Movie Updates

മികച്ച സഹനടനുള്ള നാഷ്ണൽ അവാർഡ് കരസ്ഥമാക്കിയ നടൻ ബിജു മേനോൻ കേന്ദ്ര കഥാപാത്രമായി എത്തുന്ന പുത്തൻ ചിത്രമാണ് ഒരു തെക്കൻ തല്ല് കേസ്. ശ്രീജിത്ത് എൻ സംവിധാനം ചെയ്യുന്ന ഈ ചിത്രത്തിന്റെ ഒഫീഷ്യൽ ടീസർ ഇപ്പോൾ റിലീസ് ചെയ്തിരിക്കുകയാണ്. E4 എന്റർടൈൻമെന്റിന്റെ യൂട്യൂബ് ചാനലിലൂടെ പുറത്തിറങ്ങിയ ഈ ടീസർ ഇപ്പോൾ പ്രേക്ഷക ശ്രദ്ധ നേടുകയാണ്. എൺപതുകളുടെ പശ്ചാത്തലത്തിലാണ് ഈ ചിത്രം ഒരുക്കിയിരിക്കുന്നതെന്ന് ടീസറിൽ നിന്നും വ്യക്തമാണ്. ചിത്രത്തിന്റെ പേര് പോലെ തന്നെ കിടിലൻ തല്ലാണ് ഈ ടീസറിൽ കാണാൻ സാധിക്കുന്നത്.

ബിജു മേനോനെ കൂടാതെ റോഷൻ മാത്യു, പത്മപ്രിയ, നിമിഷ സജയൻ എന്നിവരും ചിത്രത്തിൽ പ്രധാന വേഷങ്ങളിൽ എത്തുന്നു. വ്യത്യസ്തമായ വേഷ പകർച്ചയിലാണ് ബിജു മേനോനും റോഷൻ മാത്യുവും ഈ ചിത്രത്തിൽ എത്തുന്നത്. ചിത്രത്തിൽ അമ്മിണിപ്പിള്ള എന്ന കഥാപാത്രമായാണ് ബിജു മേനോൻ വേഷമിടുന്നത്. ഏറെ നാളുകൾക്ക് ശേഷമാണ് പത്മപ്രിയ നായിക വേഷത്തിൽ തിരിച്ചെത്തുന്നത് എന്ന പ്രത്യേകതയും ഈ ചിത്രത്തിനുണ്ട്.

രാജേഷ് പിന്നാടൻ രചന നിർവഹിച്ച ഈ ചിത്രം ജി.ആർ ഇന്ദുഗോപൻ രചിച്ച അമ്മിണിപ്പിള്ള വെട്ടുക്കേസ് എന്ന കഥയെ ആസ്പതമാക്കിയാണ് ഒരുക്കിയിരിക്കുന്നത്. അഖിൽ കവലയൂർ, അശ്വത് ലാൽ , രെജു ശിവദാസ് , അരുൺ , അസീസ് നെടുമങ്ങാട്, പ്രമോദ് വെളിയനാട്, പ്രശാന്ത് മുരളി, അച്ചുതാനന്ദൻ , ശശി വാളൂരൻ , നീരജ രാജേന്ദ്രൻ , ജയരാജ് എന്നിവരും ചിത്രത്തിൽ വേഷമിടുന്നു. അൻവർ അലി വരികൾ രചിച്ച ഈ ചിത്രത്തിലെ ഗാനങ്ങൾ ഒരുക്കിയിരിക്കുന്നത് ജസ്റ്റിൻ വർഗ്ഗീസ് ആണ് .

മുകേഷ് ആർ മേത്ത , സുനിൽ എ.കെ, സി വി സാരതി എന്നിവർ ചേർന്നാണ് ഈ ചിത്രം നിർമ്മിക്കുന്നത്. മധു നീലകണ്ഠൻ ഛായാഗ്രഹണം നിർവഹിച്ച ഈ ചിത്രത്തിന്റെ എഡിറ്റിംഗ് കൈകാര്യം ചെയ്തിരിക്കുന്നത് മനോജ് കണ്ണോത്ത് ആണ് . സുന്ദർ , മാഫിയ ശശി എന്നിവർ ചേർന്നാണ് ചിത്രത്തിലെ സംഘട്ടന രംഗങ്ങൾ ഒരുക്കിയിരിക്കുന്നത്.

