Movie Updates

ജൂലൈ 29 ന് തിയറ്ററുകളിൽ പ്രദർശനത്തിന് എത്തിയ ആക്ഷൻ ഹീറോ സുരേഷ് ഗോപി ചിത്രമാണ് പാപ്പൻ. ജോഷിയുടെ സംവിധാന മികവിൽ ഒരുങ്ങിയ ഈ ചിത്രം ഇപ്പോൾ ഗംഭീര വിജയം കാഴ്ച വച്ച് മുന്നേറുകയാണ്. സുരേഷ് ഗോപി എന്ന മികച്ച നടന്റെ ഗംഭീര തിരിച്ചു വരവ് തന്നെയാണ് ഈ ചിത്രത്തിലൂടെ കാണാൻ സാധിച്ചത്. വാരാന്ത്യത്തിൽ 13 കോടിയ്ക്ക് മുകളിൽ ബോക്സ് ഓഫീസ് കളക്ഷൻ നേടി മുന്നേറുന്ന ഈ ചിത്രത്തിന്റെ ഒരു സക്സസ് ടീസർ ഇപ്പോൾ പുറത്തുവിട്ടിരിക്കുകയാണ്. നടൻ ഷമ്മി തിലകൻ , നടി നീത പിള്ളൈ എന്നിവരുടെ കിടിലൻ പെർഫോമൻസ് ആണ് ഈ ടീസറിൽ കാണാൻ സാധിക്കുന്നത്. സൈന മൂവീസ് എന്ന യൂട്യൂബ് ചാനലിലൂടെയാണ് 30 സെക്കന്റ് മാത്രം ദൈർഘ്യമുള്ള പാപ്പന്റെ സക്സസ് ടീസർ പുറത്തുവിട്ടത് . ഒട്ടേറെ കാഴ്ചക്കാരെ നേടി മുന്നേറുന്ന ഈ വീഡിയോയ്ക്ക് താഴെ ചിത്രത്തെ കുറിച്ചുള്ള മികച്ച കമന്റുകളും നിറയുന്നുണ്ട്.

ഈ ക്രൈം ത്രില്ലർ ഡ്രാമ ചിത്രത്തിൽ ചുരുളഴിയാത്ത കൊലപാതകങ്ങളും അതേ തുടർന്നുള്ള അന്വേഷണവും എല്ലാം ആണ് ചിത്രീകരിച്ചിരിക്കുന്നത് . ചിത്രത്തിൽ സുരേഷ് ഗോപി എബ്രഹാം മാത്യു മാത്തൻ എന്ന പോലീസ് ഉദ്യോഗസ്ഥനായാണ് വേഷമിടുന്നത്. ആർ.ജെ ഷാൻ ആണ് ചിത്രത്തിന്റെ രചന നിർവഹിച്ചിരിക്കുന്നത്. ഈ ചിത്രത്തിൽ ഗോകുൽ സുരേഷ് , വിജയരാഘവൻ , നൈല ഉഷ, കനിഹ, ആശ ശരത്ത്, ചന്ദുനാഥ് , ടിനി ടോം, ജനാർദ്ദനൻ , രാഹുൽ മാധവ് , മാല പാർവതി, ശ്രീജിത്ത് രവി എന്നിവരും ശ്രദ്ധേയ വേഷങ്ങൾ കൈകാര്യം ചെയ്യുന്നുണ്ട്.

ശ്രീ ഗോകുലം ഗോപാലൻ, ഡേവിഡ് കാച്ചാപ്പിളളി , റാഫി മധീര എന്നിവരാണ് ഈ ചിത്രത്തിന്റെ നിർമ്മാതാക്കൾ . ഈ ചിത്രത്തിലെ ഗാനങ്ങൾ ഒരുക്കിയിരിക്കുന്നത് ജേക്സ് ബിജോയ് ആണ് . അജയ് ഡേവിഡ് കച്ചാപ്പിള്ളി ക്യാമറ കൈകാര്യം ചെയ്ത ഈ ചിത്രം എഡിറ്റ് ചെയ്തിരിക്കുന്നത് ശ്യാം ശശിധരൻ ആണ്.

ബിജു മേനോൻ , റോഷൻ മാത്യു, പത്മപ്രിയ, നിമിഷ സജയൻ എന്നിവർ കേന്ദ്ര കഥാപാത്രങ്ങളായി എത്തുന്ന പുത്തൻ ചിത്രമാണ് ഒരു തെക്കൻ തല്ല് കേസ്. ശ്രീജിത്ത് എൻ സംവിധാനം ചെയ്യുന്ന ഈ ചിത്രം എൺപതുകളിലെ കഥയാണ് പറയുന്നത് . പഴയ കാല വേഷവിധാനവും സംസാര ശൈലിയുമായി ഇറങ്ങിയ ഇ ചിത്രത്തിന്റെ ടീസർ വളരെയധികം ശ്രദ്ധ നേടിയിരുന്നു. ഇപ്പോഴിതാ E4 എന്റർടൈൻമെന്റിന്റെ യൂട്യൂബ് ചാനലിലൂടെ ചിത്രത്തിലെ ഒരു വീഡിയോ ഗാനം റിലീസ് ചെയ്തിരിക്കുകയാണ്. യെന്തര് എന്ന വരികളോടെ തുടങ്ങുന്ന ഈ ഗാനത്തിൽ റോഷൻ മാത്യുവും നിമിഷ സജയനുമാണ് അഭിനയിചിരിക്കുന്നത്. അതി മനോഹരമായ ഈ ഗാനത്തിൽ ഇരുവരും തമ്മിലുള്ള പ്രണയ രംഗങ്ങളാണ് കാണാൻ സാധിക്കുന്നത്.

