Movie Updates

ആരാധകർ ഏറെ കാത്തിരിക്കുന്ന തെലുങ്കു ചിത്രങ്ങളിലൊന്നാണ് തെലുങ്കു സൂപ്പർ താരം നന്ദമുറി ബാലകൃഷ്ണ എന്ന ബാലയ്യയുടെ നൂറ്റിയേഴാം ചിത്രം . ഈ ചിത്രത്തിന്റെ ഫസ്റ്റ് ലുക്ക് പോസ്റ്റർ നേരത്തെ തന്നെ പുറത്തു വരികയും പ്രേക്ഷകർക്കിടയിൽ തരംഗം സൃഷ്ടിക്കുകയും ചെയ്തിരുന്നു. ഇപ്പോഴിതാ, ഇതിന്റെ അണിയറ പ്രവർത്തകർ ഈ ചിത്രത്തിന്റെ ആദ്യ ടീസർ പുറത്തു വിട്ടിരിക്കുകയാണ് . ഇതുവരെയും പേര് നൽകാത്ത ഈ ചിത്രം ഇപ്പോൾ അറിയപ്പെടുന്നത് എൻ ബി കെ 107 എന്ന പേരിലാണ്. ഈ ചിത്രത്തിന്റെ ഒരു കിടിലൻ മാസ്സ് ടീസറാണ് പുറത്തു വന്നിരിക്കുന്നത് , മരണ മാസ്സ് ലുക്കിൽ ബാലയ്യ എത്തുന്നു എന്നതും ശ്രദ്ധേയമാണ് .

ബാലയ്യയുടെ ജന്മദിനം പ്രമാണിച്ചാണ് പുറത്തു വിട്ടിരിക്കുന്ന ഈ ടീസറിൽ പക്കാ മാസ് ആക്ഷൻ രംഗങ്ങളും പഞ്ച് ഡയലോഗുകളുമായി ബാലയ്യ നിറഞ്ഞു നിൽക്കുകയാണ്. ബാലയ്യ ഈ ചിത്രത്തിൽ നരച്ച താടിയും പിരിച്ചു വെച്ച മീശയും കൂളിംഗ് ഗ്ലാസും അണിഞ്ഞു, കറുത്ത ഷർട്ടും മുണ്ടും ഉടുത്ത് ഗാഭീര്യമേറിയ ഒരു ലുക്കിലാണ് എത്തിയിരിക്കുന്നത്. മൈത്രി മൂവി മേക്കേഴ്‌സ് ആണ് ഈ ചിത്രം നിർമ്മിക്കുന്നത്. ശ്രുതി ഹാസനാണ് ഈ ചിത്രത്തിലെ നായികയായി എത്തുന്നത്. ഈ ചിത്രത്തിൽ ഒരു പ്രധാന വേഷത്തിൽ വരലക്ഷ്മി ശരത്കുമാറും എത്തുന്നുണ്ട്.

ഈ ചിത്രത്തിന്റെ സംവിധായകനായ ഗോപിചന്ദ് മല്ലിനേനി ആണ് ചിത്രത്തിന്റെ കഥയും തിരക്കഥയും തയ്യാറാക്കിയിരിക്കുന്നത്. ഗോപിചന്ദ് മല്ലിനേനി തൊട്ടു മുൻപ് സംവിധാനം ചെയ്ത ചിത്രം രവി തേജ നായകനായി എത്തിയ ക്രാക്ക് എന്ന സൂപ്പർ ഹിറ്റ് ചിത്രം ആയിരുന്നു . തമൻ എസ് ആണ് ചിത്രത്തിന് വേണ്ടി സംഗീതമൊരുക്കിയിരിക്കുന്നത്. ഋഷി പഞ്ചാബിയാണ് ചിത്രത്തിന്റെ ക്യാമറമാൻ. ശിവ, റാം- ലക്ഷ്മൺ ടീം എന്നിവരാണ് ചിത്രത്തിലെ അത്യുഗ്രൻ സംഘട്ടന രംഗങ്ങൾ ഒരുക്കിയിരിക്കുന്നത്. നവീൻ നൂലിയാണ് എഡിറ്റർ. ബാലയ്യയുടെ തൊട്ടു മുൻപത്തെ റിലീസ് ചിത്രം , കരിയറിലെ ആദ്യത്തെ നൂറു കോടി ഗ്രോസ് നേടിയ അഖണ്ഡ എന്ന ചിത്രമായിരുന്നു . ആ ചിത്രത്തിന്റെ സംവിധായകനായ ബോയപ്പട്ടി ശ്രീനുവിനോടൊപ്പം താരം വീണ്ടും ഒന്നിക്കാൻ ഒരുങ്ങുന്നു എന്ന വാർത്തകളും ഇപ്പോൾ വരുന്നുണ്ട്.

