Movie Updates

തമിഴിലെ ശ്രദ്ധേയനായ യുവ സംവിധായകൻ കാർത്തിക സുബ്ബരാജ് മലയാള സിനിമ രംഗത്ത് അരങ്ങേറ്റം കുറിക്കുകയാണ്. ‘അറ്റൻഷൻ പ്ലീസ്’ എന്ന പേരിൽ ആദ്യം ശ്രദ്ധ നേടിയ ഈ ചിത്രത്തിൽ അദ്ദേഹം സംവിധായകനല്ല എത്തുന്നത് പകരം സിനിമാ പ്രൊഡക്ഷൻ മേഖലയിലേക്കാണ് കാർത്തിക് ചുവടുവെച്ചിരിക്കുന്നത്. കാർത്തിക് നിർമ്മാണം ഏറ്റെടുത്ത് പുതുമുഖ സംവിധായകർക്ക് അവസരം നൽകുക എന്ന ലക്ഷ്യത്തോടെ ഒരുക്കുന്ന അറ്റൻഷൻ പ്ലീസ് എന്ന ഈ ചിത്രത്തിന്റെ രചനയും സംവിധാനവും നിർവഹിചിരിക്കുന്നത് നവാഗത സംവിധായകനായ ജിതിൻ ഐസക് തോമസ് ആണ്. ഈ ത്രില്ലർ- ഡ്രാമ ചിത്രത്തിൽ മുഖ്യ വേഷങ്ങളിലെത്തുന്നത് വിഷ്ണു ഗോവിന്ദ്, ആതിര കല്ലിങ്കൽ എന്നിവരാണ്. ഇപ്പോഴിതാ ഈ ചിത്രത്തിന്റെ ട്രെയിലർ റിലീസ് ചെയ്തിരിക്കുകയാണ്.

ഈ ട്രെയിലർ അവതരിപ്പിച്ചിരിക്കുന്നത് പൊതുയിടങ്ങളിൽ മനുഷ്യന്റെ സ്വകാര്യതയിലേക്ക് കൈ കടത്തുന്ന സദാചാരവാദികളായ മലയാളികൾക്ക് ഒരു കൊട്ട് കൊടുക്കുന്ന രീതിയിലാണ് . ഒരു മുറിയിൽ കുറച്ചുപേർക്കിടയിൽ അരങ്ങേറുന്ന ചില സംഭവങ്ങളും കഥ പറച്ചിലുമായി ത്രില്ലിംഗ് പാറ്റേണിൽ ആണ് ഈ സിനിമ ഒരുക്കിയിട്ടുള്ളത്. ഈ ചിത്രം മുൻപ് ഐഎഫ്എഫ്കെയിൽ പ്രദർശിപ്പിച്ച്, മികച്ച പ്രതികരണം കരസ്ഥമാക്കിയിരുന്നു. ഈ ചിത്രത്തിന് സംഗീതം ഒരുക്കുന്നത് അരുൺ വിജയ് ആണ് .

രോഹിത് വാരിയത്ത് ആണ് ചിത്രത്തിന്റെ എഡിറ്റർ. ഛായാഗ്രാഹകൻ ഹിമൽ മോഹനനാണ്. കാർത്തിക് സുബ്ബരാജ് ഈ ചിത്രത്തിന്റെ നിർമ്മാണത്തിൽ ഭാഗമാകുന്നത് സ്റ്റോൺ ബെഞ്ച് ഫിലിംസ് ആൻഡ് ഒറിജിനൽസ് എന്ന പ്രൊഡക്ഷൻ ഹൗസ് വഴിയാണ് . ഇദ്ദേഹത്തെ കൂടാതെ കാർത്തികേയൻ സന്താനം, നിത്യൻ മാർട്ടിൻ എന്നിവരും ചിത്രത്തിന്റെ നിർമ്മാതാക്കളാണ്. ഈ മാസം 26ന് ആണ് ഈ ചിത്രം പ്രദർശനത്തിന് എത്തുന്നത്.