എൺപതുകളിലെ വേഷവിധാനവും ഗ്രാമ ഭംഗിയുമെല്ലാം ഈ ഗാനത്തിൽ കാണാൻ സാധിക്കും. വീഡിയോ ദൃശ്യങ്ങൾ മാത്രമല്ല ഈ ഗാനവും പഴയ കാല സിനിമ ഗാനങ്ങളെ ഓർമ്മപ്പെടുത്തുന്നു . നിമിഷയുടേയും റോഷന്റെയും കിടിലൻ പ്രകടനം തന്നെയാണ് ഈ വീഡിയോ ഗാനത്തിൽ കാണാൻ സാധിക്കുന്നത്.

അൻവർ അലി വരികൾ രചിച്ച ഈ ഗാനത്തിന് ഈണം പകർന്നിരിക്കുന്നത് ജസ്റ്റിൻ വർഗ്ഗീസ് ആണ്. ഹിംന ഹിലരി , ജസ്റ്റിൻ വർഗ്ഗീസ് എന്നിവർ ചേർന്നാണ് ഈ ചിത്രം നിർമ്മിച്ചിരിക്കുന്നത്. ജി.ആർ ഇന്ദുഗോപൻ രചിച്ച അമ്മിണിപ്പിള്ള വെട്ടുക്കേസ് എന്ന കഥയെ ആസ്പതമാക്കിയാണ് രാജേഷ് പിന്നാടൻ ഈ ചിത്രം രചിച്ചിരിക്കുന്നത്. അമ്മിണിപ്പിള്ള എന്ന കഥാപാത്രത്തെയാണ് ബിജു മേനോൻ ഈ ചിത്രത്തിൽ അവതരിപ്പിക്കുന്നത്. വർഷങ്ങൾക്ക് ശേഷം നടി പത്മപ്രിയ നായിക വേഷത്തിൽ തിരിച്ചെത്തുന്ന ചിത്രം കൂടിയാണിത് . അഖിൽ കവലയൂർ, അശ്വത് ലാൽ , അസീസ് നെടുമങ്ങാട്, രെജു ശിവദാസ് , അരുൺ , പ്രമോദ് വെളിയനാട്, അച്ചുതാനന്ദൻ , ശശി വാളൂരൻ ,പ്രശാന്ത് മുരളി, നീരജ രാജേന്ദ്രൻ , ജയരാജ് എന്നിവരും ഈ ചിത്രത്തിന്റെ ഭാഗമാകുന്നുണ്ട്.

മുകേഷ് ആർ മേത്ത , സുനിൽ എ.കെ, സി വി സാരതി എന്നിവരാണ് ചിത്രത്തിന്റെ നിർമ്മാതാക്കൾ . ചിത്രത്തിലെ സംഘട്ടന രംഗങ്ങൾ ഒരുക്കിയിരിക്കുന്നത് സുന്ദർ , മാഫിയ ശശി എന്നിവർ ചേർന്നാണ്. മധു നീലകണ്ഠൻ ക്യാമറ ചലിപ്പിച്ച ഈ ചിത്രത്തിന്റെ എഡിറ്റർ മനോജ് കണ്ണോത്ത് ആണ് .

ജൂലൈ 21 ന് ആഗോള തലത്തിൽ പ്രദർശനത്തിന് എത്തിയ നിവിൻ പോളി ചിത്രമാണ് മഹാവീര്യർ . ആദ്യ ദിനം തന്നെ ഗംഭീര വിജയം കാഴ്ചവച്ച ഈ ചിത്രം ഒരുക്കിയിരിക്കുന്നത് എബ്രിഡ് ഷൈൻ ആണ്. നിവിൻ പോളിയെ കൂടാതെ ആസിഫ് അലിയും ചിത്രത്തിൽ ഒരു പ്രധാന വേഷം കൈകാര്യം ചെയ്യുന്നുണ്ട്. ഈ ചിത്രത്തിലെ പുതിയൊരു വീഡിയോ ഗാനം ഇപ്പോൾ പുറത്തുവിട്ടിരിക്കുകയാണ്. അനുരാഗ മനം എന്ന ഈ വീഡിയോ ഗാനത്തിൽ ആസിഫ് അലിയെയും നായിക ഷാൻവി ശ്രീ വാസ്തവയേയും ആണ് കാണാൻ സാധിക്കുന്നത്.

