Movie Updates

മലയാളത്തിന്റെ യുവതാരം ടൊവിനോ തോമസിനെ നായകനായി ഖാലിദ് റഹ്മാൻ സംവിധാനം ചെയ്യുന്ന ഏറ്റവും പുതിയ ചിത്രമാണ് തല്ലുമാല . തിയറ്ററുകളിൽ ഓഗസ്റ്റ് 12 ന് ആഗോള തലത്തിൽ പ്രദർശനത്തിന് എത്താൻ ഒരുങ്ങുകയാണ് ഈ ചിത്രം. ഒരു കോമഡി ആക്ഷൻ ചിത്രമായ തല്ലുമാലയിലെ ഒരു കിടിലൻ വീഡിയോ ഗാനം ഇപ്പോൾ റിലീസ് ചെയ്തിരിക്കുകയാണ്. “ണ്ടാക്കിപ്പാട്ട് ” എന്ന പേരിൽ പുറത്തിറങ്ങിയ ഈ ഗാനം ഇപ്പോൾ സോഷ്യൽ മീഡിയയിൽ വൈറലായി മാറിയിരിക്കുകയാണ്. ഒരു ദിവസം കൊണ്ട് പന്ത്രണ്ട് ലക്ഷത്തിലധികം കാഴ്ചക്കാരെയാണ് ഈ വീഡിയോ സ്വന്തമാക്കിയത്.

വളരെ രസകരമായ ലെറിക്ക്സും ഹാസ്യം നിറഞ്ഞ ഗാനരംഗങ്ങളും ഈ ഗാനത്തെ വ്യത്യസ്തമാക്കുന്നു. നടൻ ടൊവിനോ തോമസിന്റെയും ഷൈൻ ടോം ചാക്കോയുടേയും കിടിലൻ ഡാൻസ് പെർഫോമൻസ് ആണ് ഈ വീഡിയോയുടെ ഹൈലൈറ്റായി മാറിയിരിക്കുന്നത്. നിരവധി പ്രേക്ഷകരാണ് ഇവരുടെ ഡാൻസിനെ പ്രശംസിച്ച് വീഡിയോയ്ക്ക് താഴെ കമന്റുകൾ നൽകിയിട്ടുള്ളത്. വിഷ്ണു വിജയ് ഈണം പകർന്ന ഈ ഗാനം ആലപിച്ചിരിക്കുന്നത് വിഷ്ണു വിജയ് , മുഹ്സിൻ പരാരി, ഷെമ്പക രാജ്, സന്തോഷ് ഹരിഹരൻ, ശ്രീരാജ്, സ്വാതി ദാസ് , ഔസ്റ്റിൻ ഡാൻ, ലുഖ്മാൻ അവറാൻ, അദ്രി ജോ, ഗോകുലൻ , ബിനു പപ്പു എന്നിവർ ചേർന്നാണ്.

കല്യാണി പ്രിയദർശൻ ആണ് ചിത്രത്തിൽ നായികയായി എത്തുന്നത്. കൂടാതെ ഷറഫുദ്ദീൻ , ചെമ്പൻ വിനോദ്, വിനീത് കുമാർ , ജോണി ആന്റണി,ലുഖ്മാൻ അവറാൻ , സ്വാതി ദാസ് പ്രഭു, അദ്രി ജോ, തൻവി റാം, ബിനു പപ്പു , അസിം ജമാൽ എന്നിവരും ശ്രദ്ധേയ വേഷങ്ങളിൽ എത്തുന്നു. ആഷിഖ് ഉസ്മാൻ ആണ് ഈ ചിത്രത്തിന്റെ നിർമ്മാതാവ് . മുഹ്സിൻ പരാരി ആണ് ചിത്രത്തിന്റെ രചന നിർവഹിച്ചിരിക്കുന്നത് . ജിംഷി ഖാലിദ് ഛായാഗ്രഹണം നിർവഹിക്കുന്ന ഈ ചിത്രം എഡിറ്റ് ചെയ്തിരിക്കുന്നത് നിഷാദ് യൂസഫ് ആണ്.