തമിഴകത്തിന്റെ ചിയാൻ വിക്രം കേന്ദ്ര കഥാപാത്രമായി എത്തുന്ന ഏറ്റവും പുതിയ ചിത്രമാണ് കോബ്ര . ഓഗസ്റ്റ് മുപ്പത്തിയൊന്നിന് പ്രദർശനത്തിന് എത്താൻ ഒരുങ്ങുന്ന ഈ ചിത്രത്തിനായുള്ള കാത്തിരിപ്പിലാണ് ആരാധകർ. നേരത്തെ തന്നെ റിലീസ് ചെയ്ത ഈ ചിത്രത്തിന്റെ ടീസറും ചിത്രത്തിലെ ഗാനങ്ങളും വളരെയധികം പ്രേക്ഷക ശ്രദ്ധ നേടിയിരുന്നു. അവയ്ക്കെല്ലാം ശേഷം ഇപ്പോഴിതാ ചിത്രത്തിന്റെ ഒരു അതുഗ്രൻ ട്രൈലെർ പുറത്തു വന്നിരിക്കുകയാണ്. നടൻ വിക്രം പ്രേക്ഷകരെ ഞെട്ടിക്കാൻ ഒരുങ്ങുകയാണെന്നാണ് ഈ ട്രൈലർ നൽകുന്ന സൂചന. ഇമൈക നൊടികൾ, ഡിമാൻഡി കോളനി എന്നീ സൂപ്പർഹിറ്റ് സിനിമകൾ പ്രേക്ഷകർക്ക് സമ്മാനിച്ച ആർ. അജയ് ജ്ഞാനമുത്തുവാണ് ഈ ചിത്രം സംവിധാനം ചെയ്യുന്നത്.

ചിത്രത്തിൽ നിരവധി വ്യത്യസ്ത ഗെറ്റപ്പുകളിൽ വിക്രമെത്തുന്നു എന്ന സൂചനയും ലഭിക്കുന്നുണ്ട്. ഇതിനോടകം സൂപ്പർ ഹിറ്റുകളായി മാറിയ ഈ ചിത്രത്തിലെ ഗാനങ്ങൾ സംഗീത മാന്ത്രികൻ എ ആർ റഹ്മാൻ ആണ് ഒരുക്കിയിട്ടുള്ളത്. ട്രൈലറിൽ നിന്നും ഈ ചിത്രത്തിന്റെ ഹൈലൈറ്റ് അതിശയിപ്പിക്കുന്ന ദൃശ്യങ്ങളും ആക്ഷനുമാണ് എന്ന് മനസ്സിലാക്കാം.

ഈ ചിത്രത്തിൽ നായികയായി എത്തുന്നത് കെ ജി എഫ് സീരിസിലൂടെ ജനപ്രീതി നേടിയ നടി ശ്രീനിധി ഷെട്ടിയാണ് . എസ്.എസ്. ലളിത് കുമാർ നിർമ്മിക്കുന്ന ഈ ചിത്രം സെവൻ സ്ക്രീൻ സ്റ്റുഡിയോയുടെ ബാനറിൽ ആണ് ഒരുങ്ങുന്നത്. ഈ ചിത്രത്തിൽ വിക്രമിനെ കൂടാതെ മുൻ ഇന്ത്യൻ ക്രിക്കറ്റ് താരം ഇർഫാൻ പത്താനും മലയാളി താരങ്ങളായ റോഷൻ മാത്യു, സർജാനോ ഖാലിദ്, മിയ, കനിഹ, പദ്മപ്രിയ, മാമുക്കോയ, ബാബു ആൻറ്റണി എന്നിവരും വേഷമിടുന്നുണ്ട്. കേരളത്തിൽ ഇഫാർ മീഡിയായ്ക്ക് വേണ്ടി ഈ ചിത്രം എത്തിക്കുന്നത് റാഫി മാതിര ആണ്. ഇവിടുത്തെ സ്‌ക്രീനുകളിൽ കോബ്ര അവതരിപ്പിക്കുന്നത് ഡ്രീം ബിഗ് ഫിലിംസും, ഇ ഫോർ എൻറ്റർടൈൻമെൻറ്റും ചേർന്നാണ്. ഹരീഷ് കണ്ണൻ ഛായാഗ്രഹണം നിർവഹിച്ച കോബ്രയുടെ എഡിറ്റർ ഭുവൻ ശ്രീനിവാസനാണ്.