ജൂലൈ 21 ന് ആഗോള തലത്തിൽ പ്രദർശനത്തിന് എത്തിയ പുത്തൻ ചിത്രമാണ് മഹാവീര്യർ . എബ്രിഡ് ഷൈൻ ഒരുക്കിയ ഈ ചിത്രം മികച്ച പ്രേക്ഷക പ്രതീകരണം നേടി മുന്നേറുകയാണ്. നിവിൻ പോളി – ആസിഫ് അലി എന്നിവർ പ്രധാനവേഷങ്ങളിൽ എത്തിയ ഈ ചിത്രത്തിന്റെ ഒരു ടീസർ ഇപ്പോൾ റിലീസ് ചെയ്തിരിക്കുകയാണ്. പോലീസ് സ്റ്റേഷനിലുള്ള നിവിൻ പോളിയുടെ വളരെ രസകരമായ ഒരു രംഗമാണ് ഈ ടീസറിൽ കാണാൻ സാധിക്കുന്നത്. വെറും 44 സെക്കന്റ് മാത്രം ദൈർഘ്യമുള്ള ഈ വീഡിയോയിൽ ഒരു ഹാസ്യ രംഗമാണ് കാണിച്ചിരിക്കുന്നത്.

മഹാവീര്യർ എന്ന ചിത്രത്തിന്റെ പ്രധാന ഇതിവൃത്തം ട്രൈം ട്രാവലറും ഫാന്റസിയും ആണ് . ഒപ്പം ഒട്ടേറെ നർമ്മ രംഗങ്ങൾ ചിത്രത്തിൽ ഉൾപ്പെടുത്തിയിട്ടുണ്ട് എന്നത് ഈ ടീസറിൽ നിന്നും വ്യക്തമാണ് . മാത്രമല്ല വൈകാരിക നിമിഷങ്ങളും ഈ ചിത്രത്തിന്റെ ഭാഗമാകുന്നുണ്ട്. നിവിൻ പോളി – ആസിഫ് അലി എന്നിവരെ കൂടാതെ ഷാൻവി ശ്രീ വാസ്തവ, സിദ്ദിഖ്, ലാൽ , ലാലു അലക്സ് , സുധീർ കരമന, മേജർ രവി , മല്ലിക സുകുമാരൻ എന്നിവരും ചിത്രത്തിൽ ശ്രദ്ധേയ വേഷങ്ങളിൽ എത്തുന്നുണ്ട്.

പോളി ജൂനിയർ ഫിലിംസിന്റെ ബാനറിൽ ആണ് ഈ ചിത്രം പുറത്തിറങ്ങിയത്. നിവിൻ പോളി , പി.എസ് ഷംനാസ് , എബ്രിഡ് ഷൈൻ എന്നിവർ ചേർന്നാണ് ഈ ചിത്രത്തിന്റെ നിർമ്മാണം നിർവഹിച്ചിരിക്കുന്നത്. എം. മുകുന്ദൻ ആണ് ഈ ടൈം ട്രാവലർ ചിത്രത്തിന്റെ കഥ തയ്യാറാക്കിയത്. ചന്ദ്രു സെൽവരാജ് ആണ് ചിത്രത്തിന്റെ ക്യാമറമാൻ . മനോജ് ആണ് ചിത്രത്തിന്റെ എഡിറ്റർ.

ഈ അടുത്ത് റിലീസ് ചെയ്ത പുത്തൻ തമിഴ് ചിത്രമാണ് ഗാർഗി . ഗൗതം രാമചന്ദ്രൻ സംവിധാനം ചെയ്ത ഈ ചിത്രത്തിൽ നടി സായ് പല്ലവിയാണ് കേന്ദ്ര കഥാപാത്രത്തെ അവതരിപ്പിച്ചിരിക്കുന്നത്. ഇപ്പോഴിതാ ഈ ചിത്രത്തിന്റെ ഒരു സ്നീക്ക് പീക്ക് വീഡിയോ പുറത്തുവിട്ടിരിക്കുകയാണ്. സായ് പല്ലവിയേയും നടൻ കാലി വെങ്കട്ടിനേയുമാണ് ഈ വീഡിയോയിൽ കാണാൻ സാധിക്കുന്നത് . ചിത്രത്തിൽ ഒരു സ്കൂൾ ടീച്ചറുടെ വേഷമാണ് സായ് പല്ലവിയുടേത്. വക്കീലായാണ് കാലി വെങ്കട് എത്തുന്നത്. വക്കീലിനോട് തന്റെ അച്ഛനെ രക്ഷിക്കാനായി തട്ടി കയറുന്ന സായ് പല്ലവിയെ ആണ് ഈ വീഡിയോയിൽ കാണാൻ സാധിക്കുന്നത്.

സായ് പല്ലവി അവതരിപ്പിക്കുന്ന ഗാർഗി എന്ന കഥാപാത്രം വളരെ ശക്തയായ സ്ത്രീ വേഷമാണ്. ഗാർഗിയുടെ പിതാവ് ഒരു കേസിൽ അകപ്പെടുന്നതും അതേ തുടർന്ന് ഗാർഗി അനുഭവിക്കേണ്ടി വരുന്ന മാനസിക സംഘർഷങ്ങളും , പിതാവിനെ രക്ഷിക്കാൻ ശ്രമിക്കുന്നതും എല്ലാം ആണ് ഈ ചിത്രത്തിൽ . സായ് പല്ലവിയുടെ മറ്റൊരു അത്യുജ്ജ്വല പ്രകടനം തന്നെയാണ് ഗാർഗി എന്ന ഈ ചിത്രത്തിൽ കാണാൻ സാധിക്കുന്നത്.