സത്യദേവ് കേന്ദ്ര കഥാപാത്രമായി എത്തുന്ന പുത്തൻ തെലുങ്ക് ചിത്രമാണ് ഗോഡ്സെ . ഈ ആക്ഷൻ ത്രില്ലർ ചിത്രത്തിൽ മലയാളി താരം ഐശ്വര്യ ലക്ഷ്മിയും ഒരു പ്രധാന വേഷത്തെ അവതരിപ്പിക്കുന്നു. ജൂൺ പതിനേഴിന് തിയറ്ററുകളിൽ എത്തുന്ന ഈ ചിത്രത്തിന്റെ ട്രെയ്ലർ ഇപ്പോൾ റിലീസ് ചെയ്തിരിക്കുകയാണ്.

സി കെ എന്റർടൈൻമെന്റ് പ്രൈവറ്റ് ലിമിറ്റഡ് എന്ന യൂട്യൂബ് ചാനലിലൂടെയാണ് ഈ വീഡിയോ പുറത്തുവിട്ടിരിക്കുന്നത്. വെടി വെയ്പ്പ്, സ്ഫോടനം, ന്യൂസ്, രാഷ്ട്രീയം, പോലീസ് ഇവയെല്ലാം നിറഞ്ഞ ഒരു മാസ് ട്രൈലർ തന്നെയാണ് ഇപ്പോൾ പുറത്ത് വിട്ടിരിക്കുന്നു. സത്യദേവിന്റെയും ഐശ്വര്യയുടേയും മികവുറ്റ അഭിനയരംഗങ്ങളും ട്രൈലറിൽ കാണാം. ഐശ്വര്യയുടെ ആദ്യ തെലുങ്ക് ചിത്രം കൂടിയാണിത്.

സത്യദേവ് , ഐശ്വര്യ ലക്ഷ്മി എന്നിവർക്ക് പുറമേ ജിയ ശർമ, ബ്രഹ്മാജി , നഗബാബു കൊനിഡെല , സിജു മേനോൻ വർഗീസ്, നോയൽ , പ്രിയർദശി, ചൈതന്യ കൃഷ്ണ,പ സന്തോഷ് ഗുരു ചരൺ എന്നിവരും പ്രധാന വേഷങ്ങളിൽ എത്തുന്നു. സംവിധായകൻ ഗോപി ഗണേഷ് പട്ടാമ്പിയാണ് ചിത്രത്തിന്റെ കഥ, തിരക്കഥ, സംഭാഷണം എന്നിവ തയ്യാറാക്കിയിരിക്കുന്നത്. സി കെ സ്ക്രീൻസിന്റെ ബാനറിൽ സി കല്യാൺ ആണ് ഈ ചിത്രം നിർമ്മിച്ചിരിക്കുന്നത്. ചിത്രത്തിന്റെ എഡിറ്റിംഗ് കൈകാര്യം ചെയ്തിരിക്കുന്നത് സാഗർ ആണ്.