അതിമനോഹരമായ ഈ പ്രണയ ഗാനം ഇപ്പോൾ പ്രേക്ഷക ശ്രദ്ധ നേടുകയാണ്. ഇതിന് മുൻപ് പുറത്തിറങ്ങിയ വരാനാവില്ലേ എന്ന ഗാനവും ഏറെ ശ്രദ്ധ നേടിയെടുത്തിരുന്നു. ബി.കെ ഹരി നാരായണൻ വരികൾ രചിച്ച ഈ ഗാനത്തിന് ഇഷാൻ ചാമ്പ്ര ആണ് ഈണം പകർന്നിരിക്കുന്നത്. അൻവേഷാ, കാർത്തിക് എന്നിവർ ചേർന്നാണ് ഈ ഗാനം ആലപിച്ചിരിക്കുന്നത്.

മഹാവീര്യർ എന്ന ചിത്രത്തിന്റെ പ്രധാന ഇതിവൃത്തം ട്രൈം ട്രാവലറും ഫാന്റസിയും ആണ് . കൂടാതെ നിരവധി നർമ്മ രംഗങ്ങളും വൈകാരിക നിമിഷങ്ങളും കൂടി ഈ ചിത്രത്തിൽ ഉൾപ്പെടുത്തിയിട്ടുണ്ട് . ഈ ചിത്രത്തിൽ ലാൽ , സിദ്ദിഖ്, ലാലു അലക്സ് , മല്ലിക സുകുമാരൻ , മേജർ രവി , സുധീർ കരമന എന്നിവരും വേഷമിടുന്നുണ്ട്. നിവിൻ പോളി , പി.എസ് ഷംനാസ് , എബ്രിഡ് ഷൈൻ എന്നിവരാണ് പോളി ജൂനിയർ ഫിലിംസിന്റെ ബാനറിൽ ഒരുക്കിയ ഈ ചിത്രം നിർമ്മിച്ചിരിക്കുന്നത് ചേർന്നാണ്. എം. മുകുന്ദൻ ആണ് ഈ ചിത്രത്തിന്റെ കഥ ഒരുക്കിയിരിക്കുന്നത് . ചന്ദ്രു സെൽവരാജ് ക്യാമറ ചലിപ്പിച്ച ഈ ചിത്രം എഡിറ്റ് ചെയ്തിരിക്കുന്നത് മനോജ് ആണ്.

കുഞ്ചാക്കോ ബോബനെ നായകനാക്കി രതീഷ് ബാലകൃഷ്ണൻ പൊതുവാൾ ഒരുക്കുന്ന പുത്തൻ ചിത്രമാണ് “ന്നാ താൻ കേസ് കൊട് ” . വളരെ വ്യത്യസ്തമാർന്ന ലുക്കിൽ ചാക്കോച്ചൻ എത്തുന്ന ഈ ചിത്രത്തിലെ ടീസറും താരത്തിന്റെ ഒരു വീഡിയോ ഗാനവും എല്ലാം വളരെയധികം ശ്രദ്ധ നേടിയിരുന്നു. ഇപ്പോഴിതാ ചിത്രത്തിന്റെ ഒരു ട്രൈലർ റിലീസ് ചെയ്തിരിക്കുകയാണ് . ആക്ഷേപ ഹാസ്യത്തിന് മുൻഗണന നൽകിയാണ് ചിത്രം ഒരുക്കിയിരിക്കുന്നതെന്ന് ട്രൈലറിൽ നിന്നും മനസ്സിലാക്കാം.

ട്രൈലറിൽ ഉടനീളം കോടതിയും കോടതിയിൽ കേസ് നൽകിയ ചാക്കോച്ചനെയുമാണ് കാണാൻ സാധിക്കുന്നത്. റോഡിലെ കുണ്ടും കുഴിയും കാരണം തനിക്കുണ്ടായ പ്രശ്നവും അതിന്റെ മൂല കാരണം മന്ത്രിയുമാണെന്ന് പറയുന്ന രംഗങ്ങൾ ട്രൈലർ കാണാം. കേസ് നൽകിയ ചാക്കോച്ചന്റെ കഥാപാത്രത്തെ ഒട്ടേറെപ്പേർ ചേർന്ന് ആക്രമിക്കുന്ന രംഗങ്ങളും ഈ ട്രൈലറിൽ ഉൾപെടുത്തിയിട്ടുണ്ട്. രസകരമായ സംഭാഷണ ശൈലിയും ഹാസ്യവും ആണ് ഈ ട്രൈലറിന്റെ ഹൈലൈറ്റ് . ചാക്കോച്ചന്റെ അഭിനയവും എടുത്തു പറയേണ്ടതാണ്.