മനോജ് കുമാർ ഒരുക്കിയ പുതിയ മ്യൂസിക് വീഡിയോ ആണ് ഏയ് പുള്ളേ. തിങ്ക് മ്യൂസിക് ഇന്ത്യ യൂടൂബ് ചാനലിലൂടെ പുറത്തിറങ്ങിയ ഈ ഗാനം ഇപ്പോൾ പ്രേക്ഷകർ ഏറ്റെടുത്തിരിക്കുകയാണ് . ശാന്തനു ഭാഗ്യരാജ് , അനുകൃതി വാസ് എന്നിവരാണ് ഈ വീഡിയോ ഗാനത്തിൽ അഭിനയിച്ചിരിക്കുന്നത്. നാട്ടിൻപുറത്തെ ചില മനോഹരമായ പ്രണയ രംഗങ്ങളാണ് ഈ വീഡിയോയിൽ ഉൾപ്പെടുത്തിയിരിക്കുന്നത്. ലവരതൻ വരികൾ രചിച്ച ഈ ഗാനത്തിന് ഈണം പകർന്നിരിക്കുന്നത് കിരൺ സൂറത്ത് ആണ് .

അന്തോണി ദാസൻ ആണ് ഈ ഗാനം മനോഹരമായി ആലപിച്ചിരിക്കുന്നത്. തിങ്ക് മ്യൂസിക് ഇന്ത്യയുടെ അനുബന്ധ സ്ഥാപനമായ തിങ്ക് ഇന്ത്യയാണ് ഈ ഗാനത്തിന്റെ മ്യൂസിക് ലേബൽ ഏറ്റെടുത്തിരിക്കുന്നത്. സ്റ്റുഡിയോ യൂണോ റെക്കോർഡ്സ് നിർമ്മിച്ച ഈ മ്യൂസിക് വീഡിയോയുടെ ഛായാഗ്രാഹകൻ ബാലാജി സുബ്രഹ്മണ്യം ആണ് . വീണ ജയപ്രകാശ് ആണ് എഡിറ്റർ. സുരേൻ ആണ് ഗാനത്തിന്റെ കൊറിയോഗ്രഫർ .

തമിഴിലെ ശ്രദ്ധേയ താരമാണ് ശാന്ത്നു ഭാഗ്യരാജ് . ഏയ്ഞ്ചൽ ജോൺ എന്ന മലയാള ചിത്രത്തിൽ അദ്ദേഹം വേഷമിട്ടിട്ടുണ്ട്. താരത്തിന്റെതായി പുറത്തിറങ്ങാനുള്ള പുത്തൻ ചിത്രങ്ങളാണ് അമളി തുമളി, രാവണ കൂട്ടം എന്നിവ. ഫെമിന മിസ്സ് ഇന്ത്യ 2018 കീരീടം കൂടിയ താരമാണ് അനുകൃതി വാസ്. ഇരുവരുടേയും മനോഹരമായ പ്രകടനം തന്നെയാണ് ഈ മ്യൂസിക് ആൽബത്തിൽ കാണാൻ സാധിക്കുന്നത്.

ഈ അടുത്ത് റിലീസ് ചെയ്ത സൂപ്പർ ഹിറ്റ് ചിത്രമാണ് സീത രാമം . പ്രേക്ഷക ഹൃദയം കീഴടക്കിയ ഈ പീരീഡ് മ്യൂസിക്കൽ റൊമാന്റിക് ഡ്രാമ ചിത്രം ഓഗസ്റ്റ് അഞ്ചിന് ആഗോള റിലീസായി എത്തിയത്. നിലവിൽ 70 കോടിയിലധികം ബോക്സ് ഓഫീസ് കളക്ഷൻ നേടി ഈ ചിത്രം . ഈ ചിത്രത്തിന്റെ സക്സസ് ഫുൾ പ്രെമോയ്ക്ക് ശേഷം ഇപ്പോഴിതാ ചിത്രത്തിലെ ഒരു വീഡിയോ ഗാനം റിലീസ് ചെയ്തിരിക്കുകയാണ്. തരലി തരലി എന്ന ഗാനത്തിന്റെ വീഡിയോ ആണിത് . നടൻ ദുൽഖർ സൽമാനേയും നായിക മൃണാൾ താക്കൂറിനേയുമാണ് ഈ ഗാന രംഗത്തിൽ കാണാൻ സാധിക്കുന്നത്.