എസ്.എസ്. രാജമൗലിയുടെ സംവിധാന മികവിൽ 2022 മാർച്ചിൽ പുറത്തിറങ്ങിയ ചിത്രമാണ് ആർ. ആർ. ആർ. ജൂനിയർ എൻ. ടി. ആർ, രാം ചരൺ എന്നിവരാണ് ചിത്രത്തിലെ കേന്ദ്ര കഥാപാത്രങ്ങളെ അവതരിപ്പിച്ചത്. ഡി വി വി എന്റെർടൈൻമെന്റിന്റെ ബാനറിൽ ഡി വി വി ദനയ്യയാണ് ഈ ചിത്രം നിർമ്മിച്ചത്. അല്ലൂരി സീത രാമ രാജു , കൊമരു ഭീം എന്നീ രണ്ട് ഇന്ത്യൻ വിപ്ലവകാരികളുടെ പോരാട്ടത്തെ കുറിച്ചുള്ള ഒരു സാങ്കൽപിക കഥയാണ് ഈ ചിത്രം പറയുന്നത്.

പ്രേക്ഷകർ ഏറ്റെടുത്ത ഈ ചിത്രത്തിലെ വിഷ്വൽ ഇഫക്ട്സ് വീഡിയോ ഇപ്പോൾ പുറത്തുവിട്ടിരിക്കുകയാണ്. ചിത്രത്തിലെ ഏറ്റവും ശ്രദ്ധേയമായ തീവണ്ടി അപകടത്തിന്റെ രംഗങ്ങൾ ഒരുക്കിയ വീഡിയോ ആണ് ഇപ്പോൾ പുറത്തു വിട്ടിരിക്കുന്നത്. ഈ സാഹസിക രംഗങ്ങൾ നായകന്മാർ കൈകാര്യം ചെയ്തത് എങ്ങനെയെന്നെല്ലാം ഈ വീഡിയോയിൽ കാണാൻ സാധിക്കും. സര്‍പ്രീസ് വിഎഫ്‌എക്‌സ്‌ സ്‌റ്റുഡിയോ ഇത്തരം രംഗങ്ങൾ മനോഹരമാക്കിയതിന് പിന്നിൽ. മാസങ്ങൾ നീണ്ട പരിശ്രമം കൊണ്ടാണ് ഡാനിയൽ ഫ്രഞ്ചും സംഘവും ഈ സാഹസിക രംഗങ്ങൾ തയ്യാറാക്കിയത്.

ആര്‍ആര്‍ആറിലെ അപകട രംഗത്തിനായുള്ള ട്രെയിനിന്‍റെ നിര്‍മാണം നടന്നത് അമേരിക്കയിലെ വിര്‍ജീനിയയിലാണ്. സ്‌റ്റുഡിയോയിലാണ് ചിത്രത്തിലെ ഈ തീ പടരുന്ന രംഗം ചിത്രീകരിച്ചിരിക്കുന്നത്. ഒട്ടേറെ ബ്ലൂ സ്ക്രീൻ ഷോട്ടുകളും എടുത്തിരുന്നു. ഒട്ടേറെ കഷ്ടപാടുകൾക്ക് ശേഷമാണ് ഈ രംഗം മനോഹരമാക്കിയിരിക്കുന്നതെന്ന് വീഡിയോയിൽ നിന്നും മനസിലാക്കാം.

സുഴൽ – ദി വോർടെക്സ് എന്ന തമിഴ് സീരീസിന്റെ സീസൺ വണ്ണിന്റെ ട്രൈലർ ഇപ്പോൾ റിലീസ് ചെയ്തിരിക്കുകയാണ്. വിക്രം വേദ സംവിധായകരായ പുഷ്കർ – ഗായത്രി എന്നിവർ ചേർന്ന് രചന നിർവഹിച്ച ഈ സീരിസിന്റെ സംവിധായകർ ബ്രമ്മ, അനു ചരൺ എന്നിവരാണ്. ഒരു ക്രൈം ത്രില്ലർ പാറ്റേണിലാണ് സുഴൽ ഒരുക്കിയിരിക്കുന്നത്.