പ്രേക്ഷകർ ചിത്രത്തിനായി ആകാംഷയോടെ കാത്തിരിക്കുകയാണ്. സംവിധായകൻ രതീഷ് ബാലകൃഷ്ണൻ പൊതുവാൾ തന്നെയാണ് ഈ ചിത്രത്തിന്റെ രചന നിർവ്വഹിച്ചിരിക്കുന്നത് . സന്തോഷ് ടി കുരുവിള ആണ് ചിത്രത്തിന്റെ നിർമ്മാതാവ് . നായകൻ കുഞ്ചാക്കോ ബോബനും ഷെറിൻ റേച്ചൽ സന്തോഷും ഈ ചിത്രത്തിന്റെ സഹ നിർമ്മാതക്കളാണ് . രാകേഷ് ഹരിദാസ് ഛായാഗ്രഹണം നിരവഹിച്ച ഈ ചിത്രത്തിന്റെ എഡിറ്റിംഗ് കൈകാര്യം ചെയ്തിരിക്കുന്നത് മനോജ് കണ്ണോത്ത് ആണ് .

രതീഷ് അമ്പാട്ട് സംവിധാനം ചെയ്ത് മലയാള സിനിമയിലെ സഹോദര നായകന്മാരായ പൃഥ്വിരാജ് സുകുമാരനും ഇന്ദ്രജിത്ത് സുകുമാരനും ഒന്നിക്കുന്ന ഏറ്റവും പുതിയ ചിത്രമാണ് തീർപ്പ്. ഈ ചിത്രത്തിന്റെ രണ്ടാം ടീസർ ഇപ്പോൾ റിലീസ് ചെയ്തിരിക്കുകയാണ്. ചിത്രത്തിന്റെ ടാഗ്‍ലൈന്‍ ആയിരുന്നു ആദ്യ ടീസറിന്റെ ഹൈലൈറ്റ്. മാത്രമല്ല ചിത്രത്തിലെ കേന്ദ്ര കഥാപാത്രങ്ങളെ എല്ലാം തന്നെ ഈ ടീസറിൽ ഉൾപ്പെടുത്തിയിരിന്നു.

ഫ്രൈഡേ ഫിലിം ഹൗസിന്റെ യൂടൂബ് ചാനലിലൂടെ റിലീസ് ചെയ്തിരിക്കുന്ന രണ്ടാം ടീസറിൽ പൃഥ്വിരാജ്, വിജയ് ബാബു , ഇന്ദ്രജിത്ത്, സൈജു കുറുപ്പ് എന്നിവരെ കാണാൻ സാധിക്കും . “നിനക്ക് ഞാൻ ഒരു ചാൻസ് കൂടി താരം ഹെഡ് ഓർ ടെയിൽ ” എന്ന പൃഥ്വിരാജിന്റെ ഡയലോഗോടു കൂടിയാണ് ടീസർ ആരംഭിക്കുന്നത് . ടീസറിൽ ഇവരുടെ ബാല്യ കാലവും കാണിക്കുന്നുണ്ട്.

പൃഥ്വിരാജ് സുകുമാരനാണ് ചിത്രത്തിലെ നായക വേഷം ചെയ്യുന്നത് . ഇന്ദ്രജിത്തും ശ്രദ്ധേയമായ ഒരു വേഷം തന്നെ ചിത്രത്തിൽ കൈകാര്യം ചെയ്യുന്നുണ്ട്. ഇവരെ കൂടാതെ ഇഷാ തൽവാർ, ഹന്ന റെജി കോശി എന്നിവരും ചിത്രത്തിൽ വേഷമിടുന്നുണ്ട്. ഈ ചിത്രത്തിന്റെ രചന നിർവഹിക്കുന്നത് മുരളി ഗോപിയാണ് . മുരളി ഗോപി – രതീഷ് അമ്പാട്ട് കൂട്ടുക്കെട്ടിൽ ഒരുക്കിയ കമ്മാര സംഭം എന്ന ചിത്രത്തിന് ശേഷം ഇരുവരും ഒന്നിക്കുന്ന ചിത്രമാണിത്. വിജയ് ബാബു , മുരളി ഗോപി , രതീഷ് അമ്പാട്ട് എന്നിവരാണ് ഈ ചിത്രത്തിന്റെ നിർമ്മാതാക്കൾ . സുനിൽ കെ.എസ് കാമറ കൈകാര്യം ചെയ്യുന്ന ഈ ചിത്രത്തിന്റെ എഡിറ്റർ ദീപു ജോസഫ് ആണ്.

സോഷ്യൽ മീഡിയയിലെ വൈറൽ സ്റ്റാർ ആണ് മലയാള സിനിമയിലെ ശ്രദ്ധേയ നടനും പ്രശസ്ത സംവിധായകനും രചയിതാവുമായ ധ്യാൻ ശ്രീനിവാസൻ . പല അഭിമുഖങ്ങളിലും ധ്യാൻ ശ്രീനിവാസൻ നൽകുന്ന സരസമായ മറുപടികളും അദ്ദേഹത്തിന്റെ സംസാര രീതിയും എല്ലാം സോഷ്യൽ മീഡിയയിൽ സൂപ്പർ ഹിറ്റാവുന്നത് നിമിഷങ്ങൾകകം ആണ്. ഇപ്പോഴിതാ പുതിയ പ്രസ് മീറ്റിൽ ധ്യാൻ കാഴ്ചവച്ച ഒരു ഡാൻസ് വീഡിയോ ആണ് സോഷ്യൽ മീഡിയയിൽ വൈറലായി മാറുന്നത്. കഴിഞ്ഞ ദിവസമാണ് ധ്യാന്‍ ശ്രീനിവാസന്‍, ഗോകുല്‍ സുരേഷ്, അജു വര്‍ഗീസ്, ഇന്ദ്രന്‍സ് എന്നിവർ കേന്ദ്ര കഥാപാത്രങ്ങളായി എത്തിയ സായാഹ്‌ന വാർത്തകൾ എന്ന ചിത്രം തീയേറ്ററുകളിൽ എത്തിയത് .

