റാം-നിവിൻ പോളി കൂട്ടുകെട്ടിൽ ഒരുങ്ങുന്ന ഏറ്റവും പ്രതീക്ഷിക്കുന്ന ചിത്രം ‘ഏഴു കടൽ ഏഴു മലൈ’യുടെ ഗ്ലിംപ്സ് വീഡിയോ പുറത്തുവിട്ടു. നിവിൻ പോളി, സൂരി, അഞ്ജലി എന്നിവർ പ്രധാന വേഷങ്ങളിൽ അഭിനയിക്കുന്ന ചിത്രത്തിന്റെ ടീസർ നിവിൻ പോളിയുടെ ശബ്ദത്തിൽ ആരംഭിച്ച് ചോദ്യങ്ങൾ ഉയർത്തുന്ന ഒരു അവസാനത്തോടെ അവസാനിക്കുന്നു.
“ഒരാൾ മറ്റൊരാളെ വിട്ടു പോകാൻ അനേകം കാരണങ്ങൾ കാണും, എന്നാൽ ഒരാൾക്കൊപ്പം മറ്റേയാൾ പോകാൻ സ്നേഹം മാത്രമാണ് കാരണം” എന്ന് ടീസറിന്റെ തുടക്കത്തിൽ നിവിൻ പോളി പറയുന്നു. തുടർന്ന്, 4000 വർഷം പഴക്കമുള്ള ഒരു കഥ പറയുന്നതിനിടെ, ട്രെയിനിൽ നിൽക്കുന്ന അഞ്ജലിയുടെ അടുത്തേക്ക് നിവിൻ നീങ്ങുന്ന ദൃശ്യവും കാണാം. സൂരിയുടെ കഥാപാത്രത്തോട് നിങ്ങൾക്ക് വയസ്സ് 32 അല്ലേ തനിക്ക് വയസ്സ് 8822 ആണെന്നാണ് കഥാപാത്രം പറയുന്നത്.
ടൈം ട്രാവലാണ് കഥയെന്നും പുനർജന്മം പോലുള്ള ആശയങ്ങൾ സിനിമ കൈകാര്യം ചെയ്യുന്നതായും പ്രേക്ഷകർ സമൂഹമാധ്യമങ്ങളിൽ അഭിപ്രായപ്പെടുന്നുണ്ട്. റാം-നിവിൻ പോളി കൂട്ടുകെട്ടിലെ ചിത്രം എന്ന പ്രതീക്ഷയോടെയാണ് മലയാളി പ്രേക്ഷകർ ഈ ചിത്രത്തെ കാത്തിരിക്കുന്നത്.
മമ്മൂട്ടി ചിത്രം ‘പേരൻപി’ന് ശേഷം റാം നിവിൻ പോളിക്കൊപ്പം സിനിമ ചെയ്യുന്ന വാർത്ത പ്രതീക്ഷയോടെയാണ് മലയാളി പ്രേക്ഷകർ കേട്ടത്. അതേസമയം വലിയ കാലയളവിൽ സിനിമയുടെ അപ്ഡേറ്റുകൾ ഒന്നും ലഭിച്ചിരുന്നില്ല. അടുത്തിടെയാണ് സിനിമയുടെ ആദ്യ പ്രീമിയർ റോട്ടർഡാം അന്താരാഷ്ട്ര ചലച്ചിത്രമേളയിലാകുമെന്ന് നിവിൻ പോളി വ്യക്തമാക്കിയത്. ബിഗ് സ്ക്രീൻ മത്സര വിഭാഗത്തിലാണ് ചിത്രം പ്രദർശിപ്പിക്കുന്നത്.
‘കട്രതു തമിഴ്’, ‘തങ്ക മീൻകൾ’, ‘താരമണി’ എന്നിവയാണ് റാം സംവിധാനം ചെയ്ത മറ്റു സിനിമകൾ. ‘നേരം’, ‘റിച്ചി’ എന്നീ ചിത്രങ്ങൾക്ക് ശേഷം നിവിൻ പോളി വീണ്ടും തമിഴിൽ തിരിച്ചെത്തുന്നതും പ്രത്യേകതയാണ്. ‘മാനാടിന്’ ശേഷം സുരേഷ് കാമാച്ചിയുടെ വി ഹൗസ് പ്രൊഡക്ഷൻസാണ് ഈ ബിഗ് ബജറ്റ് ചിത്രം നിർമ്മിക്കുന്നത്. യുവൻ ശങ്കർ രാജയാണ് സംഗീത സംവിധാനം. ഏകാംബരം ആണ് ഛായാഗ്രഹണം നിർവ്വഹിച്ചിരിക്കുന്നത്. പ്രൊഡക്ഷന്‍ ഡിസൈനര്‍- ഉമേഷ് ജെ കുമാര്‍, എഡിറ്റര്‍- മതി വിഎസ്, ആക്ഷന്‍- സ്റ്റണ്ട് സില്‍വ, കൊറിയോഗ്രാഫര്‍- സാന്‍ഡി, കോസ്റ്റ്യൂം ഡിസൈനര്‍- ചന്ദ്രകാന്ത് സോനവാനെ