വളരെ ആകാംഷ നിറഞ്ഞതും ഭയം തോന്നിപ്പിക്കുന്നതുമായ ഒരു ട്രൈലറാണ് ഇപ്പോൾ റിലീസ് ചെയ്തിരിക്കുന്നത്. ഒരു പെൺകുട്ടി കാണാതാക്കുന്നതും തുടർന്ന് ആ ഗ്രാമത്തിൽ ഉണ്ടാകുന്ന നാശ നഷ്ടങ്ങളുമാണ് ഈ ട്രൈലറിൽ കാണിച്ചിരിക്കുന്നത്. ഐശ്വര്യ രാജേഷ്, ശ്രിയ റെഡ്ഢി , കതിർ, രാധാകൃഷ്ണൻ പാർത്ഥിബൻ തുടങ്ങിയവരാണ് ചിത്രത്തിലെ പ്രധാന അഭിനേതാക്കൾ . ഐശ്വര്യയുടെ മികച്ച പ്രകടനം ട്രൈലറിലും കാണാൻ സാധിക്കും.

ആമസോൺ പ്രൈം വീഡിയോ ഇന്ത്യ എന്ന യൂട്യൂബ് ചാനലിലൂടെയാണ് ഈ വീഡിയോ പുറത്തുവിട്ടിരിക്കുന്നത്. ജൂൺ 17 ന് ആണ് ഈ സീരീസ് റിലീസ് ചെയ്യുന്നത്. ഈ തമിഴ് സീരീസ് നിരവധി ഭാഷകളുടെ സബ്ടൈറ്റിലുകളോടെ ലഭ്യമാകും . രണ്ട് മിനുട്ടിൽ കൂടുതൽ ദൈർഘ്യമുള്ള ഈ വീഡിയോ ലക്ഷക്കണക്കിന് കാഴ്ചക്കാരെയാണ് ഇതിനോടകം സ്വന്തമാക്കിയത്. നിരവധി പ്രേക്ഷകരാണ് വീഡിയോയ്ക്ക് താഴെ കമന്റുകൾ നൽകിയിട്ടുള്ളത്. ഏവരും ആകാംഷയോടെയും ഏറെ പ്രതീക്ഷയോടെയും ഈ സീരിസിനായി കാത്തിരിക്കുയാണ്.

2021 ൽ പുറത്തിറങ്ങിയ ബ്രഹ്മാണ്ഡ തെലുങ്ക് ഭാഷ ആക്ഷൻ ഡ്രാമ ചിത്രമാണ് പുഷ്പ: ദി റൈസ്. സുകുമാർ രചനയും സംവിധാനവും നിർവഹിച്ച ഈ ചിത്രത്തിൽ കേന്ദ്ര കഥാപാത്രത്തെ അവതരിപ്പിച്ചത് നടൻ അല്ലു അർജുൻ ആണ് . രണ്ട് ഭാഗങ്ങളായി ഒരുക്കുന്ന ഈ ചിത്രത്തിന്റെ ആദ്യഭാഗം പ്രേക്ഷകരിൽ വൻ തരംഗമാണ് സൃഷ്ടിച്ചത്. ഈ ചിത്രവും ചിത്രത്തിലെ ഗാനങ്ങളും പ്രേക്ഷകർ ഇരു കൈയ്യും നീട്ടിയാണ് സ്വീകരിച്ചത്. 342 കോടിയാണ് ഈ ചിത്രത്തിന്റെ ബോക്സ് ഓഫീസ് കളക്ഷൻ.