നടി അമല പോൾ കേന്ദ്ര കഥാപാത്രമായി എത്തുന്ന ഏറ്റവും പുതിയ തമിഴ് ചിത്രമാണ് കാഡവർ . ആഗസ്റ്റ് 12 മുതൽ ഡിസ്നി പ്ലസ് ഹോട്ട് സ്റ്റാറിൽ സ്ട്രീം ചെയ്യാൻ ഒരുങ്ങുന്ന ഈ ചിത്രത്തിന്റെ ഒഫീഷ്യൽ ട്രൈലർ ഇപ്പോൾ റിലീസ് ചെയ്തിരിക്കുകയാണ്. തമിഴിന് പുറമേ തെലുങ്ക്, ഹിന്ദി, കന്നഡ, മലയാളം എന്നീ ഭാഷകളിലും ഈ ചിത്രം പുറത്തിറങ്ങും. അനൂപ് എസ് പണിക്കർ സംവിധാനം ചെയ്യുന്ന ഈ ചിത്രം ഒരു ഫോറൻസിക് ക്രൈം ത്രില്ലർ ചിത്രമാണ്. ചിത്രത്തിൽ ഒരു ഫോറൻസിക് ഇൻവസ്റ്റിഗേഷൻ ഓഫീസറായാണ് അമല പോൾ എത്തുന്നത്. ക്രോപ് ഹെയറും കുർത്തയും സ്പെക്സും ഒക്കെ ധരിച്ച് ഒരു മാസ് ലുക്കിലാണ് അമല ഈ ചിത്രത്തിൽ എത്തുന്നത്. തമിഴ്നാട്ടിലെ ഹെഡ് പോലീസ് സർജനായ ഡോ. ഭദ്ര എന്ന കഥാപാത്രമായാണ് അമല ചിത്രത്തിൽ വേഷമിടുന്നത്.

ഒരു കൊലയാളിയുടെ ഭീഷണി സ്വരത്തോടെയാണ് ഈ ട്രൈലർ ആരംഭിക്കുന്നത്. തുടരെ തുടരെയുള്ള കൊലപാതകങ്ങൾ, തന്റെ അസാമാന്യ ബുദ്ധി ഉപയോഗിച്ച് ഈ കൊലപാതകങ്ങളുടെ കൂടുതൽ വിവരങ്ങൾ കണ്ടെത്തുന്ന ഉദ്യോഗസ്ഥ. നല്ലൊരു ത്രില്ലർ ചിത്രമായിരിക്കും കാഡവർ എന്നത് ഈ ട്രൈലറിൽ നിന്നും വ്യക്തമാണ്. അമല പോളിനെ കൂടാതെ റിത്വിക , ഹരീഷ് ഉത്തമൻ അതുല്യ രവി , അദിത് അരുൺ , റാംദോസ് എന്നിവരും ചിത്രത്തിൽ ശ്രദ്ധേയ വേഷങ്ങളെ അവതരിപ്പിക്കുന്നു.

നടി അമല പോൾ തന്നെയാണ് ഈ ചിത്രം നിർമ്മിക്കുന്നത്. ആൻസി പോൾ , തൻസീർ സലാം എന്നിവർ ചിത്രത്തിന്റെ സഹ നിർമ്മാതാക്കൾ ആണ്. അഭിലാഷ് പിള്ളൈ ആണ് ചിത്രത്തിന്റെ രചന നിർവഹിച്ചിരിക്കുന്നത് . കബിലൻ, ശക്തി മഹേന്ദ്ര എന്നിവർ വരികൾ രചിച്ച ചിത്രത്തിലെ ഗാനങ്ങൾക്ക് ഈണം പകരുന്നത് രഞ്ജിൻ രാജ് ആണ്. അരവിന്ദ് സിംഗ് ഛായാഗ്രഹണം നിർവഹിക്കുന്ന ഈ ചിത്രത്തിന്റെ എഡിറ്റർ സാൻ ലോകേഷ് ആണ്.

എം.എസ്. രാജശേഖർ റെഡ്ഢി സംവിധാന മികവിൽ ഒരുങ്ങുന്ന പുത്തൻ തെലുങ്ക് ചിത്രമാണ് മച്ചേർല നിയോജകവർഗ്ഗം. ആഗസ്റ്റ് 12 ന് റിലീസിന് ഒരുങ്ങുന്ന ഈ ചിത്രത്തിൽ നിതിൻ, കൃതി ഷെട്ടി, കാതറിൻ എന്നിവരാണ് കേന്ദ്ര കഥാപാത്രങ്ങളായി എത്തുന്നത്. ഇപ്പോഴിതാ ഈ ചിത്രത്തിന്റെ ട്രൈലർ റിലീസ് ചെയ്തിരിക്കുകയാണ്. ആദിത്യ മ്യൂസിക് യൂട്യുബ് ചാനലിലൂടെ പ്രേക്ഷകരിലേക്ക് എത്തുന്ന ഈ വീഡിയോ പുറത്തിറങ്ങി മണിക്കൂറുകൾ തികയുമ്പോഴേക്കും ആറ് ലക്ഷത്തിലധികം കാഴ്ചക്കാരെയാണ് നേടിയത്.

