നാനിയെ കേന്ദ്ര കഥാപാത്രമായി അണിയിച്ചൊരുക്കി പ്രദർശനത്തിന് ഒരുങ്ങുന്ന പുത്തൻ തെലുങ്ക് ചിത്രമാണ് ദസറ . 2023 മാർച്ച് 30 ന് റിലീസ് ചെയ്യാൻ ഒരുങ്ങുന്ന ഈ ചിത്രത്തിൻറെ ഒരു ട്രെയിലർ വീഡിയോ ഇപ്പോൾ സോഷ്യൽ മീഡിയയിൽ പങ്കുവെച്ചിരിക്കുകയാണ്. എസ്എൽവി സിനിമാസ് യൂട്യൂബ് ചാനലിലൂടെയാണ് ഈ വീഡിയോ പ്രേക്ഷകരിലേക്ക് എത്തിയിരിക്കുന്നത്. പുറത്തിറങ്ങി മണിക്കൂറുകൾ പിന്നിടും മുൻപേ ലക്ഷക്കണക്കിന് കാഴ്ചക്കാരെയാണ് വീഡിയോ സ്വന്തമാക്കിയത്.
രക്തരൂക്ഷിതമായ ഒരു ട്രെയിലർ വീഡിയോ എന്ന് തന്നെ ഇതിനെ വിശേഷിപ്പിക്കാം. നാനിയുടെ ആക്ഷൻ രംഗങ്ങളോട് കൂടിയ കിടിലൻ പ്രകടനം തന്നെയാണ് ഈ ട്രെയിലർ വീഡിയോയിൽ കാണാൻ സാധിക്കുന്നത്. മലയാളി താരം ഷൈൻ ടോം ചാക്കോയും ഈ ട്രെയിലർ വീഡിയോയിൽ കാണാം. സിങ്കരേണി കൽക്കരി ഖനികളുടെ പശ്ചാത്തലത്തിലാണ് ദസറ ഒരുക്കിയിട്ടുള്ളത്. ഒരു ആക്ഷൻ ഡ്രാമ ചിത്രമായാണ് ദസറ ഒരുങ്ങുന്നത്. രണ്ടേകാൽ മിനിറ്റ് ദൈർഘ്യമുള്ള ഈ ട്രെയിലർ വീഡിയോ ചിത്രത്തെ കുറിച്ചുള്ള പ്രേക്ഷക പ്രതീക്ഷകൾ ഉയർത്തുകയാണ്. നിരവധി ആരാധകരാണ് നാനീയുടെ പ്രകടനത്തെ പ്രശംസിച്ച വീഡിയോയ്ക്ക് താഴെ കമന്റുകൾ നൽകിയിട്ടുള്ളത്.
തെലുങ്കിനു പുറമേ ഹിന്ദി, തമിഴ്, കന്നഡ, മലയാളം ഭാഷകളിലും ഈ ചിത്രത്തിൻറെ പതിപ്പ് റിലീസ് ചെയ്യും. ഈ ചിത്രം ഒരുക്കിയിട്ടുള്ളത് സംവിധായകൻ ശ്രീകാന്ത് ഒഡേല ആണ് . കീർത്തി സുരേഷ് ആണ് നാനിയുടെ നായികയായി ഈ ചിത്രത്തിൽ വേഷമിടുന്നത് . ഈ ചിത്രത്തിൻറെ രചന നിർവഹിച്ചിട്ടുള്ളത് ശ്രീകാന്ത് ഒഡേല തന്നെയാണ്. ചിത്രത്തിൻറെ നിർമ്മാണം നിർവഹിച്ചിരിക്കുന്നത് സുധാകർ ചെറുകുറിയാണ്. സന്തോഷ് നാരായണനാണ് ദസറയ്ക്ക് വേണ്ടി സംഗീതം തയ്യാറാക്കിയത്. സത്യൻ സൂര്യൻ ക്യാമറ ചലിപ്പിച്ച ഈ ചിത്രത്തിൻറെ എഡിറ്റർ നവീൻ നൂലി ആണ് . സമുദ്രക്കനി, ദീക്ഷിത് ഷെട്ടി, സായി കുമാർ , ഷംന കാസിം, സജോൾ ചൗധരി എന്നിവരാണ് ചിത്രത്തിലെ മറ്റ് ശ്രദ്ധേയ വേഷങ്ങൾ കൈകാര്യം ചെയ്യുന്നത്.