കലൈമാമണി ശരവണൻ ,ജയപ്രകാശ് , ആർ.എസ് ശിവജി , പ്രതാപ് , സുധ, ലിവിങ്സ്റ്റൺ , കവിതലയ കൃഷ്ണൻ , മലയാളി നായിക ഐശ്വര്യ ലക്ഷ്മി എന്നിവരും ഈ ചിത്രത്തിൽ ശ്രദ്ധേയ വേഷങ്ങളിൽ എത്തുന്നുണ്ട്. ബ്ലാക്കി, ജീനി, മൈ ലെഫ്റ്റ് ഫൂട്ട് എന്നിവയുടെ ബാനറിൽ പുറത്തിറങ്ങിയ ഈ ചിത്രം നിർമ്മിച്ചിരിക്കുന്നത് രവിചന്ദ്രൻ രാമചന്ദ്രൻ , തോമസ് ജോർജ്ജ്, ഐശ്വര്യ ലക്ഷ്മി, വി ഗൗതം രാമചന്ദ്രൻ എന്നിവർ ചേർന്നാണ്. നടി ഐശ്വര്യ ലക്ഷ്മിയുടെ ആദ്യ നിർമ്മാണ സംരംഭമാണ് ഗാർഗി എന്ന ഈ ചിത്രം. 2D എന്റർടൈൻമെന്റ് ആണ് തമിഴിൽ ഈ ചിത്രം വിതരണം ചെയ്യുന്നത് . കാർത്തിക്ക് നേത ആണ് ചിത്രത്തിലെ ഗാനങ്ങൾക്ക് വരികൾ രചിച്ചിരിക്കുന്നത്. സംഗീതം നൽകിയത് ഗോവിന്ദ് വസന്ത ആണ്. ശ്രേയന്തി, പ്രേം കൃഷ്ണ എന്നിവരാണ് ചിത്രത്തിന്റെ ഛായാഗ്രാഹകർ . എഡിറ്റർ ഷഫീഖ് മുഹമ്മദ് അലി ആണ്.

അടുത്ത മാസം പ്രദർശനത്തിന് എത്താൻ ഒരുങ്ങുന്ന മലയാള ചിത്രങ്ങളിലൊന്നാണ് സൈമൺ ഡാനിയേൽ. ഇന്നലെ ഈ ചിത്രത്തിന്റെ ട്രൈലെർ റിലീസ് ചെയ്യുകയും പ്രേക്ഷകർക്കിടയിൽ വളരെ സ്വീകാര്യത ലഭിക്കുകയും ചെയ്തിരുന്നു. ഒരു പക്കാ ത്രില്ലറായാണ് സംവിധായകൻ സാജൻ ആന്റണി ഈ ചിത്രം ഒരുക്കിയിരിക്കുന്നത്. ഇതിന്റെ ട്രൈലെറിൽ നിന്നും ചിത്രത്തിന്റെ ഇതിവൃത്തം മനസ്സിലാക്കാം. കാടിന് നടുക്കുള്ള ഒരു ബംഗ്ലാവ്, ആ ബംഗ്ലാവിനെ കുറിച്ച് ഏറെ കാലമായി പ്രചരിക്കുന്ന കഥകളും അതിന്റെ ഭാഗമായി അവിടേക്ക് നിധി തേടിയിറങ്ങുന്ന ഒരു കൂട്ടം ആളുകൾ .

ഈ കഥാപാത്രങ്ങൾ അവിടെ നേരിടുന്ന സംഭവങ്ങളും അവരുടെ ജീവിതത്തിൽ സംഭവിക്കുന്ന കാര്യങ്ങളുമാണ് ഈ ചിത്രത്തിൽ ഉൾപ്പെടുത്തിയിരിക്കുന്നത്. ഓഗസ്റ്റ് പത്തൊൻപതിന് പ്രദർശനത്തിന് എത്തുന്ന ഈ ചിത്രത്തിൽ വിനീത് കുമാർ, ദിവ്യ പിള്ള എന്നിവരാണ് കേന്ദ്ര കഥാപാത്രങ്ങളായി എത്തുന്നത്. ചിത്രത്തിന്റെ ഈ ട്രെയ്‌ലർ റിലീസ് ചെയ്തിരിക്കുന്നത് ജോയിൻ ദി ഹണ്ട് എന്ന ടാഗ് ലൈനോട് കൂടിയാണ്. മൈഗ്രെസ് പ്രൊഡക്ഷൻസിന്റെ ബാനറിൽ ഒരുങ്ങുന്ന ഈ ചിത്രത്തിന്റെ നിർമ്മാണം നിർവഹിച്ചിരിക്കുന്നത് രാകേഷ് കുര്യാക്കോസ് ആണ് .

