June 6, 2022

മലയാളികളുടെ പ്രിയ താരമായ നടി നസ്രിയ ഫഹദ് തെലുങ്കിൽ അരങ്ങേറ്റം കുറിക്കുന്ന ചിത്രമാണ് അന്റെ സുന്ദരനിക്കി. ജൂണ് പത്തിന് റിലീസ് ചെയ്യുന്ന ഈ ചിത്രത്തിൽ നായകനായി എത്തുന്നത് തെലുങ്കു യുവ താരം നാനിയാണ്. ഒരു റൊമാന്റിക് കോമഡി പാറ്റേണിൽ ഒരുക്കുന്ന ചിത്രത്തിന്റെ ടീസർ, ട്രൈലെർ എന്നിവയെല്ലാം സോഷ്യൽ മീഡിയയിൽ തരംഗമാകുകയും പ്രേക്ഷകർക്കിടയിൽ സൂപ്പർ ഹിറ്റായി മാറുകയും ചെയ്തിരുന്നു. ഇപ്പോഴിതാ ഇതിലെ ഒരു പ്രോമോ ഗാനം കൂടി പുറത്തുവിട്ടിരിക്കുകയാണ്. റിലീസ് ചെയ്ത് നിമിഷ നേരം കൊണ്ടാണ് ഈ ഗാനം സോഷ്യൽ മീഡിയ കീഴടക്കിയത്. തന്തനാനന്ദ എന്ന ഗാനമാണ് ഇപ്പോൾ പ്രേക്ഷക ശ്രദ്ധ നേടുന്നത്. സരസ്വതി പുത്ര രാമ ജോഗയ്യ ശാസ്ത്രിയാണ് ഈ ഗാനം രചിച്ചത് . വിവേക് സാഗർ ഈണം നൽകിയ ഈ ഗാനം ആലപിച്ചിരിക്കുന്നത് ശങ്കർ മഹാദേവൻ, ശ്വേത മോഹൻ എന്നിവർ ചേർന്നാണ് .

ഈ ചിത്രം നിർമ്മിച്ചിരിക്കുന്നത് മൈത്രി മൂവി മേക്കേഴ്സ് ആണ്. ചിത്രത്തിന്റെ സംവിധായകൻ വിവേക് ആത്രേയയാണ് ഇതിന്റെ രചനയും നിർവ്വഹിച്ചിരിക്കുന്നത്. നാനി, നസ്രിയ ഫഹദ് എന്നിവരോടൊപ്പം ഈ ചിത്രത്തിൽ നാദിയ മൊയ്തു, ഹർഷ വർദ്ധന, സുഹാസ്, രാഹുൽ രാമകൃഷ്ണ, നരേഷ്, തൻവി റാം, വിന്നി, ഹാരിക,ശ്രീകാന്ത് അയ്യങ്കാർ, രോഹിണി, എൻ അളഗൻ പെരുമാൾ, അരുണ ഭിക്ഷു, നോമിന എന്നിവരും പ്രധാന വേഷങ്ങളിൽ എത്തുന്നു .

നികേത് ബൊമ്മി റെഡ്ഢിയാണ് ചിത്രത്തിന്റെ ക്യാമറമാൻ. ലീല തോമസ് എന്ന കഥാപാത്രമായാണ് ചിത്രത്തിൽ നസ്രിയ എത്തുന്നത്. നാനി ആകട്ടേ കസ്തുരി പൂർണ്ണ വെങ്കട് ശേഷ സായി പാവന രാമ സുന്ദര പ്രസാദ് എന്ന കഥാപാത്രമായാണ് എത്തുന്നത്. രവി തേജ ഗിരിജാലയാണ് ചിത്രത്തിന്റെ എഡിറ്റർ.