അരുണ്‍ ചന്ദു സംവിധാനം ചെയ്ത ഈ ചിത്രം ഡി4 എന്റര്‍ടൈന്‍മെന്റ്‌സിന്റെ ബാനറില്‍ ആണ് ഒരുക്കിയത്. ഈ ചിത്രത്തിന്റെ പ്രമോഷന്റെ ഭാഗമായി നടന്ന പ്രസ് മീറ്റിനു ശേഷം മാധ്യമ പ്രവർത്തകർക്കൊപ്പം നടൻ ധ്യാൻ ഡാൻസ് ചെയ്യുന്ന വീഡിയോയാണ് ഇപ്പോൾ സോഷ്യൽ മീഡിയ കീഴടക്കിയിരിക്കുന്നത്.

കുഞ്ചാക്കോ ബോബന്റെ പുതിയ ചിത്രത്തിൽ പുനരാവിഷ്കരിച്ച ദേവദൂതർ പാടി എന്ന ഗാനത്തിലെ അദ്ദേഹത്തിന്റെ നൃത്തം ട്രെൻഡിംഗ് ആയിരുന്നു. ആ പെർഫോമൻസ് ആണ് ധ്യാൻ ശ്രീനിവാസൻ അനുകരിച്ചത്. പ്രശസ്ത മാധ്യമ പ്രവർത്തകൻ ഹൈദരലിയും ധ്യാൻ ശ്രീനിവാസനൊപ്പം ഈ നൃത്തത്തിൽ പങ്കു ചേർന്നു. ന്നാ താൻ കേസ് കൊട് എന്ന ചിത്രത്തിലാണ് കുഞ്ചാക്കോ ബോബൻ ഈ ഡാൻസ് പെർഫോമൻസ് കാഴ്ച വച്ചത്. ഭരതന്‍ സംവിധാനം ചെയ്ത് 1985ല്‍ പുറത്തിറങ്ങിയ കാതോട് കാതോരം എന്ന ചിത്രത്തിലെതാണ് ദേവദൂതർ പാടി എന്ന ഗാനം. കുഞ്ചാക്കോ ബോബന്റെ ഈ ഡാൻസ് പെർഫോമൻസ് അനുകരിച്ച് നടൻ ദുൽഖർ സൽമാനുൾപ്പെടെയുള്ളവർ മുന്നോട്ടു വന്നിരുന്നു. ഓഗസ്റ്റ് പതിനൊന്നിന് റിലീസിന് ഒരുങ്ങുന്ന ഈ ചിത്രം രതീഷ് ബാലകൃഷ്ണ പൊതുവാള്‍ ആണ് സംവിധാനം ചെയ്യുന്നത്.

ജോജു ജോർജിനെ നായകനാക്കി ലാൽ ജോസ് സംവിധാനം ചെയ്യുന്ന പുത്തൻ ചിത്രമാണ് സോളമന്റെ തേനീച്ചകൾ . ഈ ചിത്രത്തിലെ ഒരു വീഡിയോ ഗാനം ഇപ്പോൾ റിലീസ് ചെയ്തിരിക്കുകയാണ്. മനോരമ മ്യൂസിക് സോങ്സിന്റെ യൂട്യൂബ് ചാനലിലൂടെ പുറത്തിറങ്ങിയ പഞ്ചാരയ്ക്കോ എന്ന വരികളോടെ തുടങ്ങുന്ന ഈ ഗാനം ഇപ്പോൾ സോഷ്യൽ മീഡിയ ശ്രദ്ധ നേടുകയാണ്. നടി വിൻസി അലോഷ്യസ് , നായിക നായകൻ എന്ന പ്രോഗ്രാമിന്റെ വിന്നറായ ദർശന എസ് നായർ എന്നിവരാണ് ഈ ഗാന രംഗത്തിൽ അഭിനയിച്ചിരിക്കുന്നത് . പഴയകാല ഗാനങ്ങളെ ഓർമ്മപ്പെടുത്തുന്ന ഒരു അതി മനോഹര ഗാനമാണിത്. വയലാർ ശരത്ചന്ദ്രവർമ്മ വരികൾ രചിച്ച ഈ ഗാനത്തിന് ഈണം നൽകിയിരിക്കുന്നത് വിദ്യാസാഗറാണ്. ആതിര സുജിത്ത് , റീന മുരളി എന്നിവർ ചേർന്നാണ് ഈ ഗാനം ആലപിച്ചിരിക്കുന്നത് .