നിർമ്മാതാവ് രാകേഷ് കുര്യാക്കോസ് ആണ് ചിത്രത്തിന്റെ രചന നിർവഹിച്ചിരിക്കുന്നത്. സാജൻ ആന്റണി ആണ് ചിത്രത്തിന്റെ ഛായാഗ്രാഹകൻ . വരുൺ കൃഷ്‌ണ ആണ് ചിത്രത്തിലെ ഗാനങ്ങൾ ഒരുക്കിയിരിക്കുന്നത്. എഡിറ്റിംഗ് കൈകാര്യം ചെയ്യുന്നത് ദീപു ജോസഫാണ്. നേരത്തെ തന്നെ പുറത്തിറങ്ങിയ ഇതിന്റെ ഫസ്റ്റ് ലുക്ക് പോസ്റ്ററും ഇതിലെ ഗാനവും ഏറെ പ്രേക്ഷക ശ്രദ്ധ നേടിയിരുന്നു.

വിനീത് കുമാർ, ദിവ്യ പിള്ള എന്നിവരോടൊപ്പം വിജീഷ് വിജയൻ, ശ്രീരാമൻ, സുനിൽ സുഗത എന്നിവരും പ്രധാന വേഷങ്ങളിൽ എത്തുണ്ട്. ഒരു മിസ്റ്ററി ത്രില്ലർ ചിത്രമായ സൈമൺ ഡാനിയേലിന്റെ കലാസംവിധാനം നിർവഹിച്ചത് ഇന്ദുലാൽ കാവീടാണ്. ചിത്രത്തിലെ ആക്ഷൻ രംഗങ്ങൾ റോബിൻ ടോമാണ് ഒരുക്കിയത്. നടനും സംവിധായകനുമായ വിനീത് കുമാർ ഒരു നീണ്ട ഇടവേളയ്ക്ക് ശേഷം നായക വേഷം ചെയ്യുന്ന ചിത്രം കൂടിയാണ് .

ജൂലൈ 29 ന് റിലീസിന് ഒരുങ്ങുന്ന ആക്ഷൻ ഹീറോ സുരേഷ് ഗോപി ചിത്രമാണ് പാപ്പൻ. ജോഷിയുടെ സംവിധാന മികവിൽ ഒരുങ്ങുന്ന ഈ ചിത്രത്തിന്റെ ഗ്രാൻഡ് ട്രൈലർ ഇപ്പോൾ പുറത്തുവിട്ടിരിക്കുകയാണ്. ഒരു അത്യുഗ്രൻ ട്രൈലർ തന്നെയാണ് ഇപ്പോൾ പ്രേക്ഷകർക്ക് മുന്നിലേക്ക് എത്തിയിരിക്കുന്നത്. ചുരുളഴിയാത്ത കൊലപാതകങ്ങളും അതേ തുടർന്നുള്ള അന്വേഷണവും എല്ലാം ആണ് ഈ ക്രൈം ത്രില്ലർ ഡ്രാമ ചിത്രത്തിന്റെ ട്രൈലറിൽ കാണാൻ സാധിക്കുന്നത്.

ചിത്രത്തിൽ എബ്രഹാം മാത്യു മാത്തൻ എന്ന പോലീസ് ഉദ്യോഗസ്ഥനായാണ് സുരേഷ് ഗോപി വേഷമിടുന്നത്. ഈ ചിത്രത്തിൽ സുരേഷ് ഗോപിയുടെ ഒരു വമ്പൻ തിരിച്ചു വരവ് തന്നെയാണ് കാണാൻ സാധിക്കും എന്നത് ട്രൈലറിൽ നിന്ന് വ്യക്തമാണ്.

ജോഷി – സുരേഷ് ഗോപി കൂട്ടുക്കെട്ടിൽ ഏറെ നാളുകൾക്ക് ശേഷം പുറത്തിറങ്ങുന്ന ഈ ചിത്രം ഒരു വമ്പൻ ഹിറ്റായി മാറും എന്നാണ് ആരാധകർ പ്രതീക്ഷിക്കുന്നത്. ഗോകുൽ സുരേഷും ചിത്രത്തിൽ പ്രധാന വേഷത്തിൽ എത്തുന്നുണ്ട്. അച്ഛനും മകനും ഒന്നിക്കുന്ന ആദ്യ ചിത്രമാണിത്. ആർ.ജെ ഷാൻ രചന നിർവഹിക്കുന്ന ഈ ചിത്രത്തിൽ വിജയരാഘവൻ , നീത പിള്ള , നൈല ഉഷ, കനിഹ, ആശ ശരത്ത്, ചന്ദുനാഥ് , ടിനി ടോം, ഷമ്മി തിലകൻ , ജനാർദ്ദനൻ , രാഹുൽ മാധവ് , മാല പാർവതി, ശ്രീജിത്ത് രവി എന്നിവരും പ്രധാന വേഷങ്ങളെ അവതരിപ്പിക്കുന്നുണ്ട്.