അതിമനോഹരമായി നൃത്തം ചെയ്യുന്ന നായികയേയും , പ്രണയ ഭാവങ്ങളോടെ അത് നോക്കി നിൽക്കുന്ന നായകനേയും ആണ് ഈ ഗാനം നമുക്ക് കാണിച്ചു തരുന്നത്. വീഡിയോയിൽ ഗാനത്തിന്റെ മേക്കിങ് രംഗങ്ങളും ഉൾപ്പെടുത്തിയിട്ടുണ്ട്. കൃഷ്ണ കാന്ത് വരികൾ രചിച്ച ഈ ഗാനത്തിന് ഈണം പകർന്നിരിക്കുന്നത് വിശാൽ ചന്ദ്രശേഖർ ആണ് . സുനിത ഉപദ്രഷ്ട ആണ് ഈ ഗാനം ആലപിച്ചിരിക്കുന്നത്.

പട്ടാളക്കാരനായ ലെഫ്റ്റനെന്റ് റാമിന്റെ കഥ പറയുന്ന ഈ ചിത്രം, അദ്ദേഹത്തിന്റെ അതിമനോഹരമായ പ്രണയവും തീവ്രമായ ദേശ സ്നേഹവും തുറന്നു കാണിക്കുന്നു. ഹനു രാഘവപുടിയുടെ ഈ ചിത്രം 1960 കളിലെ കഥയാണ് പറയുന്നത് . ഈ ചിത്രത്തിൽ രശ്മിക മന്ദാന, തരുൺ ഭാസ്ക്കർ, ഗൗതം വാസുദേവ് മേനോൻ, പ്രകാശ് രാജ്, ഭൂമിക ചൗള, സുമന്ത്, മുരളി ശർമ്മ, സച്ചിൻ ഖേദകർ, വെണ്ണല കിഷോർ, സുമന്ത്, രുക്മിണി വിജയ് കുമാർ എന്നിവരും വേഷമിടുന്നു. പി എസ് വിനോദ് ആണ് ചിത്രത്തിന്റെ കാമറമാൻ . കോട്ടഗിരി വെങ്കിടേശ്വര റാവു ആണ് ചിത്രത്തിന്റെ എഡിറ്റർ.

തെന്നിന്ത്യയിൽ വലിയ ട്രെൻഡായി മാറിയ തമിഴ് ചിത്രമായിരുന്നു നവാഗത സംവിധായകരായ പുഷ്കർ- ഗായത്രി ടീം ഒരുക്കിയ വിക്രം വേദ. പ്രശസ്ത തമിഴ് താരങ്ങളായ മാധവൻ, മക്കൾ സെൽവൻ വിജയ് സേതുപതി എന്നിവർ ശ്രദ്ധേയ വേഷങ്ങൾ കൈകാര്യം ചെയ്ത ഈ ചിത്രം അഞ്ചു വർഷം മുൻപാണ് പുറത്തിറങ്ങിയത്. ഇപ്പോഴിതാ ഈ ചിത്രത്തിന്റെ ഹിന്ദി റീമേക്ക് പ്രദർശനത്തിന് എത്തുകയാണ്. തമിഴ് ചിത്രം ഒരുക്കിയ സംവിധായകരായ പുഷ്കർ- ഗായത്രി ടീം തന്നെയാണ് ഈ ചിത്രത്തിന്റെ ഹിന്ദി റീമേക്കും ഒരുക്കുന്നത്. ഹിന്ദി പതിപ്പിൽ ടൈറ്റിൽ വേഷങ്ങൾ ചെയ്യുന്നത് ബോളിവുഡ് സൂപ്പർ താരങ്ങളായ ഹൃതിക് റോഷൻ, സെയ്ഫ് അലി ഖാൻ എന്നിവരാണ്.

സോഷ്യൽ മീഡിയയിൽ ഈ ഹിന്ദി റീമേക്കിന്റെ കാരക്ടർ പോസ്റ്ററുകൾ വളരെയധികം ശ്രദ്ധ നേടിയിരുന്നു . ഈ ചിത്രത്തിന്റെ ആദ്യ ടീസർ ഇപ്പോഴിതാ പുറത്തു വന്നിരിക്കുകയാണ്. ഈ ടീസർ കാണുമ്പോൾ പരാജയങ്ങൾ നേരിട്ടു കൊണ്ടിരിക്കുന്ന ബോളിവുഡിന് പുതുജീവൻ നല്കാൻ ഈ ചിത്രത്തിന് കഴിയുമെന്ന സൂചനയാണ് ലഭിക്കുന്നത്.