ഈ അടുത്ത് ഈ ചിത്രത്തിലെ ഒരു വീഡിയോ പുറത്തുവിട്ടിരുന്നു. ചിത്രം ഏറ്റെടുത്തത് പോലെ ആരാധകർ ഇപ്പോൾ ഈ വീഡിയോയും ഏറ്റെടുത്തിരിക്കുകയാണ്. ചിത്രത്തിൽ വിഷ്വൽ ഇഫ്ക്ട്സ് ഒരുക്കുന്നതിന്റെ ഒരു മിനിട്ടിലധികം ദൈർഘ്യമുള്ള ഒരു വീഡിയോ ആണ് ഇപ്പോൾ പുറത്തുവിട്ടിരിക്കുന്നത്. ചിത്രത്തിന്റെ വി എഫ് എക്സ് ന് പിന്നിൽ പ്രവർത്തിച്ചിരിക്കുന്നത് മകുത വിഷ്വൽ എന്ന കമ്പനിയാണ്. എന്നാൽ ഈ വീഡിയോ സത്യത്തിൽ പ്രേക്ഷകരെ ഞെട്ടിക്കും. ചിത്രത്തിൽ ആവേശം തോന്നിയ പല രംഗങ്ങളും ഒറിജിനൽ അല്ല വെറും ഡമ്മി മാത്രമാണ് എന്നതാണ് വാസ്തവം. അല്ലു അർജുൻ ലോറിയിൽ നിന്ന് ചാടി ഇറങ്ങുന്ന കിടിലൻ മാസ്സ് സീനും ചിത്രത്തിൽ കാണിച്ചിരിക്കുന്ന പാമ്പും ഡമ്മികൾ മാത്രമാണ്. വി എഫ് എക്സിന്റെ കഴിവ് എന്ന് തന്നെ അവയെ വിശേഷിപ്പിക്കാം.

ചിത്രത്തിൽ അല്ലു അർജുന്റെ നായികയായി വേഷമിട്ടത് നടി രശ്മിക മന്ദാന ആണ്. മലയാളത്തിലെ യുവതാരം ഫഹദ് ഫാസിൽ ആണ് ചിത്രത്തിലെ നെഗറ്റീവ് റോൾ അവതരിപ്പിച്ചിരിക്കുന്നത്. ഫഹദിന്റെ ആദ്യ തെലുങ്ക് ചിത്രമാണ് പുഷ്പ . ചിത്രത്തിന്റെ രണ്ടാം ഭാഗത്തിനായുള്ള കാത്തിരിപ്പിലാണ് ആരാധകർ.

ടൊവിനോ തോമസ് – കീർത്തി സുരേഷ് എന്നിവരെ കേന്ദ്ര കഥാപാത്രങ്ങളാക്കി നവാഗതനായ വിഷ്ണു ജി. രാഘവ് സംവിധാനം ചെയ്യുന്ന പുതിയ ചിത്രമാണ് വാശി. ഈ ചിത്രത്തിലെ ഒരു വീഡിയോ ഗാനം ഇപ്പോൾ റിലീസ് ചെയ്തിരിക്കുകയാണ്. ഈ ചിത്രത്തിന്റെ ഫസ്റ്റ് ലുക്ക് പോസ്റ്റർ, ടീസർ എന്നിവയെല്ലാം വളരെയധികം പ്രേക്ഷക ശ്രദ്ധ നേടിയിരുന്നു . അതിന് പിന്നാലെയായി പുതിയൊരു വീഡിയോ ഗാനം കൂടി പുറത്തു വിട്ടിരിക്കുകയാണ്.