നവഗതനായ അരുൺ ഡി ജോസിന്റെ സംവിധാന മികവിൽ ഒരുങ്ങിയ ചിത്രമാണ് ജോ ആൻഡ് ജോ. മലയാള സിനിമയിൽ ബാലതാരങ്ങളായി എത്തി പ്രേക്ഷക ഹൃദയം കീഴടക്കിയ മാത്യൂ തോമസ്, നസീലൻ കെ. ഗഫൂർ എന്നിവരാണ് ചിത്രത്തിലെ കേന്ദ്ര കഥാപാത്രങ്ങളായി എത്തിയത്. ചിത്രത്തിലെ നായിക വേഷം ചെയ്തിരിക്കുന്നത് നടി നിഖില വിമൽ ആണ് . മെയ് പതിമൂന്നിന് റീലീസ് ചെയ്ത ഈ കോമഡി എന്റർടൈനർ ചിത്രം മികച്ച പ്രേക്ഷക പ്രതികരണമാണ് നേടിയത്. ഈ അടുത്തായി ചിത്രത്തിലെ ഒരു ഗാനങ്ങളും സ്നീക്ക് പീക്ക് വീഡിയോസും പുറത്തിറങ്ങുകയും സോഷ്യൽ മീഡിയയിൽ വൈറലായി മാറുകയും ചെയ്തിട്ടുണ്ട്. ഇപ്പോഴിതാ ചിത്രത്തിലെ മറ്റൊരു സ്നീക്ക് പീക്ക് വീഡിയോ കൂടി റിലീസ് ചെയ്തിരിക്കുകയാണ്.

മാത്യൂ തോമസ്, നസീലൻ കെ. ഗഫൂർ , ഗോവിന്ദ് വസന്ത എന്നിവരുടെ മികച്ച അഭിനയ രംഗങ്ങൾ തന്നെയാണ് ഈ സീനിന്റെ ഹൈലൈറ്റ്. ഗോവിന്ദ് വസന്ത അവതരിപ്പിക്കുന്ന കഥാപാത്രത്തിന്റെ വീട്ടിൽ മൂവരും ഒത്തു ചേരുന്നതും അവരുടെ രസകരമായ സംഭാഷണവുമാണ് ഈ വീഡിയോയിൽ കാണിച്ചിരിക്കുന്നത്. വീഡിയോയ്ക്ക് താഴെ ഒട്ടേറെ ആരാധകരാണ് കമന്റുകൾ നൽകിയിരിക്കുന്നത്.

ഇമാജിൻ സിനിമാസ് ആൻഡ് സിഗ്‌നേച്ചർ സ്റ്റുഡിയോസ് ഒരുക്കുന്ന ഈ ചിത്രം നിർമ്മിക്കുന്നത് ഹാരിസ് ദേശം , ആദർശ് നാരായൺ , പി.ബി അനീഷ്, അനുമോദ് ബോസ് എന്നിവർ ചേർന്നാണ്. ചാമൻ ചാക്കോ ആണ് ചിത്രത്തിന്റെ എഡിറ്റിംഗ് കൈകാര്യം ചെയ്തിരിക്കുന്നത് . തിരക്കഥ , സംഭാഷണം എന്നിവ തയ്യാറാക്കിയിരിക്കുന്നത് രവീഷ് നാഥും സംവിധായകൻ അരുണും ഒന്നിച്ചാണ് .

വേണു ഉഡുഗുലയുടെ സംവിധാനത്തിൽ റാണ ദഗുബതി , സായ് പല്ലവി എന്നിവർ ഒന്നിക്കുന്ന പുത്തൻ തെലുങ്ക് ചിത്രമാണ്” വിരാടപർവ്വം . ജൂൺ പതിനേഴിന് തിയറ്ററുകളിൽ എത്താൻ ഒരുങ്ങുന്ന ഈ ചിത്രത്തിന്റെ ട്രൈലർ ഇപ്പോൾ റിലീസ് ചെയ്തു . തെലുങ്കാന പ്രദേശത്ത് 1990 കളിൽ നടന്ന നക്സലൈറ്റ് മൂവ്മെന്റിനെ പശ്ചാത്തലമാക്കിയാണ് സംവിധായകൻ ഈ ചിത്രം അവതരിപ്പിക്കുന്നത് .

മൂന്ന് മിനിട്ടോളം ദൈർഘ്യമുള്ള ഈ ട്രൈലറർ പ്രേക്ഷകർക്കിടയിൽ ഏറെ ശ്രദ്ധ നേടിയിരിക്കുകയാണ്. സഖാവ് രാവണ്ണ എന്ന കഥാപാത്രത്തെയാണ് ചിത്രത്തിൽ
ദഗുബതി അവതരിപ്പിക്കുന്നത്. ഇപ്പോൾ പുറത്തിറങ്ങിയ ട്രൈലർ രംഗങ്ങളിലും ശ്രദ്ധ നേടുന്നത് റാണ ദഗ്ഗുബതിയും സായ് പല്ലവിയുമാണ്. വെടിവയ്പ്പുകൾക്കും പ്രശ്നങ്ങൾക്കും ഇടയിലും മനോഹരമായ ഒരു പ്രണയം കൂടി ട്രൈലറിൽ കാണാൻ സാധിക്കുന്നുണ്ട്. ചിത്രത്തിൽ പ്രിയാമണി, നിവേദ പെതുരാജ്, നന്ദിതാദാസ് , നവീൻ ചന്ദ്ര എന്നിവരും പ്രധാന വേഷങ്ങളിൽ എത്തുന്നുണ്ട്.