സെയ്ഫ് അലി ഖാൻ വിക്രം എന്ന പോലീസ് ഓഫീസറുടെ റോളിലും ഹൃത്വിക് റോഷൻ വേദ എന്ന ഗ്യാങ്സ്റ്റർ ആയുമാണ് ചിത്രത്തിൽ അഭിനയിച്ചിരിക്കുന്നത്. രാധിക ആപ്തെയാണ് ഈ ചിത്രത്തിൽ നായിക വേഷം ചെയ്യുന്നത്. ഈ ചിത്രം നിർമ്മിക്കുന്നത് ഭൂഷൺ കുമാറിന്റെ ടി സീരിസ്, ഫ്രൈഡേ ഫിലിം വർക്സ്, റിലയൻസ് എന്റെർറ്റൈന്മെന്റ്സ്, എസ് ശശികാന്തിന്റെ വൈ നോട് സ്റ്റുഡിയോസ് എന്നിവ സംയുക്തമായി ചേർന്നാണ്. രോഹിത് സറഫ്, ശരിബ് ഹാഷ്മി, യോഗിത ബിഹാനി, സത്യദേവ് മിശ്ര എന്നിവരും ഈ ചിത്രത്തിൽ മറ്റു നിർണ്ണായക വേഷങ്ങൾക്ക് ജീവൻ പകരുന്നു. ഈ ചിത്രം ഒരുക്കിയിരിക്കുന്നത് ഒരു പക്കാ ആക്ഷൻ ത്രില്ലറായാണ് . സെപ്റ്റംബർ മുപ്പതിനാണ് ഈ ചിത്രം പ്രദർശനത്തിന് എത്തുന്നത്.

സുധീർ വർമ്മ സംവിധാനം ചെയ്ത് നിവേദ തോമസ്, റെജീന കസാൻഡ്ര എന്നിവർ കേന്ദ്ര കഥാപാത്രങ്ങളായി എത്തുന്ന പുത്തൻ തെലുങ്ക് ചിത്രമാണ് സാകിനി ഡാകിനി . ഈ ചിത്രത്തിന്റെ ഒഫീഷ്യൽ ടീസർ ഇപ്പോൾ റിലീസ് ചെയ്തിരിക്കുകയാണ്. ഈ ആക്ഷൻ കോമഡി ചിത്രം 2017 ൽ പുറത്തിറങ്ങിയ മിഡ്നൈറ്റ് റണ്ണേഴ്സ് എന്ന കൊറിയൻ ചിത്രത്തിന്റെ റിമേക്കാണ്. ചിത്രത്തിൽ ശാലിനി എന്ന കഥാപാത്രമായി നിവേദയും ദാമിനി എന്ന കഥാപാത്രമായി റെജീനയും വേഷമിടുന്നു. രസകരമായ നർമ്മ രംഗങ്ങളും കിടിലൻ ആക്ഷൻ രംഗങ്ങളും നിറഞ്ഞ ഒരു ടീസറാണ് ഇപ്പോൾ പുറത്തു വിട്ടിട്ടുള്ളത് . നായികമാരുടെ അത്യുഗ്രൻ സംഘട്ടന രംഗങ്ങൾ തന്നെയാണ് ഈ ടീസറിന്റെ ഹൈലൈറ്റ്.

ഓ ബേബി എന്ന ഹിറ്റ് ചിത്രം നിർമ്മിച്ച സുരേഷ് പ്രൊഡക്ഷൻസ് , ഗുരു ഫിലിംസ്, ക്രോസ് പിക്ച്ചേഴ്സ് എന്നിവർ ഒന്നിച്ചാണ് ഈ ചിത്രവും നിർമ്മിക്കുന്നത് . ഡി. സുരേഷ് ബാബു, സുനിത തറ്റി, ഹ്യൂൺവോ തോമസ് കിം എന്നിവരാണ് ചിത്രത്തിന്റെ നിർമ്മാതാക്കൾ . റിച്ചാർഡ് പ്രസാദ് ഛായാഗ്രഹണം നിർവഹിച്ച ഈ ചിത്രത്തിന്റെ എഡിറ്റർ വിപ്ലവ് നൈഷാദം ആണ് . ഈ ചിത്രം തിയറ്ററുകളിൽ പ്രദർശനത്തിന് എത്തുന്നത് സെപ്തംബർ 16 ന് ആണ്. സുരേഷ് പ്രൊഡക്ഷൻസ് യൂടൂബ് ചാനലിലൂടെ റിലീസ് ചെയ്ത ഈ ടീസർ നിവേദയുടേയും റെജീനയുടേയും ആരാധകർ ഏറ്റെടുത്തിരിക്കുകയാണ്.