ഋതുരാഗം എന്ന വീഡിയോ ഗാനമാണ് തിങ്ക് മ്യൂസിക് ഇന്ത്യ എന്ന യൂടൂബ് ചാനലിലൂടെ പുറത്തുവിട്ടത്. ചിത്രത്തിൽ ടോവിനോയും കീർത്തിയും അവതരിപ്പിക്കുന്നത് രണ്ട് വക്കീൽ കഥാപാത്രങ്ങളെയാണ് എന്ന് ഇതിനോടകം മനസിലായതാണ്. ഇപ്പോൾ പുറത്തിറങ്ങിയ വീഡിയോ ഗാനത്തിൽ ഇവരുടെ പ്രൊഫഷൻ ആരംഭിക്കുന്നതും പച്ച പിടിക്കുന്നതും ഒപ്പം ഇവർക്കിടയിൽ കാത്തു സൂക്ഷിക്കുന്ന പ്രണയവുമെല്ലാം ആണ് കാണിക്കുന്നത്. അഡ്വ. മാധവി എന്ന കഥാപാത്രമായി കീർത്തിയും അഡ്വ. എബിന്‍ എന്ന കഥാപാത്രമായി ടൊവിനോയും എത്തുന്നു .

വിനായക് ശശികുമാർ വരികൾ രചിച്ച ഈ ഗാനത്തിന് ഈണം നൽകിയിരിക്കുന്നത് കൈലാസ് ആണ്. കേശവ് വിനോദ് , ശ്രുതി ശിവദാസ് എന്നിവരാണ് ഈ ഗാനം ആലപിച്ചിക്കുന്നത്. രേവതി കലാമന്ദിറിന്റെ ബാനറിൽ ഒരുങ്ങുന്ന ഈ ചിത്രം നിർമ്മിക്കുന്നത് ജി സുരേഷ് കുമാർ , മേനക സുരേഷ് കുമാർ എന്നിവർ ഒന്നിച്ചാണ്. ജൂൺ പതിനേഴിനാണ് ചിത്രം പ്രേക്ഷകരിലേക്ക് എത്തുന്നത്.

ഈ അടുത്ത് റിലീസ് ചെയ്ത തെലുങ്ക് ചിത്രമാണ് സർക്കാർ വാരി പാട. നിരൂപകരിൽ നിന്ന് സമ്മിശ്ര പ്രതികരണം നേടിയ ഈ ചിത്രത്തിൽ കേന്ദ്ര കഥാപാത്രങ്ങളായി എത്തിയത് നടി കീർത്തി സുരേഷും നടൻ മഹേഷ് ബാബുവുമാണ്. ഒരു ആക്ഷൻ ഡ്രാമ പാറ്റേണിൽ ഒരുക്കിയ ഈ ചിത്രത്തിന്റെ രചനയും സംവിധാനവും നിർവഹിച്ചിരിക്കുന്നത് പരശുറാം ആണ്.

ഈ ചിത്രത്തിലെ ഒരു വീഡിയോ ഗാനം ഇപ്പോൾ റിലീസ് ചെയ്തിരിക്കുകയാണ്. മുരാരി വാ… എന്ന വരികളോടെ ആരംഭിക്കുന്ന ഒരു ഗാനമാണ് ഇപ്പോൾ പുറത്തു വിട്ടിരിക്കുന്നത്. മഹേഷ് ബാബു – കീർത്തി സുരേഷ് താര ജോടികളെയാണ് ഈ ഗാനത്തിൽ കാണാൻ സാധിക്കുന്നത്. ഈ ഗാനത്തിൽ കീർത്തി സുരേഷ് ഗ്ലാമറസ് കോസ്റ്റൂമിൽ എത്തിയിരിക്കുന്നു എന്നതും എടുത്തു പറയേണ്ടതാണ് . ഇരുവരും തമ്മിലുള്ള റൊമാന്റിക് രംഗങ്ങൾക്കൊപ്പം കിടിലൻ ഡാൻസ് പെർഫോമൻസും താരങ്ങൾ കാഴ്ചവയ്ക്കുന്നുണ്ട്.

