്രത്തിൽ പ്രധാന വേഷങ്ങളിൽ എത്തുണ്ട്.

പ്രേക്ഷകർ ഇരു കൈയ്യും നീട്ടിയാണ് ചിത്രത്തിന്റെ ട്രൈലർ സ്വീകരിച്ചത്. ചിത്രത്തിലെ ഒരു ലെറിക്കൽ വീഡിയോ ഗാനം ഇപ്പോഴിതാ സോഷ്യൽ മീഡിയ കീഴടക്കുകയാണ്. സോണി മ്യൂസിക് സൗത്ത് എന്ന യൂട്യൂബ് ചാനലിലൂടെയാണ് ഈ വീഡിയോ പുറത്ത് വിട്ടിരിക്കുന്നത്. പത്തല പത്തല എന്ന വരികളോടെ ആരംഭിക്കുന്ന ഈ ഗാനം രചിച്ചിരിക്കുന്നത് കമൽഹാസനാണ്. ഈ ഗാനത്തിന് ഈണം പകർത്തിരിക്കുന്നത് അനിരുദ്ധ് രവിചന്ദറും . ഇരുവരും ചേർന്നാണ് ഈ ഗാനം ആലപിച്ചിരിക്കുന്നത്. കമൽ ഹാസന്റെ മനോഹരമായ നൃത്ത ചുവടുകളും സ്റ്റിൽസും ഉൾപ്പെടുത്തിയാണ് ഈ വീഡിയോ പുറത്തുവിട്ടിരിക്കുന്നത്.

ഈ ചിത്രം നിർമിക്കുന്നത് രാജ് കമൽ ഇന്റർനാഷനലിന്റെ ബാനറിൽ കമൽ ഹാസൻ തന്നെയാണ് . ചിത്രത്തിന്റെ ക്യാമറമാൻ മലയാളിയായ ഗിരീഷ് ഗംഗാധരൻ ആണ് . ഫിലോമിൻ രാജ് ആണ് എഡിറ്റിംഗ് കൈകാര്യം ചെയ്തിരിക്കുന്നത്.

ശ്യാം മോഹന്റെ സംവിധാനത്തിൽ ഒരുങ്ങുന്ന ഏറ്റവും പുതിയ ചിത്രമാണ് കൊച്ചാൾ . ജൂൺ പത്ത് മുതൽ തിയറ്ററുകളിൽ പ്രദർശനത്തിന് എത്തുന്ന ഈ ചിത്രത്തിന്റെ ഒഫീഷ്യൽ ട്രൈലർ ഇപ്പോൾ പുറത്തുവിട്ടിരിക്കുകയാണ്. ചിത്രത്തിൽ നായക വേഷം ചെയ്യുന്നത് നടൻ കൃഷ്ണശങ്കറാണ് . ഈ ചിത്രത്തിന്റെ രണ്ട് ടീസറുകൾ നേരത്തെ തന്നെ റിലീസ് ചെയ്യുകയും വളരെയധികം പ്രേക്ഷക ശ്രദ്ധ നേടുകയും ചെയ്തിരുന്നു.

സത്യം വീഡിയോസ് എന്ന യൂടൂബ് ചാനലിലൂടെയാണ് ഈ വീഡിയോ പോസ്റ്റ് ചെയ്തിരിക്കുന്നത്. പോലീസ് ആകുന്നതിനായി കഷ്ടപ്പെടുന്ന നായകൻ പോലീസ് ആയതിനു ശേഷം നേരിടുന്ന പ്രശ്നങ്ങളും മറ്റുമാണ് ഈ ട്രൈലറിൽ ഉൾക്കൊള്ളിച്ചിരിക്കുന്നത്. നായകനായ കൃഷ്ണ ശങ്കർ തന്നെയാണ് ചിത്രത്തിന്റെ പേരായ കൊച്ചാൾ എന്ന കഥാപാത്രമായി എത്തുന്നത് . കൃഷ്ണ ശങ്കർ , ഷൈൻ ടോം ചാക്കോ , ഇന്ദ്രൻസ് , മുരളി ഗോപി എന്നിവരുടെ അതി ഗംഭീര അഭിനയ പ്രകടനം തന്നെയാണ് ഈ ട്രൈലറിന്റെ ഹൈലൈറ്റ്.

ഷറഫുദ്ദീൻ, വിജയരാഘവൻ ,രഞ്ജിപണിക്കർ, കൊച്ചുപ്രേമൻ , ചൈതന്യ, സേതു ലക്ഷ്മി, കലാരഞ്ജിനി , ശ്രീലക്ഷ്മി, , ആര്യ സലീം തുടങ്ങിയവരും ഈ ചിത്രത്തിൽ പ്രധാന വേഷങ്ങളിൽ എത്തുന്നുണ്ട്. ദീപ് നാഗ്ഡ നിർമ്മിക്കുന്ന ഈ ചിത്രം സിയാറ ടാക്കീസിന്റെ ബാനറിൽ ആണ് ഒരുങ്ങുന്നത്. ചിത്രത്തിന്റെ തിരക്കഥ , സംഭാഷണം എന്നിവ തയ്യാറാക്കിയത് മിഥുൻപി മദനൻ , പ്രജിത്ത് കെ. പുരുഷൾ എന്നിവർ ചേർന്നാണ്. ജോമോൻ തോമസ്സ് ആണ് ചിത്രത്തിന്റെ ഛായഗ്രഹണം നിർവഹിക്കുന്നത് .