മലയാളത്തിലെ ശ്രദ്ധേയ സംവിധായകൻ വിനയന്റെ ഏറ്റവും പുതിയ ചിത്രമായ പത്തൊൻപതാം നൂറ്റാണ്ട് പ്രദർശനത്തിന് എത്തുകയാണ്. വൻ ബഡ്ജറ്റിൽ ഒരുങ്ങുന്ന ഈ ബ്രഹ്മാണ്ഡ ചരിത്ര ചിത്രം സെപ്റ്റംബർ എട്ടിന് ഓണം റിലീസായാണ് എത്തുന്നത് . യുവ താരം സിജു വിൽസൺ ആണ് ഈ ചിത്രത്തിൽ നായകനായി എത്തുന്നത്. നേരത്തെ തന്നെ പുറത്തുവന്ന ഈ ചിത്രത്തിന്റെ ട്രൈലെർ, ടീസർ, മേക്കിങ് വീഡിയോ എന്നിവ സോഷ്യൽ മീഡിയയിൽ സൂപ്പർ ഹിറ്റായി മാറിയിരുന്നു. ഇപ്പോഴിതാ ഈ ചിത്രത്തിലെ ആദ്യ വീഡിയോ സോങ് പുറത്തു വിട്ടിരിക്കുകയാണ്.

പൂതം വരുന്നെടീ എന്ന വരികളോടെ തുടങ്ങുന്ന ഗാനമാണ് ഇപ്പോൾ പ്രേക്ഷക ശ്രദ്ധ നേടുന്നത്. എം ജയചന്ദ്രനാണ് ഈ ഗാനത്തിന് സംഗീതം പകർന്നിരിക്കുന്നത്. സയനോര ഫിലിപ്പ് ആലപിച്ച ഈ ഗാനത്തിന റഫീഖ് അഹമ്മദ് ആണ് വരികൾ രചിച്ചത്. ഈ ഗാനത്തിന്റെ ഹൈലൈറ്റ് ആരാധന മൂർത്തിക്കു മുന്നിൽ നൃത്തം വെക്കുന്ന നായികയാണ് . മനോഹരമായ ദൃശ്യങ്ങളും മേക്കിങ്ങും ഈ ഗാനത്തിന്റെ നിലവാരം കൂട്ടുന്നുണ്ട്.

ശ്രീ ഗോകുലം മൂവീസിന്റെ ബാനറിൽ ഒരുങ്ങുന്ന ഈ ചിത്രം മലയാളത്തിന് പുറമേ തമിഴ്, തെലുങ്ക്, കന്നഡ, ഹിന്ദി ഭാഷകളിലും റിലീസ് ചെയ്യുന്നുണ്ട്. ഗോകുലം ഗോപാലനാണ് ഈ ചിത്രത്തിന്റെ നിർമ്മാതാവ്. ചിത്രത്തിൽ സുരേഷ് കൃഷ്ണ, ചെമ്പൻ വിനോദ്, അനൂപ് മേനോൻ, സുദേവ് നായർ, ഇന്ദ്രൻസ്, സെന്തിൽ കൃഷ്ണ, സുധീർ കരമന, ടിനി ടോം, വിഷ്ണു വിനയ്, ദീപ്തി സതി, പൂനം ബജ്വ, ഗോകുലം ഗോപാലൻ എന്നിവരും അഭിനയിക്കുന്നുണ്ട്. ഷാജി കുമാർ ആണ് ഈ ചിത്രത്തിന് വേണ്ടി ക്യാമറ ചലിപ്പിച്ചിരിക്കുന്നത്.