മൂന്ന് മിനിട്ടോളം ദൈർഘ്യമുള്ള ഈ ട്രൈലർ വീഡിയോ കോമഡി, ആക്ഷൻ , റൊമാൻസ് , ഡാൻസ് , പവർഫുൾ ഡയലോഗുകൾ എന്നിവയെല്ലാം ഒരുപോലെ ചേർത്താണ് ഒരുക്കിയിരിക്കുന്നത് . ട്രൈലറിലെ നടൻ നിതിന്റെ പഞ്ച് ഡയലോഗുകൾ ഏറെ ശ്രദ്ധ നേടുന്നുണ്ട്. ചിത്രത്തിൽ എൻ. സിദ്ധാർത്ഥ് റെഡ്ഢി എന്ന ഐ.എ.എസ്. ഉദ്യോഗസ്ഥനായാണ് നിതിൻ വേഷമിടുന്നത്. നിതിന്റെ കരിയറിൽ ആദ്യമായാണ് ഒരു ഐ എ എസ് വേഷം. വെന്നല്ല കിഷോർ , സമുദ്രക്കനി, അഞ്ജലി എന്നിവരും ഈ ചിത്രത്തിൽ വേഷമിടുന്നുണ്ട് .

സുധാകർ റെഡ്ഢി , നിഖിത റെഡ്ഢി എന്നിവർ ചേർന്ന് നിർമ്മിക്കുന്ന ഈ ചിത്രം ശ്രേഷ്ഠ് മൂവീസിന്റെ ബാനറിൽ ആണ് ഒരുങ്ങുന്നത്. ഈ ചിത്രത്തിന്റെ വിതരണം ഏറ്റെടുത്തിരിക്കുന്നത് രാജ്കുമാർ അക്കേല ആണ് . സംവിധായകൻ എം.എസ്. രാജശേഖർ റെഡ്ഢി തന്നെ രചന നിർവഹിച്ച ഈ ചിത്രത്തിന്റെ സംഭാഷണങ്ങൾ തയ്യാറാക്കിയത് മമിഡല തിരുപതി ആണ് . പ്രസാദ് മുരെല്ല ആണ് ഈ ചിത്രത്തിന്റെ ഛായാഗ്രാഹകൻ . എഡിറ്റർ കോട്ടഗിരി വെങ്കടേശ്വര റാവു ആണ്. മഹതി സ്വർഗ്ഗ സാഗർ ആണ് ചിത്രത്തിലെ ഗാനങ്ങൾ ഒരുക്കിയിരിക്കുന്നത്.

സോഷ്യൽ മീഡിയയിൽ വൈറലായി മുന്നേറുകയാണ് പൃഥ്വിരാജ് ചിത്രം കടുവയിലെ വീഡിയോ ഗാനം. ഷാജി കൈലാസ് ഒരുക്കുന്ന ഈ ചിത്രത്തിലെ പാല പള്ളി തിരുപ്പള്ളി എന്ന വരികളോടെ തുടങ്ങുന്ന ഗാനത്തിന്റെ വീഡിയോ ആണ് ഇപ്പോൾ പുറത്തുവിട്ടിരിക്കുന്നത് . ലെറിക്കൽ വീഡിയോ പുറത്തിറങ്ങിയപ്പോൾ തന്നെ പ്രേക്ഷകരിൽ ഓളം സൃഷ്ടിച്ച ഗാനമായിരുന്നു ഇത്. ഇപ്പോഴിതാ ഗാനത്തിന്റെ വീഡിയോ പ്രേക്ഷകരിലേക്ക് എത്തിയിരിക്കുകയാണ്.