ആനന്ദ് ശ്രീറാം ഈ ഗാനത്തിന് വരികൾ രചിച്ചിരിക്കുന്നത്. ശ്രുതി രഞ്ജിനി , എം.എൽ ഗായത്രി , ശ്രീകൃഷ്ണ എന്നിവർ ചേർന്നാണ് ഈ ഗാനം ആലപിച്ചിരിക്കുന്നത്. ഈ ഗാനത്തിന് ഈണം പകർന്നിരിക്കുന്നത് തമൻ എസ് ആണ്. ഈ ചിത്രത്തിലെ ഓരോ ഗാനങ്ങളും പ്രേക്ഷകർ ഏറ്റെടുത്തിരുന്നു. സരിഗമ തെലുങ്കു എന്ന യൂടൂബ് ചാനലിലൂടെയാണ് ഈ വീഡിയോ ഗാനം റിലീസ് ചെയ്തിരിക്കുന്നത്. പുറത്തിറങ്ങി മണിക്കൂറുകൾ പിന്നിടുമ്പോഴേക്കും നിരവധി കാഴ്ചക്കാരെയാണ് ഈ വീഡിയോ സ്വന്തമാക്കിയത്.

നയൻതാരയുടെ ഏറ്റവും പുതിയ ചിത്രമാണ് O2 . ജി എസ് ഗണേഷ് സംവിധാനം ചെയ്യുന്ന ഈ ചിത്രത്തിൽ അമ്മ വേഷത്തിലാണ് നയൻതാര എത്തുന്നത്. ജൂൺ 17 ന് ഒടിടി റിലീസ് ആയി എത്തുന്ന ഈ ചിത്രത്തിന്റെ ഒഫീഷ്യൽ ട്രൈലർ ഇപ്പോൾ പുറത്തു വിട്ടിരിക്കുകയാണ്. ഡിസ്നി പ്ലസ് ഹോട്ട്സ്റ്റാർ തമിഴ് എന്ന യൂടൂബ് ചാനലിലൂടെയാണ് ഈ ട്രൈലർ പുറത്തുവിട്ടിരിക്കുന്നത് .

പ്രേക്ഷകരെ ആകാംക്ഷയുടെ മുൾമുനയിൽ നിർത്തുന്ന ഒരു കിടിലൻ ട്രൈലറാണ് ഇപ്പോൾ പുറത്തുവിട്ടിരിക്കുന്നത്. സാധരണ നിലയിൽ ശ്വസിക്കാൻ ബുദ്ധിമുട്ടുള്ള ഒരു മകനാണ് നയൻതാരയുടേത്. ഈ മകനേയും കൂട്ടി ബസിൽ യാത്ര ചെയ്യവേ ആ ബസ് മണ്ണിടിഞ്ഞ് അതിനടിയിൽ അകപ്പെടുകയും, അതിലുള്ള ഓരോരുത്തരും ശ്വസിക്കാൻ ബുദ്ധിമുട്ടുകയും ചെയ്യുന്ന രംഗങ്ങളാണ് ട്രൈലറിൽ കാണിച്ചിരിക്കുന്നത്. “ഏതൊരു അമ്മയും തന്റെ കുഞ്ഞ് അപകടത്തിലാണെന്ന് കണ്ടാൽ , വെറുതെ നോക്കി ഇരിക്കില്ല ” എന്ന ഡയലോഗിന് ശേഷം , ശ്വസിക്കാൻ ബുദ്ധിമുട്ടുള്ള തന്റെ മകനെ രക്ഷിക്കാൻ അമ്മയായ നയൻതാര ശ്രമിക്കുന്ന രംഗങ്ങളോടെയാണ് ഈ ട്രൈലർ അവസാനിക്കുന്നത്.

റിത്വിക് ആണ് ചിത്രത്തിൽ നയൻതാരയുടെ മകനായി അഭിനയിക്കുന്നത്. ജാഫർ ഇടുക്കി ,ലെന എന്നീ മലയാളി താരങ്ങളേയും ഈ ട്രൈലർ രംഗങ്ങളിൽ കാണാൻ സാധിക്കും. ഡ്രീം വാരിയർ പിക്ച്ചേഴ്സിന്റെ ബാനറിൽ എസ് ആർ പ്രകാശ് ബാബു, എസ് ആർ പ്രഭു എന്നിവരാണ് ഈ ചിത്രം നിർമ്മിക്കുന്നത്. സംഗീത സംവിധാനം നിർവ്വഹിച്ചത് വിശാൽ ചന്ദ്രശേഖർ ആണ് . എഡിറ്റിംഗ് കൈകാര്യം ചെയ്തിരിക്കുന്നത് സെൽവ ആർ.കെ ആണ്.

