ഓണ റിലീസായി പ്രേക്ഷകർക്ക് മുന്നിലേക്ക് എത്താൻ ഒരുങ്ങുന്ന നിരവധി ചിത്രങ്ങളിൽ പ്രേക്ഷക പ്രതീക്ഷകളെ വാനോളം ഉയർത്തിക്കൊണ്ട് എത്തുന്ന ചിത്രമാണ് ആർ ഡി എക്സ്. ഇതിനോടകം പുറത്തിറങ്ങിയ ആർ ഡി എക്സിന്റെ ടീസർ വീഡിയോ എല്ലാം വളരെയധികം ശ്രദ്ധ നേടിയിരുന്നു. ഇപ്പോഴിതാ ഈ ആക്ഷൻ പാക്കഡ് ചിത്രത്തിലെ ഒരു കിടിലൻ ഡാൻസ് വീഡിയോ പ്രേക്ഷകർക്ക് മുൻപാകെ എത്തിയിരിക്കുകയാണ്. സരിഗമ മലയാളം യൂട്യൂബ് ചാനലിലൂടെ മണിക്കൂറുകൾ മുൻപ് പുറത്തിറങ്ങിയ ഈ വീഡിയോ ഗാനം ലക്ഷക്കണക്കിന് കാഴ്ചക്കാരെയാണ് സ്വന്തമാക്കിയത്. ഹാലബല്ലൂ എന്ന വീഡിയോ ഗാനമാണ് ഇപ്പോൾ പുറത്തു വിട്ടിരിക്കുന്നത്.
ചിത്രത്തിലെ കേന്ദ്ര കഥാപാത്രങ്ങളായ ഷൈൻ നീഗം , ആന്റണി വർഗീസ് , നീരജ് മാധവ് എന്നിവരാണ് ഈ വീഡിയോ ഗാനരംഗത്തിൽ അഭിനയിച്ചിരിക്കുന്നത്. ഗാനത്തിന്റെ ഹൈലൈറ്റ് ആയി മാറുന്നത് ഈ മൂന്നു താരങ്ങളുടെയും കിടിലൻ ഡാൻസ് പെർഫോമൻസ് തന്നെയാണ്. പഴയകാല രംഗങ്ങളെ ഓർമിപ്പിച്ച് എത്തുന്ന ഈ വീഡിയോ ഗാനം സോഷ്യൽ മീഡിയയിൽ വൈറലായി മാറിക്കഴിഞ്ഞു. സാം സി എസ് അണിയിച്ച് ഒരുക്കിയ ഈ ഗാനത്തിന് വരികൾ തയ്യാറാക്കിയത് മഞ്ജു മഞ്ജിത്ത് ആണ് . ഈ മനോഹര ഗാനം പാടിയിരിക്കുന്നത് രഞ്ജിത്ത് കെ ഗോവിന്ദ് , ബെന്നി ദയാൽ , നരേഷ് അയ്യർ, സാം സി എസ് എന്നിവർ ചേർന്നാണ്.
നഹാസ് ഹിദായത്ത് സംവിധാനം ചെയ്യുന്ന ഈ ചിത്രത്തിൽ ഷൈൻ നീഗം , ആന്റണി വർഗീസ് , നീരജ് മാധവ് എന്നിവർ യഥാക്രമം റോബർട്ട് , ഡോണി, സേവിയർ എന്നീ കഥാപാത്രങ്ങളെ അവതരിപ്പിക്കുന്നു. ഈ പേരുകളിൽ നിന്നാണ് ചിത്രത്തിൻറെ ടൈറ്റിൽ ആയ ആർ ഡി എക്സ് എടുത്തിരിക്കുന്നത്. ഈ ചിത്രം അണിയിച്ച് ഒരുക്കുന്നത് മിന്നൽ മുരളി ഒരുക്കിയ വീക്ക് ആൻഡ് ബ്ലോക്ക് ബസ്റ്റർ ആണ്. ചിത്രത്തിൽ ഐമ റോസ്മി സെബാസ്റ്റ്യൻ, മഹിമ നമ്പ്യാർ, മാല പാർവതി, ലാൽ , ബാബു ആൻറണി എന്നിവരും ശ്രദ്ധേയ വേഷങ്ങൾ കൈകാര്യം ചെയ്യുന്നുണ്ട്.