മാജിക്ക് ഫ്രെയിംസ് മ്യൂസികിന്റെ യൂട്യൂബ് ചാനലിലൂടെ പുറത്തിറങ്ങിയ ഈ ഗാനത്തിൽ പാല ഉറങ്ങാതെ കാത്തിരിക്കുന്ന പാലപ്പള്ളി പെരുന്നാളും അതിന്റെ ആഘോഷങ്ങളുമാണ് കാണിച്ചിരിക്കുന്നത് . ഒപ്പം വിവേക് ഒബ്രോയ് അവതരിപ്പിക്കുന്ന നെഗറ്റീവ് കഥാപാത്രത്തിന്റെ ക്രൂരതകളും ഈ ഗാന രംഗത്തിൽ കാണാൻ സാധിക്കും. പാട്ടിനൊപ്പം ചുവടു വയ്ക്കാൻ പ്രേക്ഷകനെ പ്രേരിപ്പിക്കുകയും ആവേശത്തിലാഴ്ത്തുകയും ചെയ്യുന്ന ഈ കിടിലൻ ഗാനം ഇപ്പോൾ സോഷ്യൽ മീഡിയ കീഴടക്കുകയാണ് .

സന്തോഷ് വർമ്മ , ശ്രീഹരി തറയിൽ എന്നിവർ ചേർന്നാണ് ഈ ഗാനത്തിന് വരികൾ രചിച്ചിരിക്കുന്നത്. ജേക്സ് ബിജോയ് ആണ് ഈ ഗാനത്തിന് ഈണം നൽകിയിരിക്കുന്നത്. ഈ ഗാനം മനോഹരമായി ആലപിച്ചിരിക്കുന്നത് അതുൽ നറുകറയാണ്. സംയുക്ത മേനോൻ , അർജുൻ അശോകൻ,സുദേവ് നായർ,വിജയ രാഘവൻ, സിദ്ദിഖ്, അജു വർഗീസ്, ദിലീഷ് പോത്തൻ, സായി കുമാർ, സീമ,കലാഭവൻ ഷാജോൺ, മീനാക്ഷി, വൃദ്ധി വിശാൽ, ജൈസ് ജോസ്, കൊച്ചു പ്രേമൻ, രാഹുൽ മാധവ്, റീന മാത്യൂസ്, സച്ചിൻ കടേക്കർ , ജനാർദ്ദനൻ, പ്രിയങ്ക നായർ, എന്നിവരും ചിത്രത്തിൽ പ്രധാന വേഷങ്ങളിൽ എത്തുന്നുണ്ട്.

അനൂപ് ബണ്ഡാരി സംവിധാനം ചെയ്ത് ജൂലൈ 28 ന് ആഗോള റിലീസ് ആയി എത്തിയ ഏറ്റവും പുതിയ കന്നഡ ചിത്രമാണ് വിക്രാന്ത് റോണ. കിച്ച സുധീപ് ആണ് ഈ ചിത്രത്തിലെ നായകനായി എത്തുന്നത്. ഈച്ച എന്ന ചിത്രത്തിലെ നെഗറ്റീവ് റോൾ ചെയ്ത് മലയാളി പ്രേക്ഷകർക്ക് സുപരിചിതനായ വ്യക്തിയാണ് കിച്ച സുധീപ്. ഈ ചിത്രത്തിന്റെ ഹിന്ദി പതിപ്പിലെ ഒരു വീഡിയോ ഗാനത്തിന്റെ ടീസർ ഇപ്പോൾ പ്രേക്ഷക ശ്രദ്ധ നേടുകയാണ് .

രാരാരാക്കമ്മാ എന്ന വരികളോടെ ആരംഭിക്കുന്ന ഈ ഹിന്ദി ഗാനത്തിന്റെ ഒരു മിനുട്ട് ദൈർഘ്യമുള്ള ഒരു ടീസർ വീഡിയോ ആണ് ഇപ്പോൾ സോഷ്യൽ മീഡിയയിൽ വൈറലാകുന്നത് . നടൻ സുധീപിനേയും ഒപ്പം നടി ജാക്വിലിൻ ഫെർനാൻഡസിനേയും ഈ ഗാന രംഗത്തിൽ കാണാൻ സാധിക്കും . ഹോട്ട് ലുക്കിൽ ആരാധകരെ ത്രസിപ്പിക്കുന്ന നൃത്തവുമായാണ് ജാക്വിലിൻ ഈ ഗാനത്തിൽ എത്തിയിട്ടുള്ളത്. ഷാബിർ അഹമ്മദ് വരികൾ രചിച്ച ഈ ഗാനം നകാഷ് അസിസ്, സുനിധി ചൗഹാൻ എന്നിവർ ചേർന്നാണ് ആലപിച്ചിരിക്കുന്നത് . ബി. അജനീഷ് ലോക്‌നാഥ് ആണ് ഈ ഗാനത്തിന് ഈണം നൽകിയിട്ടുള്ളത്.

