കൈത്തണ്ടയിൽ പുതിയ ടാറ്റൂ ചെയ്ത ചിത്രങ്ങൾ സോഷ്യൽ മീഡിയയിൽ പങ്കുവെച്ചതിന് പിന്നാലെ അതിന് പിന്നിലെ കാരണം വെളിപ്പെടുത്തി നടി വീണ നായർ.
തനിക്ക് ചില മരുന്നുകളോട് ഗുരുതരമായ അലർജിയുണ്ടെന്നും, അടിയന്തര സാഹചര്യങ്ങളിൽ അത് മറ്റുള്ളവർക്ക് വേഗത്തിൽ മനസിലാക്കാൻ വേണ്ടിയാണ് കൈത്തണ്ടയിൽ പ്രത്യേക ടാറ്റൂ ചെയ്തതെന്നും വീണ പറഞ്ഞു. പതിവായി ഒറ്റയ്ക്ക് യാത്ര ചെയ്യാറുള്ളതിനാൽ ഇത്തരം ഒരു മുൻകരുതൽ ആവശ്യമാണെന്ന് തോന്നിയതായും താരം വ്യക്തമാക്കി.
യാത്രകൾക്കിടയിലോ മറ്റ് അടിയന്തര സാഹചര്യങ്ങളിലോ തനിക്ക് സംസാരിക്കാൻ കഴിയാത്ത അവസ്ഥ വന്നാൽ ഈ ടാറ്റൂ ഉപകാരപ്പെടുമെന്നാണ് വീണയുടെ വിലയിരുത്തൽ. ആരോഗ്യവുമായി ബന്ധപ്പെട്ട പ്രധാന വിവരങ്ങൾ ശരീരത്തിൽ തന്നെ രേഖപ്പെടുത്തുന്ന രീതിയാണ് ഇതിനായി താരം തെരഞ്ഞെടുത്തത്.
ടാറ്റൂ ചെയ്ത ചിത്രങ്ങളും അതിന്റെ പിന്നിലെ കാരണവും സോഷ്യൽ മീഡിയയിൽ ശ്രദ്ധ നേടിയിട്ടുണ്ട്. പലരും വീണയുടെ മുൻകരുതലിനെ അഭിനന്ദിച്ചുകൊണ്ട് രംഗത്തെത്തിയിട്ടുണ്ട്.
മലയാള ടെലിവിഷൻ രംഗത്തിലൂടെയും സിനിമകളിലൂടെയും ശ്രദ്ധ നേടിയ വീണ നായർ, വ്യക്തിജീവിതത്തിലെ വിശേഷങ്ങളും അനുഭവങ്ങളും പലപ്പോഴും ആരാധകരുമായി പങ്കുവെക്കാറുണ്ട്. ഇപ്പോൾ ആരോഗ്യസുരക്ഷയെ മുൻനിർത്തിയുള്ള ഈ തീരുമാനവും ചർച്ചയാവുകയാണ്.
