സുരേഷ് ഗോപിയും ബിജു മേനോനും 11 വർഷങ്ങൾക്ക് ശേഷം വീണ്ടും ഒന്നിച്ച് അഭിനയിക്കുന്ന ഗരുഡൻ എന്ന പുത്തൻ ചിത്രത്തിൻറെ ടീസർ വീഡിയോ റിലീസ് ചെയ്തു. സുരേഷ് ഗോപിയുടെ ജന്മദിനത്തോടനുബന്ധിച്ച് ആയിരുന്നു ഈ ടീസർ വീഡിയോ അണിയറ പ്രവർത്തകർ സോഷ്യൽ മീഡിയ പ്ലാറ്റ്ഫോമുകളിലൂടെ പങ്കുവെച്ചത്. ആരാധകരുടെയും സിനിമ പ്രേമികളുടെയും വമ്പൻ സ്വീകാര്യത്തിന് നേടി കൊണ്ട് ഈ വീഡിയോ ഇപ്പോൾ സാമൂഹ്യ മാധ്യമങ്ങളിൽ വൈറലായി കൊണ്ടിരിക്കുകയാണ്. സുരേഷ് ഗോപിയെ ഉൾക്കൊള്ളിച്ചു കൊണ്ടാണ് ടീസറിന്റെ മുഴുവൻ രംഗങ്ങളും പുറത്തിറക്കിയിട്ടുള്ളത്. ഒരു ക്രൈം ത്രില്ലർ പാറ്റേണിലാണ് ഈ ചിത്രം അണിയിച്ച് ഒരുക്കിയിരിക്കുന്നത്.
ചിത്രത്തിൻറെ സംവിധാനം നിർവഹിക്കുന്നത് നവാഗതനായ അരുൺ വർമ്മ ആണ് . മാജിക് ഫ്രെയിൻസിന്റെ ബാനറിൽ പുറത്തിറങ്ങാൻ ഒരുങ്ങുന്ന ഈ ചിത്രത്തിന്റെ നിർമ്മാതാവ് ലിസ്റ്റൻ സ്റ്റീഫൻ ആണ് . അഞ്ചാം പാതിര എന്ന വമ്പൻ ഹിറ്റ് ചിത്രത്തിന്റെ രചന നിർവഹിച്ച മിഥുൻ മാനുവൽ തോമസ് ആണ് ഗരുഡന്റെ തിരക്കഥ തയ്യാറാക്കിയിട്ടുള്ളത്. സുരേഷ് ഗോപി , ബിജു മേനോൻ എന്നിവരെ കൂടാതെ സിദ്ദിഖ്, ദിലീഷ് പോത്തൻ , ജഗദീഷ് , രഞ്ജിനി , മാളവിക, മേജർ രവി , നിഷാന്ത് സാഗർ തുടങ്ങി നിരവധി താരങ്ങളും ഈ ചിത്രത്തിൻറെ ഭാഗമാകുന്നുണ്ട്.
നീണ്ട ഒരു ഇടവേളയ്ക്ക് ശേഷം സുരേഷ് ഗോപിയും ബിജുമേനോനും വീണ്ടും സ്ക്രീനിൽ ഒന്നിക്കുന്നതിന്റെ ആകാംക്ഷയിലാണ് ആരാധകർ. ഇതിനുമുമ്പ് ഇവർ ഒന്നിച്ച് അഭിനയിച്ചിട്ടുള്ളത് പത്രം, കളിയാട്ടം, എഫ്ഐആർ, ക്രിസ്ത്യൻ ബ്രദേഴ്സ്, ട്വന്റി20 തുടങ്ങി ഹിറ്റ് സിനിമകളിലായിരുന്നു. ചിത്രത്തിൻറെ കഥ തയ്യാറാക്കിയിരിക്കുന്നത് ജിനീഷ് ആണ് . ചിത്രത്തിനുവേണ്ടി ക്യാമറ ചലിപ്പിച്ചിട്ടുള്ളത് അജയ് ഡേവിഡ് കാച്ചാപള്ളിയും എഡിറ്റിംഗ് കൈകാര്യം ചെയ്തത് ശ്രീജിത്ത് സാരംഗുമാണ്. ജേക്സ് ബിജോയ് ആണ് ഗരുഡയിലെ ഗാനങ്ങളും പശ്ചാത്തല സംഗീതവും ഒരുക്കുന്നത്.