സന്തോഷ് നാരായണനാണ് ചിത്രത്തിന്റെ പശ്‌ചാത്തല സംഗീതമൊരുക്കിയത് . ആറാട്ടുപുഴ വേലായുധ പണിക്കരെന്ന നവോത്ഥാന നായകനെ കേന്ദ്ര കഥാപാത്രമാക്കി ഒരുക്കുന്ന ഈ ചിത്രത്തിൽ സിജുവാണ് ഈ കഥാപാത്രത്തെ അവതരിപ്പിക്കുന്നത്. വമ്പൻ മേക്കോവർ നടത്തിയ സിജു എത്തുന്ന ഈ ചിത്രത്തിന്റെ ഹൈലൈറ്റ് കിടിലൻ ആക്ഷൻ രംഗങ്ങൾ തന്നെയാണ്. ഈ ചിത്രത്തിന്റെ എഡിറ്റർ വിവേക് ഹർഷനാണ് .

തിയറ്ററുകളിൽ ഗംഭീര വിജയമാണ് തല്ലുമാല എന്ന ചിത്രം കാഴ്ച വച്ചു കൊണ്ടിരിക്കുന്നത്. ഖാലിദ് റഹ്മാന്റെ സംവിധാന മികവിൽ ഒരുങ്ങിയ ഈ ചിത്രം ഓഗസ്റ്റ് 12 ന് ആണ് ആഗോള തലത്തിൽ റിലീസ് ചെയ്തത്. ചിത്രത്തിൽ നായകനായി എത്തിയിരിക്കുന്നത് മലയാളത്തിന്റെ യുവതാരം ടൊവിനോ തോമസ് ആണ് . ഒരുകോമഡി ആക്ഷൻ ചിത്രമായ തല്ലുമാല രണ്ടാം ദിനം തന്നെ 15 കോടിയിലേറെ കളക്ഷനാണ് നേടിയത്. ഇപ്പോഴിതാ തല്ലുമാലയിലെ ഒരു വീഡിയോ ഗാനം പുറത്തുവിട്ടിരിക്കുകയാണ്. ചക്കര ചുണ്ടിൽ എന്ന ഗാനത്തിന്റെ വീഡിയോ ആണ് ഇപ്പോൾ സോഷ്യൽ മീഡിയ കീഴടക്കുന്നത്. വിഷ്ണു വിജയ് ആണ് ഈ ഗാനം ഒരുക്കിയിരിക്കുന്നത്. തിയറ്ററുകളിൽ ഓളം സൃഷ്ടിച്ച ഈ ഗാനം ഇപ്പോൾ പ്രേക്ഷകർ ഏറ്റെടുത്തിരിക്കുകയാണ്.

ചിത്രത്തിലെ മറ്റ് പ്രധാന കഥാപാത്രങ്ങൾ ആണ് കല്യാണി പ്രിയദർശൻ , ഷൈൻ ടോം ചാക്കോ , ലുഖ്മാൻ അവറാൻ , ബിനു പപ്പു , അസിം ജമാൽ , ഷറഫുദ്ദീൻ , ചെമ്പൻ വിനോദ്, വിനീത് കുമാർ , ജോണി ആന്റണി, അദ്രി ജോ, സ്വാതി ദാസ് പ്രഭു, തൻവി റാം തുടങ്ങിയവർ. ആഷിഖ് ഉസ്മാൻ ആണ് ഈ ചിത്രം നിർമ്മിച്ചിരിക്കുന്നത്. മറ്റ് ചിത്രങ്ങളിൽ നിന്ന് വ്യത്യസ്തത പുലർത്തിയ ഈ ചിത്രത്തിന്റെ രചന മുഹ്സിൻ പരാരി ആണ് നിർവഹിച്ചിരിക്കുന്നത് . ചിത്രത്തിന്റെ ക്യാമറമാൻ ജിംഷി ഖാലിദ് ആണ് . എഡിറ്റർ നിഷാദ് യൂസഫ് ആണ് .