ഈ ചിത്രം നിർമ്മിക്കുന്നത് ശ്രീ ഗോകുലം ഗോപാലൻ, ഡേവിഡ് കാച്ചാപ്പിളളി , റാഫി മധീര എന്നിവർ ചേർന്നാണ് . ജേക്സ് ബിജോയ് ആണ് ചിത്രത്തിലെ ഗാനങ്ങൾക്ക് ഈണം പകർന്നിരിക്കുന്നത്. ഛായാഗ്രാഹകൻ അജയ് ഡേവിഡ് കച്ചാപ്പിള്ളി ആണ്. ചിത്രത്തിന്റെ എഡിറ്റിംഗ് കൈകാര്യം ചെയ്തിരിക്കുന്നത് ശ്യാം ശശിധരൻ ആണ്.

ജൂലൈ 21 ന് ആഗോള തലത്തിൽ റിലീസ് ചെയ്ത പുത്തൻ ചിത്രമാണ് മഹാവീര്യർ . എബ്രിഡ് ഷൈൻ ഒരുക്കിയ ഈ ചിത്രം ആദ്യ ദിനം തന്നെ ഗംഭീര വിജയം കാഴ്ചവച്ചു. നിവിൻ പോളി – ആസിഫ് അലി എന്നിവരാണ് ചിത്രത്തിലെ കേന്ദ്ര കഥാപാത്രങ്ങളെ അവതരിപ്പിച്ചിരിക്കുന്നത്. ഈ ചിത്രത്തിലെ ഒരു ഗാനം ഇപ്പോൾ പുറത്തുവിട്ടിരിക്കുകയാണ്. വരാനാവില്ലേ എന്ന വരികളോടെ തുടങ്ങുന്ന ഗാനത്തിന്റെ ലെറിക്കൽ വീഡിയോ ആണ് ഇപ്പോൾ പ്രേക്ഷക ശ്രദ്ധ നേടുന്നത്. അസനു അന്ന അഗസ്റ്റിൻ വരികൾ രചിച്ച ഈ ഗാനത്തിന് ഈണം നൽകിയിരിക്കുന്ന ഇഷാൻ ചാമ്പ്ര ആണ്. അതിമനോഹരമായ ഈ ഗാനം ആലപിച്ചിരിക്കുന്നത് അൻവേഷാ ആണ് . റെക്കോഡിംഗ് രംഗങ്ങളും ചിത്രത്തിലെ സ്റ്റിൽസും ഉൾപ്പെടുത്തിയാണ് ഈ വീഡിയോ പുറത്തു വിട്ടിരിക്കുന്നത്.

ട്രൈം ട്രാവലറും ഫാന്റസിയും ആണ് മഹാവീര്യർ എന്ന ചിത്രത്തിന്റെ പ്രധാന ഇതിവൃത്തം. ഒപ്പം ഒട്ടേറെ നർമ്മ രംഗങ്ങളും വൈകാരിക നിമിഷങ്ങളും ചിത്രത്തിൽ ഉൾപ്പെടുത്തിയിട്ടുണ്ട് . നിവിൻ പോളി – ആസിഫ് അലി എന്നിവർക്കൊപ്പം സിദ്ദിഖ്, ലാൽ , ലാലു അലക്സ് , ഷാൻവി ശ്രീ വാസ്തവ, മല്ലിക സുകുമാരൻ ,സുധീർ കരമന, മേജർ രവി എന്നിവരും ചിത്രത്തിൽ പ്രധാന വേഷങ്ങളിൽ എത്തുന്നു.

പോളി ജൂനിയർ ഫിലിംസിന്റെ ബാനറിൽ പുറത്തിറങ്ങിയ ഈ ചിത്രം നിർമ്മിച്ചിരിക്കുന്നത് നിവിൻ പോളി , പി.എസ് ഷംനാസ് , എബ്രിഡ് ഷൈൻ എന്നിവർ ചേർന്നാണ്. ചിത്രത്തിന്റെ കഥ തയ്യാറാക്കിയത് എം. മുകുന്ദൻ ആണ്. ചന്ദ്രു സെൽവരാജ് ആണ് ചിത്രത്തിന്റെ ഛായാഗ്രഹണം നിർവഹിച്ചിരിക്കുന്നത് . എഡിറ്റിംഗ് കൈകാര്യം ചെയ്തിരിക്കുന്നത് മനോജ് ആണ്.