ഒരു റൊമാന്റിക് ത്രില്ലർ ചിത്രമായ സോളമന്റെ തേനീച്ചകളിൽ സോളമൻ എന്ന കഥാപാത്രമായാണ് ജോജു വേഷമിടുന്നത് . നേരത്തെ തന്നെ റിലീസ് ചെയ്ത ചിത്രത്തിന്റെ ക്യാരക്ടർ പോസ്റ്ററും ടീസറും ഏറെ ശ്രദ്ധ നേടിയിരുന്നു . ഇപ്പോൾ ഈ ഗാനവും പ്രേക്ഷകർ ഏറ്റെടുത്തിരിക്കുകയാണ് . നിരവധി പ്രേക്ഷകരാണ് വീഡിയോയ്ക്ക് താഴെ അഭിപ്രായങ്ങൾ നൽകിയിരിക്കുന്നത്. ഈ ചിത്രം തിയറ്ററുകളിൽ പ്രദർശനത്തിന് എത്തുന്നത് ആഗസ്റ്റ് 18 ന് ആണ് . വീണ്ടുമൊരു ലാൽ ജോസ് മാജിക് തിയറ്ററുകളിൽ കാണാം എന്ന പ്രതീക്ഷയിലാണ് ആരാധകർ.

ജോണി അന്തോണി , ശംഭു മേനോൻ , ആഡിസ് ആന്റണി, മണികണ്ഠൻ, ഷാജു ശ്രീധർ എന്നിവരും ചിത്രത്തിൽ പ്രധാന വേഷങ്ങളെ അവതരിപ്പിക്കുന്നുണ്ട്. ചിത്രത്തിന്റെ രചന നിർവ്വഹിച്ചിരിക്കുന്നത് പി.ജി പ്രഗീഷ് ആണ് . ഈ ചിത്രം നിർമ്മിക്കുന്നത് എൽ ജെ ഫിലിംസ് ആണ് . അജ്മൽ സാബു ആണ് ചിത്രത്തിന്റെ ഛായാഗ്രാഹകൻ . എഡിറ്റിംഗ് കൈകാര്യം ചെയ്യുന്നത് രഞ്ജൻ എബ്രഹാം ആണ്.

ലെസ്ബിയൻ പ്രണയം പ്രമേയമാക്കി ഒരുക്കുന്ന പുത്തൻ ചിത്രമാണ് ‘ഹോളി വൂണ്ട് . ഈ ചിത്രത്തിന്റെ ട്രെയിലർ ഇപ്പോൾ റിലീസ് ചെയ്തിരിക്കുകയാണ് . ഓ​ഗസ്റ്റ് 12ന് പ്രദർശനത്തിന് എത്താൻ ഒരുങ്ങുന്ന ഈ ചിത്രം അശോക് ആർ നാഥ് ആണ് സംവിധാനം ചെയ്യുന്നത്. ചിത്രം റിലീസ് ചെയ്യുന്നത് എസ് എസ് ഫ്രെയിംസ് ഒടിടിയിലൂടെയാണ്. സന്ദീപ് ആർ നിർമ്മിക്കുന്ന ഈ ചിത്രം സഹസ്രാര സിനിമാസിന്റെ ബാനറിൽ ആണ് ഒരുങ്ങുന്നത്. ട്രെയിലർ നൽകുന്ന സൂചന ഈ ചിത്രം സ്വവര്‍ഗ ലൈംഗികതയെ കുറിച്ച് ശക്തമായി പ്രതിപാദിക്കുന്ന സിനിമയെന്നാണ് .

മോഡലും ബിഗ്ബോസ് സീസൺ ഫോർ മത്സരാർത്ഥിയുമായിരുന്ന ജാനകി സുധീർ ആണ് ചിത്രത്തിൽ കേന്ദ്രകഥാപാത്രത്തെ അവതരിപ്പിക്കുന്നത് . കൂടാതെ ചിത്രത്തിൽ അമൃത, സാബു പ്രൗദീൻ എന്നിവരും മറ്റ് വേഷങ്ങൾ കൈകാര്യം ചെയ്യുന്നു. ഹോളി വൂണ്ട്’ എന്ന ചിത്രം പറയുന്ന കഥ , ബാല്യകാലം മുതൽ പ്രണയിക്കുന്ന രണ്ടു പെൺകുട്ടികൾ, വർഷങ്ങൾക്ക് ശേഷം ഇരുവരും വീണ്ടും കണ്ടുമുട്ടുമ്പോൾ ഉണ്ടാകുന്ന വൈകാരിക മുഹൂർത്തങ്ങളാണ്.