ചിത്രത്തിന്റെ രചന നിർവഹിച്ചിരിക്കുന്നത് സംവിധായകൻ വേണു ഉഡുഗുല തന്നെയാണ്. സുരേഷ് പ്രൊഡക്ഷൻസ് , എസ് എൽ വി സിനിമാസ് എന്നിവയുടെ ബാനറിൽ ഒരുങ്ങുന്ന ഈ ചിത്രം നിർമ്മാണം നിർവഹിക്കുന്നത് സുധാകർ ചെറുകുറി ആണ്. ഡാനിസാലൊ , ദിവാകർമണി എന്നിവരാണ് ചിത്രത്തിന്റെ ഛായഗ്രഹണം നിർവഹിച്ചിരിക്കുന്നത്. ശ്രീകർ പ്രസാദാണ് എഡിറ്റർ . ചിത്രത്തിലെ സ്റ്റണ്ട് രംഗങ്ങൾ പീറ്റർ ഹെയ്ൻ, സ്റ്റെഫാൻ റിഷ്റ്റർ എന്നിവർ ചേർന്നാണ് തയ്യാറാക്കിയത് . ചിത്രത്തിലെ സംഗീതം ഒരുക്കിയിട്ടുള്ളത് സുരേഷ് ബൊബിളി ആണ്.

സിജു വിൽസൺ പ്രധാന വേഷത്തിൽ എത്തിയ വരയൻ എന്ന ചിത്രത്തിന്റെ മറ്റൊരു പ്രൊമോ വീഡിയോ കൂടി റിലീസ് ചെയ്തിരിക്കുകയാണ്. ഇതിന് മുൻപ് റിലീസ് ചെയ്ത ഈ ചിത്രത്തിലെ പ്രൊമോ വീഡിയോ , സ്നീക്ക് പീക്ക് വീഡിയോ എന്നിവയെല്ലാം തന്നെ സാമൂഹ്യ മാധ്യമങ്ങളിൽ വൈറലായി മാറിയിരുന്നു ഇപ്പോഴിതാ പ്രേക്ഷകർക്കായി മറ്റൊരു പ്രൊമോ വീഡിയോ കൂടി എത്തിയിരിക്കുകയാണ്.

ഇതുവരെ പുറത്തിറങ്ങിയ വീഡിയോകൾ എല്ലാം തന്നെ ചിത്രത്തിലെ ഓരോ കഥാപാത്രങ്ങളെയും അവരുടെ സ്വഭാവത്തെയും പ്രേക്ഷകർക്ക് പരിചയപ്പെടുത്തുന്നതായിരുന്നു. എന്നാൽ അതിൽ നിന്നും വ്യത്യസ്തമാണ് ഇപ്പോൾ പുറത്തിറങ്ങിയ വീഡിയോ . ഈ വീഡിയോയിലൂടെ ആ ഗ്രാമത്തിലെ ജനങ്ങളുടെ സ്വഭാവത്തെയാണ് പ്രേക്ഷകർക്ക് പരിചയപെടുത്തുന്നത്. ഗുണ്ടകളുടെ പ്രധാന കേന്ദ്രമായ കലിപ്പക്കരയിലേക്ക് എത്തുന്ന പോലീസുകാരും അവരെ കൈകാര്യം ചെയ്തു വിടുന്ന നാട്ടുകാരേയുമാണ് ഈ രംഗത്തിൽ കാണാൻ സാധിക്കുക.