കുടുക്ക് 2025 എന്ന വരാനിരിക്കുന്ന മലയാള ചിത്രം മനോഹരമായ ഗാനങ്ങളാൽ സമ്പന്നമാണ് . സിദ്ദ് ശ്രീറാം ആലപിച്ച മാരൻ എന്ന റൊമാന്റിക് ഗാനവും, റീൽസുകളിൽ ട്രെൻഡിംഗ് ആയി മാറിയ തെയ്തക ഗാനവും പ്രേക്ഷകർക്കിടയിൽ സൃഷ്ടിച്ച ഓളം ചെറുതൊന്നുമല്ല. ഗാനങ്ങൾ മാത്രമല്ല ചിത്രത്തിന്റെ ട്രെയിലറും ചിത്രത്തെ കുറിച്ചുള്ള പ്രേക്ഷക പ്രതീക്ഷകൾ വർധിപ്പിക്കുന്നുണ്ട് . കൃഷ്ണ ശങ്കറും ദുർഗ കൃഷ്ണയും ആണ് ചിത്രത്തിൽ കേന്ദ്രകഥാപാത്രങ്ങളായി എത്തുന്നത് . ഒരു റൊമാന്റിക് ചിത്രമായിരിക്കും കുടുക്ക് 2025 എന്ന പ്രേക്ഷക കാഴ്ചപ്പാടിനെ മാറ്റി മറച്ച് , ഈ ചിത്രം ഒരു കിടിലൻ മിസ്റ്ററി ത്രില്ലറായിരിക്കുമെന്ന് സൂചന നൽകിയിരിക്കുകയാണ് ഇതിന്റെ ട്രൈലർ.

ബിലഹരിയുടെ സംവിധാന മികവിൽ ഒരുങ്ങുന്ന ഈ ത്രില്ലർ ചിത്രത്തിലെ മറ്റൊരു ഗാനത്തിന്റെ കൂടി ടീസർ റിലീസ് ചെയ്തിരിക്കുകയാണ്. പൂവേ എന്ന് തുടങ്ങുന്ന ഗാനത്തിന്റെ ടീസറാണ് ഇപ്പോൾ പ്രേക്ഷക ശ്രദ്ധ നേടുന്നത്. ഈ ഗാനം മനോഹരമായി ആലപിച്ചിരിക്കുന്നത് മലയാളത്തിന്റെ ശ്രദ്ധേയ ഗായിക സിതാര കൃഷ്ണകുമാറും ചിത്രത്തിന്റെ സംഗീത സംവിധായിക ഭൂമിയും ചേർന്നാണ് . ഈ ഗാനത്തിന് വരികൾ രചിച്ചിരിക്കുന്നത് ശ്യാം നാരായണൻ ടി.കെ, ഹരിത ഹരിബാബു എന്നിവർ ചേർന്നാണ്.

ബിലഹരി ഒരുക്കിയ ‘അള്ള് രാമേന്ദ്രൻ’ എന്ന ചിത്രത്തിന് ശേഷം പുതുതായി പുറത്തിറങ്ങാൻ ഒരുങ്ങുന്ന ചിത്രമാണ് കുടുക്ക് 2025. ബിലഹരി തന്നെ രചന നിർവഹിച്ചിരിക്കുന്ന ഈ ചിത്രം 2025ന്റെ പശ്ചാത്തലത്തിൽ ആണ് കഥ പറയുന്നത് . ഈ ചിത്രം പറയുന്നത് മാരൻ എന്ന ചെറുപ്പക്കാരന്റെ കഥയാണ്. മനുഷ്യന്റെ സ്വകാര്യതയിലേക്ക് അതിരുകടന്ന് കയറുന്ന പുതിയ ടെക്നോളജികളും അതുമൂലം ഉണ്ടാകുന്ന ഗുരുതര പ്രശ്നങ്ങളുമാണ് ഈ സിനിമ അവതരിപ്പിക്കുന്നത്.

ചിത്രത്തിൽ സ്വാസിക വിജയ് , ഷൈൻ ടോം ചാക്കോ, അജു വർഗീസ് എന്നിവരും പ്രധാന വേഷങ്ങളിൽ എത്തുന്നു. ചിത്രത്തിന്റെ ക്യാമറമാൻ അഭിമന്യു വിശ്വനാഥ് ആണ്. എഡിറ്റർ കിരൺ ദാസ് . വിക്കിയാണ് ചിത്രത്തിലെ സംഘട്ടന രംഗങ്ങൾക്ക് പിന്നിൽ പ്രവർത്തിച്ചിരിക്കുന്നത്. കുടുക്ക് 2025ലെ ഗാനങ്ങൾ ഒരുക്കിയിരിക്കുന്നത് ഭൂമിയും മണികണ്ഠൻ അയ്യപ്പയും ചേർന്നാണ് . ഓഗസ്റ്റ് 25നാണ് ചിത്രം പ്രദർശനത്തിന് എത്തുന്നത്.