ഈ ചിത്രം ഒരു ഓർമപ്പെടുത്തൽ കൂടിയാണ് അതിതീവ്രമായ പ്രണയത്തിന് ലിംഗവ്യത്യാസം തടസ്സമാകുന്നില്ലെന്ന ഓർമപ്പെടുത്തൽ . ഇന്നേവരെ മലയാള സിനിമ ചരിത്രത്തിൽ , സിനിമ ചിത്രീകരിക്കാത്ത രീതിയിലാണ് രണ്ടു പെൺകുട്ടികൾ തമ്മിലുള്ള പ്രണയരംഗങ്ങൾ ഈ സിനിമയിൽ സംവിധായകൻ ചിത്രീകരിച്ചിരിക്കുന്നത്. ലെസ്ബിയൻ പ്രണയങ്ങൾ കഥാ ഭാഗത്ത് ഉൾപ്പെടുത്തിയിട്ടുള്ള മലയാള സിനിമകൾ മുൻപ് ഉണ്ടായിട്ടുണ്ട് എങ്കിലും ഇത്രയും തീവ്രമായ രീതിയിൽ അവതരിപ്പിച്ചിരുന്നില്ല.

മരക്കാർ അറബികടലിന്റെ സിംഹം എന്ന ബ്രഹ്മാണ്ഡ ചിത്രത്തിന് സംഗീതം ഒരുക്കിയ റോണി റാഫേലാണ് ഈ ചിത്രത്തിന് സംഗീതം നൽകിയിരിക്കുന്നത്. പോള്‍ വിക്ലിഫ് ആണ് ചിത്രത്തിന്റെ തിരക്കഥ ഒരുക്കിയിരിക്കുന്നത്. ഉണ്ണി മടവൂരാണ് ഛായാഗ്രാഹകൻ . എഡിറ്റിങ് കൈകാര്യം ചെയ്തിരിക്കുന്നത് വിപിൻ മണ്ണൂർ ആണ്. ചീഫ് അസോഷ്യേറ്റ് ഡയറക്ടർ – ജിനി സുധാകരൻ, കല – അഭിലാഷ് നെടുങ്കണ്ടം, പ്രൊഡക്‌ഷൻ കൺട്രോളർ – ജയശീലൻ സദാനന്ദൻ, ചമയം – ലാൽ കരമന, അസോസിയേറ്റ് ഡയറക്ടർ – അരുൺ പ്രഭാകർ, കോസ്റ്റ്യൂംസ് – അബ്‍ദുൽ വാഹിദ്, പി.ആർ. ഒ – നിയാസ് നൗഷാദ് , ഇഫക്ട്സ് – ജുബിൻ മുംബെ, സൗണ്ട് ഡിസൈൻസ് – ശങ്കർദാസ്, സ്റ്റിൽസ് – വിജയ് ലിയോ എന്നിവരാണ് മറ്റ് അണിയറ പ്രവർത്തകർ. ഹോളി വൂണ്ട് എസ് എസ് ഫ്രെയിംസിന്റെ ആദ്യ ചിത്രം കൂടിയാണ് .

സിദ്ധാർത്ഥ് ഭരതൻ സംവിധാനം ചെയ്യുന്ന ഏറ്റവും പുതിയ ചിത്രമാണ് ചതുരം. ഈ മാസം പ്രദർശനത്തിന് എത്താൻ ഒരുങ്ങുന്ന ഈ ചിത്രത്തിന്റെ ഒരു മോഷൻ പോസ്റ്റർ ഇപ്പോൾ റിലീസ് ചെയ്തിരിക്കുകയാണ് . നടി സ്വാസിക വിജയ് , നടൻ റോഷൻ എന്നിവരാണ് ചിത്രത്തിലെ കേന്ദ്ര കഥാപാത്രങ്ങളായി എത്തുന്നത്. മോഷൻ പോസ്റ്ററിലും കാണാൻ സാധിക്കുന്നത് ഇവരെ തന്നെയാണ്. ബെഡ് റൂമിൽ കിടക്കുന്ന റോഷനേയും സ്വാസികയേയും ആണ് ഈ പോസ്റ്റിൽ ഉൾപ്പെടുത്തിയിരിക്കുന്നത് . തന്റെ ഫേസ്ബുക്ക് പേജിലൂടെ സിദ്ധാർത്ഥ് ഭരതനാണ് ഈ പോസ്റ്റർ റിലീസ് ചെയ്തിരിക്കുന്നത്. നിങ്ങളുടെ അടുത്തുള്ള തിയറ്ററുകളിൽ ഓഗസ്റ്റ് മാസത്തിൽ ചിത്രം എത്തും എന്നും ഡേറ്റ് ഉടനെ അനൗൺസ് ചെയ്യും എന്നും കുറിച്ചു കൊണ്ടാണ് സിദ്ധാർത്ഥ് ഈ പോസ്റ്റർ പങ്കുവച്ചിരിക്കുന്നത്.