” ഇവിടെ ഈ നെഞ്ചത്തടിക്കുന്ന പെണ്ണുങ്ങൾ അല്ലാതെ ആണുങ്ങൾ ആരും ഇല്ലേ ” എന്ന പോലീസുകാരന്റെ ചോദ്യവും അതിനു മറുപടിയായി അദ്ദേഹത്തിന്റെ കൂളിംങ് ഗ്ലാസ് എറിഞ്ഞുടച്ച് അവിടേക്ക് ഒരു കൂട്ടം ആണുങ്ങൾ എത്തുന്നതുമാണ് ഈ രംഗത്തിന്റെ ഹൈലൈറ്റ്. ആ ഗ്രാമത്തേയും ഗ്രാമ നിവാസികളേയും ആണ് ഈ രംഗത്തിലൂടെ പരിചയപ്പെടുത്തുന്നത്. ചിത്രത്തിൽ സിജുവിനൊപ്പം ജൂഡ് ആന്റണി, മണിയൻപിള്ള രാജു, ലിയോണ ലിഷോയ്, ജോയ്മാത്യു , ബിന്ദു പണിക്കർ, വിജയരാഘവൻ , അരിസ്റ്റോ സുരേഷ് എന്നിവരും പ്രധാന വേഷങ്ങളിൽ എത്തുന്നുണ്ട്.

ഷൈൻ നീഗം നായകനായി എത്തുന്ന ഏറ്റവും പുതിയ ചിത്രമാണ് ഉല്ലാസം. ജീവൻ ജോജോ സംവിധാനം ചെയ്യുന്ന ഈ ചിത്രത്തിന്റെ ഒഫീഷ്യൽ ട്രൈലർ ഇപ്പോൾ റിലീസ് ചെയ്തിരിക്കുന്നു. മലയാളത്തിന്റെ മെഗാസ്റ്റാർ മമ്മൂട്ടിയാണ് ഈ ചിത്രത്തിന്റെ ട്രൈലർ പുറത്തുവിട്ടത്. സത്യം വീഡിയോസ് എന്ന യൂട്യൂബ് ചാനലിലൂടെയാണ് ഈ വീഡിയോ പുറത്തുവിട്ടത്.

വളരെ രസകരമായ ഒരു ട്രൈലറാണ് ഇപ്പോൾ പ്രേക്ഷകർക്ക് മുന്നിൽ എത്തിയിരിക്കുന്നത്. ഷൈൻ നീഗം ഇതുവരെ അവതരിപ്പിച്ചതിൽ നിന്നും വ്യത്യസ്തമായ ഒരു കഥാപാത്രത്തെയാണ് ഈ ചിത്രത്തിൽ താരം അവതരിപ്പിക്കുന്നതെന്ന് ടൈലറിൽ നിന്നും വ്യക്തമാണ്. നിരവധി പരസ്യ ചിത്രങ്ങളിലൂടെ ശ്രദ്ധ നേടിയ പവിത്ര ലക്ഷ്മിയാണ് ഈ ചിത്രത്തിൽ നായികയായി എത്തുന്നത്. രണ്ട് അപരിചിതർക്കിടയിൽ ഉടലെടുക്കുന്ന പ്രണയവും തുടർന്നുള്ള രസകരമായ നിമിഷങ്ങളുമാണ് ഈ ചിത്രത്തിൽ ഒരുക്കുന്നതെന്ന് ടൈലറിൽ നിന്നും മനസിലാക്കാം.

കൈതമറ്റം ബ്രേദേഴ്സിന്റെ ബാനറിൽ ഒരുങ്ങുന്ന ഈ ചിത്രം നിർമ്മിക്കുന്നത് ജോ കൈതമറ്റം, ക്രിസ്റ്റി കൈതമറ്റം എന്നിവർ ചേർന്നാണ്. ചിത്രത്തിന്റെ രചന നിർവഹിച്ചിരിക്കുന്നത് പ്രവീൺ ബാലകൃഷ്ണൻ ആണ്. ഹരി നാരായണൻ , ഫെജോ , ജോ പോൾ എന്നിവർ വരികൾ രചിച്ച ഈ ചിത്രത്തിലെ ഗാനങ്ങൾ ഒരുക്കിയിരിക്കുന്നത് ഷാൻ റഹ്മാൻ ആണ്. മാഫിയ ശശിയാണ് ചിത്രത്തിലെ ആക്ഷൻ രംഗങ്ങൾ ഒരുക്കിയിരിക്കുന്നത്. ജോൺ കുട്ടിയാണ് ചിത്രത്തിന്റെ എഡിറ്റർ.