ത്രീഡി ഫോർമാറ്റിൽ ആണ് ഈ സാഹസിക ഫാന്റസി ചിത്രം ഒരുക്കിയിട്ടുള്ളത്. ചിത്രത്തിലെ പ്രധാന കഥാപാത്രങ്ങളായി എത്തുന്നത് കിച്ച സുധീപ് , നിരൂപ് ഭണ്ഡാരി, നീത അശോക്, ജാക്വിലിൻ ഫെർനാൻഡസ് എന്നിവരാണ് . ഈ ചിത്രം നിർമ്മിച്ചിരിക്കുന്നത് ജാക്ക് മഞ്ജുനാഥ്, ശാലിനി മഞ്ജുനാഥ് എന്നിവർ ചേർന്നാണ്. വില്യം ഡേവിഡ് ആണ് ചിത്രത്തിന്റെ ഛായാഗ്രാഹകൻ . എഡിറ്റിംഗ് കൈകാര്യം ചെയ്തിരിക്കുന്നത് ആഷിഖ് ആണ്.

മലയാള സിനിമയിലെ സഹോദര നായകന്മാരായ പൃഥ്വിരാജ് സുകുമാരനും ഇന്ദ്രജിത്ത് സുകുമാരനും ഒന്നിക്കുന്ന പുത്തൻ ചിത്രമാണ് തീർപ്പ്. രതീഷ് അമ്പാട്ട് സംവിധാനം ചെയ്യുന്ന ഈ ചിത്രത്തിന്റെ ഒഫീഷ്യൽ ടീസർ ഇപ്പോൾ റിലീസ് ചെയ്തിരിക്കുകയാണ്. “വിധിതീർപ്പിലും പകതീർപ്പിലും ഒരുപോലെ കുടിയേറിയ ഇരുതലയുള്ള ആ ഒറ്റവാക്ക് തീർപ്പ് ” ചിത്രത്തിന്റെ ശ്രദ്ധേയമായ ഈ ടാഗ്‍ലൈന്‍ ഇപ്പോൾ പുറത്തിറങ്ങിയ ടീസറിലും ഉൾപ്പെടുത്തിയിട്ടുണ്ട്. 35 സെക്കന്റ് മാത്രം ദൈർഘ്യമുള്ള ഈ ടീസർ വീഡിയോ ഫ്രൈഡേ ഫിലിം ഹൗസിന്റെ യൂടൂബ് ചാനലിലൂടെയാണ് റിലീസ് ചെയ്തിരിക്കുന്നത് .

ഒരു ദുരൂഹത ഒളിപ്പിച്ചു കൊണ്ടാണ് ഈ ടീസർ രംഗം ഒരുക്കിയിരിക്കുന്നത്. ചിത്രത്തിലെ നായക വേഷം ചെയ്യുന്നത് പൃഥ്വിരാജ് സുകുമാരനാണ്. ഇന്ദ്രജിത്തും പ്രധാന വേഷത്തിൽ ചിത്രത്തിൽ എത്തുന്നുണ്ട്. ടീസർ രംഗങ്ങളിൽ ഇവരെ കൂടാതെ വിജയ് ബാബു, സൈജു കുറുപ്പ്, ഇഷാ തൽവാർ, ഹന്ന റെജി കോശി എന്നിവരെയും കാണാൻ സാധിക്കും.

മുരളി ഗോപിയാണ് ഈ ചിത്രത്തിന് രചന നിർവഹിക്കുന്നത്. കമ്മാര സംഭം എന്ന ചിത്രത്തിന് ശേഷം മുരളി ഗോപി – രതീഷ് അമ്പാട്ട് കൂട്ടുക്കെട്ടിൽ ഒരുങ്ങുന്ന ചിത്രം കൂടിയാണിത്. വിജയ് ബാബു , മുരളി ഗോപി , രതീഷ് അമ്പാട്ട് എന്നിവർ ചേർന്നാണ് ഈ ചിത്രം നിർമ്മിക്കുന്നത്. സുനിൽ കെ.എസ് ഛായാഗ്രഹണം നിർവഹിക്കുന്ന ഈ ചിത്രത്തിന്റെ എഡിറ്റിംഗ് കൈകാര്യം ചെയ്യുന്നത് ദീപു ജോസഫ് ആണ്.