പത്രോസിന്റെ പടപ്പുകൾ എന്ന ചിത്രത്തിലുടെ പ്രേക്ഷക ശ്രദ്ധ നേടിയ ഡിനോയ് നായകനായി എത്തുന്ന പുത്തൻ ചിത്രമാണ് വിശുദ്ധ മെജോ . കിരൺ ആന്റണി സംവിധാനം ചെയ്യുന്ന ഈ ചിത്രത്തിന്റെ ഒഫീഷ്യൽ ട്രൈലർ ഇപ്പോൾ പുറത്തുവിട്ടിരിക്കുകയാണ്. വളരെ രസകരമായ ഒരു ട്രൈലർ രംഗമാണ് ഇപ്പോൾ പ്രേക്ഷകരിലേക്ക് എത്തിയിരിക്കുന്നത്. നടൻ മോഹൻലാൽ ആണ് തന്റെ ഫേസ്ബുക്ക് പേജിലൂടെ ഈ ട്രൈലർ വീഡിയോ പുറത്തുവിട്ടത്.

ജയ് ഭീം എന്ന ചിത്രത്തിലൂടെ മലയാളികൾക്കും തമിഴ് പ്രേക്ഷകർക്കും ഏറെ സുപരിചിതയായ നടി ലിജോമോൾ ആണ് ഈ ചിത്രത്തിൽ നായിക വേഷം ചെയ്യുന്നത്. ഡിനോയ് , ലിജോമോൾ , മാത്യു തോമസ് എന്നിവരാണ് ട്രൈലർ രംഗങ്ങളിൽ നിറഞ്ഞ് നിൽക്കുന്നത്. റൊമാൻസും കോമഡിയും നിറഞ്ഞ് നിൽക്കുന്ന ഈ വീഡിയോയിൽ തന്റെ ബാല്യകാല സുഹൃത്തിനോട് പ്രണയം പറയാൻ കഷ്ടപ്പെടുന്നതും അതേ തുടർന്നുള്ള രസികൻ നിമിഷങ്ങളും എല്ലാം കാണാൻ സാധിക്കും. ഒട്ടേറെ പ്രേക്ഷകരാണ് ചിത്രം ഒരു വമ്പൻ ഹിറ്റ് ആയി മാറട്ടെ എന്ന് ആശംസിച്ച് കമന്റുകൾ നൽകിയിട്ടുള്ളത്.

ഈ ചിത്രം നിർമ്മിക്കുന്നത് വിനോദ് ഷൊർണൂർ, ജോമോൻ ടി ജോൺ , ഷമീർ മുഹമ്മദ് എന്നിവർ ചേർന്നാണ് . ചിത്രത്തിന്റെ കഥ, തിരക്കഥ, സംഭാഷണം എന്നിവ രചിച്ചിരിക്കുന്നത് നടൻ ഡിനോയ് പൗലോസ് തന്നെയാണ്. ജസ്റ്റിൻ വർഗ്ഗീസ് ആണ് ചിത്രത്തിലെ ഗാനങ്ങൾ തയ്യാറാക്കിയിരിക്കുന്നത്. ജോമോൻ ടി ജോൺ ആണ് ചിത്രത്തിന്റെ ക്യാമറമാൻ. ഷമീർ മുഹമ്മദ് ആണ് എഡിറ്റിംഗ് കൈകാര്യം ചെയ്തിരിക്കുന്നത് .

ഇപ്പോഴും തിയറ്ററുകളിൽ ഗംഭീര വിജയം കാഴ്ചവച്ച് മുന്നേറുന്ന ഷാജി കൈലാസ് – പൃഥ്വിരാജ് ചിത്രമാണ് കടുവ. ഈ ബിഗ് ബഡ്ജറ്റ് മാസ്സ് ആക്ഷൻ ത്രില്ലർ ചിത്രം വമ്പൻ ബോക്സ് ഓഫീസ് വിജയമാണ് നേടുന്നത്. ചിത്രത്തിന്റെ ഒരു സക്സസ് ടീസറും വീഡിയോ ഗാനവും അത്യുഗ്രൻ ഫൈറ്റ് സീൻ വീഡിയോയും എല്ലാം സോഷ്യൽ മീഡിയയിൽ ഇടം നേടിയിരുന്നു. ഇപ്പോഴിതാ ചിത്രത്തിലെ നടൻ പൃഥ്വിരാജിന്റെ ഒരു മാസ്സ് സീൻ വീഡിയോ കൂടി പുറത്തുവിട്ടിരിക്കുകയാണ്. മാജിക് ഫ്രെയിംസിന്റെ യൂടൂബ് ചാനലിലൂടെ പുറത്തുവിട്ട ഈ വീഡിയോയിൽ പോലീസ് സ്റ്റേഷനിൽ അരങ്ങേറുന്ന കിടിലൻ രംഗമാണ് കാണാൻ സാധിക്കുന്നത്. പൃഥ്വിരാജും നടൻ കലാഭവൻ ഷാജോണും തമ്മിലുള്ള ഒരു മാസ്സ് സീൻ ആണിത്.