സ്വാസിക വിജയ് , റോഷൻ എന്നിവർക്കൊപ്പം ശാന്തി ബാലചന്ദ്രൻ , അലൻസിയർ , ലിയോണ ലിഷോയ്, ജാഫർ ഇടുക്കി, നിഷാന്ത് സാഗർ, ഗിലു ജോസഫ് എന്നിവരും പ്രധാന വേഷങ്ങളിൽ എത്തുന്നുണ്ട്. സംവിധായകൻ സിദ്ധാർത്ഥും സാഹിത്യ അക്കാദമി അവാർഡ് ജേതാവായ വിനോയ് തോമസും ചേർന്നാണ് ഈ ചിത്രത്തിന്റെ രചന നിർവഹിച്ചിരിക്കുന്നത് .

എ സർട്ടിഫിക്കറ്റ് ലഭിച്ചിരിക്കുന്ന ചിത്രമാണ് ചതുരം . ഗ്രീൻവിച്ച് എന്റർടെയ്ൻമെന്റ്സും യെല്ലോ ബേർഡ് പ്രൊഡക്ഷൻസും ചേർന്നാണ് ഈ ചിത്രം ഒരുക്കുന്നത്. വിനീത അജിത്ത്, ജോർജ് സാൻഡിഗോ, ജംനീഷ് തയ്യിൽ , സിദ്ധാർത്ഥ് ഭരതൻ എന്നിവരാണ് ചിത്രത്തിന്റെ നിർമ്മാതാക്കൾ . നേരത്തെ തന്നെ റിലീസ് ചെയ്ത ഇതിന്റെ ടീസർ വളരെയധികം പ്രേക്ഷക ശ്രദ്ധ നേടിയിരുന്നു. പ്രദീഷ് വർമ്മ ഛായഗ്രഹണം നിർവഹിക്കുന്ന ഈ ചിത്രത്തിന്റെ എഡിറ്റർ ദീപു ജോസഫ് ആണ്.

View this post on Instagram

A post shared by swasika (@swasikavj)

പി കിൻസ്ലിൻ സംവിധാനം ചെയ്ത് നടി ഐശ്വര്യ രാജേഷ് കേന്ദ്ര കഥാപാത്രമായി എത്തുന്ന പുത്തൻ ചിത്രമാണ് ഡ്രൈവർ ജമുന . തിങ്ക് മ്യൂസിക് ഇന്ത്യ എന്ന യൂട്യുബ് ചാനലിലൂടെ ഇപ്പോൾ ഈ ചിത്രത്തിന്റെ ഒരു പ്രെമോ സോങ് പുറത്തുവിട്ടിരിക്കുകയാണ്. കൂൾ ഡ്യൂഡ് എന്ന ഈ പ്രെമോ ഗാനത്തിൽ, ചിത്രത്തിലെ ഐശ്വര്യയുടെ കഥാപാത്രത്തിന്റെ വേഷവിധാനത്തോട് ഏറെ വ്യത്യസ്തമായ ലുക്കിലാണ് താരം എത്തിയിരിക്കുന്നത് .

ഫാൻസി കോസ്റ്റ്യൂമും സ്‌റ്റൈലിഷ് ലുക്കുമായി എത്തിയ ഐശ്വര്യയെ ആണ് ഈ ഗാനത്തിൽ കാണാൻ സാധിക്കുന്നത്. ചിത്രത്തിൽ ഐശ്വര്യ ഒരു ക്യാബ് ഡ്രൈവറായാണ് വേഷമിടുന്നത് . നായികാ പ്രാധാന്യമുള്ള ഒരു ചിത്രമാണിത്. ക്യാബ് ഡ്രൈവറായ ഐശ്വര്യയുടെ കഥാപാത്രത്തെ മുൻ നിർത്തിയാണ് ചിത്രത്തിന്റെ കഥ മുന്നോട്ട് പോകുന്നത്.

ഐശ്വര്യ രാജേഷിനെ കൂടാതെ ഈ ചിത്രത്തിൽ ആടുകളം നരേൻ , അഭിഷേക് കുമാർ , ഇളയ പാണ്ടി, കവിതാ ഭാരതി , മണികണ്ഠൻ രാജേഷ് എന്നിവരും ശ്രദ്ധേയ വേഷങ്ങളിൽ എത്തുന്നുണ്ട്. എസ്.പി ചൗധരി നിർമ്മിക്കുന്ന ഈ ചിത്രം ഒരുങ്ങുന്നത് 18 റീൽസിന്റെ ബാനറിൽ ആണ്. ചിത്രത്തിന്റെ രചന നിർവഹിച്ചിരിക്കുന്നത് സംവിധായകൻ പി കിൻസ്ലിൻ തന്നെയാണ് . ചിത്രത്തിലെ സംഗീതം ഒരുക്കിയിട്ടുള്ളത് ഗിബ്ബ്രൻ ആണ് . ചിത്രത്തിലെ ആക്ഷൻ രംഗങ്ങൾക്ക് പിന്നിൽ പ്രവർത്തിച്ചിരിക്കുന്നത് അനൽ അരസു ആണ് . ചിത്രത്തിന്റെ ഛായാഗ്രാഹകൻ ഗോകുൽ ബിനോയ് ആണ് . എഡിറ്റിംഗ് കൈകാര്യം ചെയ്തിരിക്കുന്നത് ആർ രാമർ ആണ് .