ധനുഷ് നായകനായി എത്തുന്ന പുത്തൻ ചിത്രമാണ് വാത്തി. തമിഴിലും തെലുങ്കിലും ഒരേ സമയം അണിയിച്ചൊരുക്കുന്ന ഈ ചിത്രം സർ എന്ന പേരിലാണ് തെലുങ്കിൽ റിലീസ് ചെയ്യുന്നത്. വെങ്കി അട്ലൂരി സംവിധാനം ചെയ്യുന്ന ഈ ചിത്രത്തിന്റെ ടീസർ പുറത്തിറങ്ങി. ധനുഷിന്റെ ജന്മദിനത്തോടനുബന്ധിച്ചാണ് ഈ ടീസർ റിലീസ് ചെയ്തത്. സിത്താര എന്റർടൈൻമെന്റ്സിന്റെ യൂടൂബ് ചാനലിലൂടെ പുറത്തുവിട്ട ഈ ടീസർ ഇപ്പോൾ സോഷ്യൽ മീഡിയയിൽ വൈറലായി മാറുകയാണ്.

വാത്തി എന്ന ചിത്രത്തിൽ ബാല മുരുകൻ എന്ന കോളേജ അധ്യാപകനായാണ് ധനുഷ് വേഷമിടുന്നത്. വിദ്യാഭ്യാസ രംഗത്ത് വരെ ഇന്ന് അഴിമതി നടക്കുകയാണ് . അതിനെതിരെ പോരാടുന്ന ഒരു അധ്യാപകനാണ് ധനുഷ് എന്നത് ടീസറിൽ നിന്നും വ്യക്തമാണ്. ആക്ഷൻ സീനുകളുടെ ഒരു ഘോഷയാത്ര തന്നെയാണ് ഈ ടീസറിൽ കാണാൻ സാധിക്കുന്നത്. അധ്യാപകനായി ധനുഷ് തകർക്കും എന്ന പ്രതീക്ഷയിലാണ് ആരാധകർ.

ചിത്രത്തിൽ നായികയായി എത്തുന്നത് മലയാളി താരം സംയുക്ത മേനോൻ ആണ്. കൂടാതെ സായ്കുമാർ , തനിക്കെല്ല ഭരണി, സമുദ്രക്കനി, ഹൈപ്പർ ആദി, സാറ, ആടുകളം നരേൻ , നര ശ്രീനിവാസ് , പമ്മി സായ് , ഇളവരസ്, മാെട്ട രാജേന്ദ്രൻ , ഹരീഷ് പേരടി, പ്രവീണ എന്നിവരും വേഷമിടുന്നു. സിത്താര എന്റർടൈൻമെന്റ്സ്, ഫോർച്ചൂൺ ഫോർ സിനിമാസ് എന്നിവയുടെ ബാനറിൽ ഒരുക്കുന്ന ഈ ചിത്രം നിർമ്മിക്കുന്നത് നാഗവംശി എസ് – സായ് സൗജന്യ ആണ്. ജീ വി പ്രകാശ് കുമാർ ആണ് ചിത്രത്തിലെ ഗാനങ്ങൾ ഒരുക്കുന്നത്. വൈ യുവ് രാജ് ഛായാഗ്രഹണം നിർവഹിക്കുന്ന ഈ ചിത്രത്തിന്റെ എഡിറ്റിംഗ് കൈകാര്യം ചെയ്തിരിക്കുന്നത് നവീൻ നൂലി ആണ്.

ലക്ഷ് ചടലവട , വേദിക ദത്ത് എന്നിവരെ കേന്ദ്ര കഥാപാത്രങ്ങളാക്കി ഈഷൻ സൂര്യ സംവിധാനം ചെയ്യുന്ന പുത്തൻ തെലുങ്ക് ചിത്രമാണ് ഗാങ്സ്റ്റർ ഗംഗാരാജു . ഈ ചിത്രത്തിലെ പുത്തൻ വീഡിയോ ഗാനം ഇപ്പോൾ റിലീസ് ചെയ്തിരിക്കുകയാണ്. എല്ലാ എല്ലാ എന്ന വീഡിയോ ഗാനമാണ് ഇപ്പോൾ സോഷ്യൽ മീഡിയ ശ്രദ്ധ നേടുന്നത് . ഈ ഗാനത്തിന്റെ ലെറിക്കൽ വീഡിയോയും ഏറെ പ്രേക്ഷക ശ്രദ്ധ നേടിയിരിന്നു.