ഇവരെ കൂടാതെ സംയുക്ത മേനോൻ , അർജുൻ അശോകൻ, അജു വർഗീസ്, സീമ, രാഹുൽ മാധവ്, സിദ്ദിഖ്, സുദേവ് നായർ,വിജയ രാഘവൻ, ദിലീഷ് പോത്തൻ, വൃദ്ധി വിശാൽ, ജനാർദ്ദനൻ, പ്രിയങ്ക , മീനാക്ഷി, സച്ചിൻ കടേക്കർ , റീന മാത്യൂസ്, ജൈസ് ജോസ്, കൊച്ചു പ്രേമൻ, അബു സലിം , അലൻസിയർ , സായി കുമാർ, ബൈജു എന്നിവരും ചിത്രത്തിൽ പ്രധാന വേഷങ്ങളിൽ എത്തുന്നുണ്ട് .

മാജിക് ഫ്രെയിംസ്, പൃഥ്വിരാജ് പ്രൊഡക്ഷൻസ് എന്നിവയുടെ ബാനറിൽ പുറത്തിറങ്ങിയ ഈ ചിത്രത്തിന്റെ നിർമ്മാണം നിർവഹിച്ചിരിക്കുന്നത് ലിസ്റ്റിൻ സ്റ്റീഫനും സുപ്രിയ മേനോനും ചേർന്നാണ്. ചിത്രത്തിലെ ഗാനങ്ങൾ ഒരുക്കിയിരിക്കുന്നത് ജേക്സ് ബിജോയ് ആണ് . വൈഭവ് എം ആണ് ഇതിലെ സംഭാഷണങ്ങൾ തയ്യാറാക്കിയത് . അഭിനന്ദൻ രാമാനുജൻ ഛായാഗ്രഹണം നിർവഹിച്ച ഈ ചിത്രം എഡിറ്റ് ചെയ്തിരിക്കുന്നത് ഷമീർ മുഹമ്മദ് ആണ് .

മലയാളത്തിന്റെ സൂപ്പർ സ്റ്റാർ മോഹൻലാൽ സംവിധാനം ചെയ്യുന്ന പുത്തൻ ചിത്രമാണ് ബറോസ് . അദ്ദേഹം തന്നെ നായകനായി എത്തുന്ന ഈ ചിത്രം സംവിധാനത്തിലെ അദ്ദേഹത്തിന്റെ ആദ്യ ചുവടുവയ്പ്പാണ്. അതുകൊണ്ട് തന്നെ അനൗൺസ് ചെയ്ത അന്നു മുതൽ പ്രേക്ഷകർ ഏറെ ആകാംഷയോടെ ഉറ്റു നോക്കുന്ന ചിത്രമാണിത്. ഇപ്പോഴിതാ ആശീർവാദ് സിനിമാസിന്റെ യൂട്യൂബ് ചാനലിലൂടെ ബറോസിന്റെ മേക്കിംഗ് വീഡിയോ പുറത്തു വിട്ടിരിക്കുകയാണ്. രണ്ട് മിനുട്ടോളം ദൈർഘ്യമുള്ള ഈ വീഡിയോയിൽ വളരെ ഡെഡിക്കേഷനോടെ കഠിന പ്രയത്നം ചെയ്ത് ക്യാമറയ്ക്ക് പിന്നിൽ പ്രവർത്തിക്കുന്ന മോഹൻലാലിനെയാണ് കാണാൻ സാധിക്കുന്നത്. തന്റെ ആദ്യ ചിത്രം അതി ഗംഭീരമാക്കാൻ പ്രയത്നിക്കുന്ന താരത്തെ അഭിനന്ദിച്ച് നിരവധി പ്രേക്ഷകരാണ് കമന്റുകൾ നൽകിയിരിക്കുന്നത്.

ആശീർവാദ് സിനിമാസിന്റെ ബാനറിൽ ഒരുങ്ങുന്ന ഈ ത്രീഡി ചിത്രം നിർമ്മിക്കുന്നത് ആന്റണി പെരുമ്പാവൂരാണ്. മൈ ഡിയർ കുട്ടിച്ചാത്തൻ എന്ന ത്രീഡി ചിത്രത്തിന് കഥ തയ്യാറാക്കിയ ജിജോ ആണ് ബറോസിന്റെയും രചന നിർവഹിച്ചിരിക്കുന്നത്.

സന്തോഷ് ശിവൻ ആണ് ചിത്രത്തിന്റെ ഛായാഗ്രാഹകൻ . നാന്നൂറ് വർഷം പഴക്കമുള്ള ഒരു ഭൂതത്തിന്റെ കഥ പറയുന്ന ഈ ചിത്രത്തിൽ നിധി കാക്കുന്ന ഭൂതമായാണ് മോഹൻലാൽ എത്തുന്നത്. ഈ ചിത്രം അവതരിപ്പിക്കുന്നത് ഇന്റർനാഷ്ണൽ പ്ലാറ്റ് ഫോമിലാണ്. വിദേശ നടി പാസ് വേഗ , നടൻ ഗുരു സോമസുന്ദരം എന്നിവരും ചിത്രത്തിൽ പ്രധാന വേഷങ്ങളിൽ എത്തുന്നുണ്ട്.