നായകന്റെ കിടിലൻ നൃത്ത ചുവടുകൾ ഗാനത്തിന്റെ ഭംഗി കൂട്ടുന്നുണ്ടെങ്കിലും നായികയുടെ അത്യുഗ്രൻ ഗ്ലാമറസ് വേഷവും ത്രസിപ്പിക്കുന്ന നൃത്ത ചുവടുകളുമാണ് ഗാനത്തിന്റെ ഹൈലൈറ്റായി മാറുന്നത് . ഈ ഗാനത്തിന് വരികൾ രചിച്ചിരിക്കുന്നത് മതുര കവിയും ഈണം നൽകിയിരിക്കുന്നത് സായ് കാർത്തിക്കും ആണ് . ഈ ഗാനം ആലപിച്ചിരിക്കുന്നത് ദീപക് ബ്ലൂ, ദീപ്തി സുരേഷ് എന്നിവർ ചേർന്നാണ്.

ചടലവട പത്മാവതി ആണ് ശ്രീ തിരുമല തിരുപതി വെങ്കടേശ്വേര ഫിലിംസിന്റെ ബാനറിൽ ഒരുക്കിയ ഈ ചിത്രം നിർമ്മിക്കുന്നത് . പി.സി ഖന്ന ആണ് ചിത്രത്തിന്റെ ഛായാഗ്രഹണം നിർവഹിക്കുന്നത് . അനുഗോജു രേണുക ബാബു ആണ് ഈ ചിത്രത്തിന്റെ എഡിറ്റർ. ഈ ആക്ഷൻ ചിത്രത്തിൽ ലക്ഷ് ചടലവട , വേദിക ദത്ത് എന്നിവർക്കൊപ്പം വെന്നല കിഷോർ, ശ്രീകാന്ത് അയ്യങ്കാർ ,ഗോപരാജു രമണ, ചരൺദീപ്, രാജേശ്വരി നായർ, സത്യ കൃഷ്ണൻ ,രവി തേജ , രാജേന്ദ്ര , അനു മാനസ , അന്നപൂർണ , നിഹാർ കപൂർ, ലാവണ്യ റെഡ്ഢി എന്നിവരും വേഷമിടുന്നു.

തിയറ്ററുകളിൽ പ്രേക്ഷകരെ ആവേശത്തിലാഴ്ത്തിയ തമിഴ് ആക്ഷൻ ചിത്രം വിക്രം ഇപ്പോഴും ഹൈപ്പ് ഒട്ടും കുറയാതെ പ്രേക്ഷക ഹൃദയങ്ങളിൽ കുതിച്ചു പായുകയാണ് . പ്രേക്ഷകരിൽ ഈ ചിത്രം സൃഷ്ടിച്ച ഓളം ഒന്ന് വേറെ തന്നെയാണ്. ഇപ്പോഴിതാ ചിത്രത്തിലെ വൺസ് അപ്പോൺ എ ടൈം എന്ന ഗാനം പുറത്തുവിട്ടിരിക്കുകയാണ്. ചിത്രത്തിന്റെ ക്ലൈമാക്സ് രംഗത്തിൽ ഒരുക്കിയിരിക്കുന്ന ഈ ഗാനം ഇപ്പോൾ സോഷ്യൽ മീഡിയയിൽ വൈറലായി മാറുകയാണ് . ഹെയ്സൻ ബെർഗ് വരികൾ രചിച്ച് അനിരുദ്ധ് രവിചന്ദർ ഈണം പകർന്ന ഈ ഗാനം ആലപിച്ചിരിക്കുന്നതും അദ്ദേഹം തന്നെയാണ്.

നടൻ കമൽ ഹാസന്റെ അത്യുഗ്രൻ വെടി വെയ്പ്പ് രംഗങ്ങളാണ് ഈ ഗാന രംഗത്തിൽ കാണാൻ സാധിക്കുന്നത് . രണ്ടര മിനുട്ടോളം ദൈർഘ്യമുള്ള ഈ വീഡിയോ ഗാനം ആരാധകരെ കോരിത്തരിപ്പിക്കുന്ന ഒന്ന് തന്നെയാണ് . ഈ ഗാന രംഗത്തിലെ നടൻ ഫഹദ് ഫാസിലിന്റെ അഭിനയ മികവും എടുത്തു പറയേണ്ടതാണ് . നിരവധി ആരാധകരാണ് വീഡിയോയ്ക്ക് താഴെ കമന്റുകൾ നൽകിയിരിക്കുന്നത്.