സോഷ്യൽ മീഡിയയിൽ ഇപ്പോൾ നിറഞ്ഞു നിൽക്കുന്നത് മലയാളികളുടെ പ്രിയ താരം പ്രണവ് മോഹൻലാൽ ആണ് . തന്റെ സാഹസിക പ്രകടനം കൊണ്ട് ഒരിക്കൽ കൂടി താരം പ്രേക്ഷക ശ്രദ്ധ നേടുന്ന കാഴ്ചയാണ് കാണാൻ സാധിക്കുന്നത്. താരത്തിന്റെ ഏറ്റവും പുതിയ വീഡിയോ ഇപ്പോൾ സാമൂഹ്യ മാധ്യമങ്ങൾ കീഴടക്കുകയാണ്. കുത്തനെയുള്ള വലിയൊരു പാറക്കെട്ടിലൂടെ പിടിച്ചു മുകളിലേക്ക് കയറുന്ന പ്രണവിനെയാണ് ഈ വീഡിയോയിൽ കാണാൻ സാധിക്കുന്നത്. അപ്പു എന്ന് വിളിക്കുന്ന മലയാളികളുടെ സ്വന്തം പ്രണവ് ഇപ്പോൾ സാഹസികതയുടെ പര്യായമായി മാറിക്കഴിഞ്ഞിരിക്കുകയാണ് എന്നാണ് ആരാധകർ പറയുന്നത് .

രണ്ടു ബ്ലോക്ക്ബസ്റ്ററുകൾ മലയാള സിനിമ ലോകത്തേക്ക് സമ്മാനിച്ച മിന്നും താരം ഇതിനോടകം മൂന്നു ചിത്രങ്ങളിൽ മാത്രമാണ് നായക വേഷം ചെയ്തിരിക്കുന്നത്. ഈ മൂന്ന് ചിത്രങ്ങളിൽ പ്രണവ് മോഹൻലാൽ- വിനീത് ശ്രീനിവാസൻ കൂട്ടുകെട്ടിൽ പിറന്ന ഹൃദയമെന്ന ചിത്രം അമ്പതു കോടി ക്ലബിലും ഇടം നേടി. ഇത്രയും കുറവ് സമയത്തിനുള്ളിൽ ഒരു ചിത്രം അമ്പതു കോടി ക്ലബിലെത്തിച്ച ആദ്യ മലയാള താരം കൂടിയാണ് പ്രണവ്.

ഡ്യൂപ്പില്ലാതെ അതിസാഹസിക രംഗങ്ങൾ ചെയ്ത് സ്‌ക്രീനിൽ പ്രത്യക്ഷപ്പെടുന്ന പ്രണവ് പ്രേക്ഷകരുടെ കൈയ്യടി നേടുന്നതിൽ മുൻപന്തിയിലാണ്. അതിഗംഭീര സംഘട്ടന രംഗങ്ങൾ നിറഞ്ഞ ആദി എന്ന തന്റെ ആദ്യ ചിത്രത്തിൽ തന്നെ അത്യുഗ്രൻ പ്രകടനം കാഴ്ചവച്ച് വലിയ ആരാധക വൃന്ദത്തെയാണ് പ്രണവ് സ്വന്തമാക്കിയത്. ആദ്യ ചിത്രത്തിനായി ഏറെ അപകടം പിടിച്ച പാർക്കർ സംഘട്ടനവും പ്രണവ് പഠിച്ചിരുന്നു. പ്രണവ് എന്ന നടൻ ലോകം മുഴുവൻ പല തവണ യാത്ര ചെയ്തിട്ടുള്ള ഒരു സഞ്ചാരി കൂടിയാണ്. യാത്രകളും സാഹസികതയും ഒപ്പം പുസ്തകങ്ങളും ഫിലോസഫിയും ഇഷ്ട്ടപെടുന്ന ഒരു വ്യക്തി കൂടിയാണ് പ്രണവ് മോഹൻലാൽ . താരത്തിന്റെ ഇനി വരാനിരിക്കുന്ന പുത്തൻ ചിത്രമേതെന്ന് അറിയാനുള്ള കാത്തിരിപ്പിലാണ് ഇപ്പോൾ മലയാളി പ്രേക്ഷകരും പ്രണവ് ആരാധകരും. പ്രണവ് പർവ്വതാരോഹണം, സർഫിങ്, സ്‌കേറ്റിങ് , ജിംനാസ്റ്റിക് എന്നിവയിൽ മാസ്റ്റർ ആണ്. പ്രണവ് തന്റെ ഇൻസ്റ്റാഗ്രാം പ്രജിലൂടെ പങ്കു വെക്കുന്ന ചിത്രങ്ങൾക്കും വീഡിയോകൾക്കും വലിയ സ്വീകരണമാണ് പ്രേക്ഷകർ നൽകാറുള്ളത്.