ലോകേഷ് കനകരാജ് സംവിധാനം മികവിൽ പുറത്തിറങ്ങിയ ഈ സൂപ്പർ ഹിറ്റ് ആക്ഷൻ ത്രില്ലർ ചിത്രം തിയറ്ററുകളിൽ പ്രദർശനത്തിന് എത്തിയത് ജൂൺ മൂന്നിന് ആണ് . ജൂലൈ 8 മുതൽ ഡിസ്നി പ്ലസ് ഹോട്ട്സ്റ്റാറിലും സ്ട്രീമിങ് ആരംഭിച്ചു. ഈ ചിത്രം നിർമ്മിച്ചത് രാജ് കമൽ ഇന്റർനാഷ്ണലിന്റെ ബാനറിൽ നടൻ കമൽ ഹാസൻ തന്നെ ആയിരുന്നു . ചിത്രത്തിലെ ആക്ഷൻ രംഗങ്ങൾക്ക് പിന്നിൽ പ്രവർത്തിച്ചിരിക്കുന്നത് അൻബറിവാണ്. അനിരുദ്ധ് രവിചന്ദറിന്റെ മറ്റൊരു കിടിലൻ പ്രകടനമാണ് വിക്രമിലെ ഗാനങ്ങളിലൂടെ കാണാൻ സാധിച്ചത്.

അനുരാഗ് കശ്യപ് സംവിധാനം ചെയ്യുന്ന പുത്തൻ ഹിന്ദി ചിത്രമാണ് ദോബാര . തപ്സി പന്നു , പവയിൽ ഗുലാത്തി എന്നിവർ കേന്ദ്ര കഥാപാത്രങ്ങളായി എത്തുന്ന ഈ ചിത്രത്തിന്റെ ഒഫീഷ്യൽ ട്രൈലർ ഇപ്പോൾ സോഷ്യൽ മീഡിയ ശ്രദ്ധ നേടുകയാണ്. ഒരു മിസ്റ്റീരിയസ് ത്രില്ലർ ചിത്രമായി ഒരുക്കിയിരിക്കുന്ന ദോബാര 2018 ൽ പുറത്തിറങ്ങിയ മിറാജ് എന്ന സ്പാനിഷ് ചിത്രത്തിന്റെ റീമേക്ക് ആണ് . തപ്സിയുടെ അതി ഗംഭീര പ്രകടനം തന്നെയാണ് ഈ ട്രൈലർ വീഡിയോയിൽ കാണാൻ സാധിക്കുന്നത്. തപ്സിയും കുടുംബവും പുതിയൊരു വീട്ടിലേക്ക് എത്തുന്നു.

26 വർഷങ്ങൾക്ക് മുൻപ് അവിടെ സംഭവിച്ച ഒരു മരണവും അതിനു പിന്നിലെ രഹസ്യവും തപ്‌സിയെ വേട്ടയാടൻ തുടങ്ങുന്നു. ആ ചുരുളഴിയാത്ത രഹസ്യത്തിന് പിന്നാലെ അതു കണ്ടെത്താൻ ശ്രമിക്കുന്ന തപ്സിയുടെ കഥാപാത്രത്തെയാണ് ഈ ട്രൈലറിൽ കാണാൻ സാധിക്കുന്നത്.

ഓഗസ്റ്റ് 19 ന് പ്രദർശനത്തിന് ഒരുക്കുന്ന ഈ ചിത്രം നിർമ്മിച്ചിരിക്കുന്നത് ശോഭാ കപൂർ , എക്താ ആർ കപൂർ, സുനിർ ഖേതർപാൽ , ഗൗരവ് ബോസ് എന്നിവർ ചേർന്നാണ്. നിഹിത് ഭാവേ ആണ് ചിത്രത്തിന്റെ രചന നിർവഹിച്ചിരിക്കുന്നത്. ഈ ചിത്രം ജൂൺ 23 ന് ലണ്ടൻ ഇന്ത്യൻ ഫിലിം ഫെസ്റ്റിവല്ലിൽ പ്രദർശിപ്പിച്ചിരുന്നു. സിൽവസ്റ്റർ ഫൊൻസെക്ക ആണ് ചിത്രത്തിന്റെ ഛായാഗ്രഹണം നിർവഹിക്കുന്നത്. തപ്സി പന്നു , പവയിൽ ഗുലാത്തി എന്നിവരോടൊപ്പം നാസർ, രാഹുൽ ഭട്ട് എന്നിവരും പ്രധാന വേഷങ്ങളിൽ എത്തുന്നു.