മലയാളികളുടെ പ്രിയ താരമായ നടി നസ്രിയ ഫഹദ് തെലുങ്കിൽ അരങ്ങേറ്റം കുറിക്കുന്ന ചിത്രമാണ് അന്റെ സുന്ദരനിക്കി. ജൂണ് പത്തിന് റിലീസ് ചെയ്യുന്ന ഈ ചിത്രത്തിൽ നായകനായി എത്തുന്നത് തെലുങ്കു യുവ താരം നാനിയാണ്. ഒരു റൊമാന്റിക് കോമഡി പാറ്റേണിൽ ഒരുക്കുന്ന ചിത്രത്തിന്റെ ടീസർ, ട്രൈലെർ എന്നിവയെല്ലാം സോഷ്യൽ മീഡിയയിൽ തരംഗമാകുകയും പ്രേക്ഷകർക്കിടയിൽ സൂപ്പർ ഹിറ്റായി മാറുകയും ചെയ്തിരുന്നു. ഇപ്പോഴിതാ ഇതിലെ ഒരു പ്രോമോ ഗാനം കൂടി പുറത്തുവിട്ടിരിക്കുകയാണ്. റിലീസ് ചെയ്ത് നിമിഷ നേരം കൊണ്ടാണ് ഈ ഗാനം സോഷ്യൽ മീഡിയ കീഴടക്കിയത്. തന്തനാനന്ദ എന്ന ഗാനമാണ് ഇപ്പോൾ പ്രേക്ഷക ശ്രദ്ധ നേടുന്നത്. സരസ്വതി പുത്ര രാമ ജോഗയ്യ ശാസ്ത്രിയാണ് ഈ ഗാനം രചിച്ചത് . വിവേക് സാഗർ ഈണം നൽകിയ ഈ ഗാനം ആലപിച്ചിരിക്കുന്നത് ശങ്കർ മഹാദേവൻ, ശ്വേത മോഹൻ എന്നിവർ ചേർന്നാണ് .

ഈ ചിത്രം നിർമ്മിച്ചിരിക്കുന്നത് മൈത്രി മൂവി മേക്കേഴ്സ് ആണ്. ചിത്രത്തിന്റെ സംവിധായകൻ വിവേക് ആത്രേയയാണ് ഇതിന്റെ രചനയും നിർവ്വഹിച്ചിരിക്കുന്നത്. നാനി, നസ്രിയ ഫഹദ് എന്നിവരോടൊപ്പം ഈ ചിത്രത്തിൽ നാദിയ മൊയ്തു, ഹർഷ വർദ്ധന, സുഹാസ്, രാഹുൽ രാമകൃഷ്ണ, നരേഷ്, തൻവി റാം, വിന്നി, ഹാരിക,ശ്രീകാന്ത് അയ്യങ്കാർ, രോഹിണി, എൻ അളഗൻ പെരുമാൾ, അരുണ ഭിക്ഷു, നോമിന എന്നിവരും പ്രധാന വേഷങ്ങളിൽ എത്തുന്നു .

നികേത് ബൊമ്മി റെഡ്ഢിയാണ് ചിത്രത്തിന്റെ ക്യാമറമാൻ. ലീല തോമസ് എന്ന കഥാപാത്രമായാണ് ചിത്രത്തിൽ നസ്രിയ എത്തുന്നത്. നാനി ആകട്ടേ കസ്തുരി പൂർണ്ണ വെങ്കട് ശേഷ സായി പാവന രാമ സുന്ദര പ്രസാദ് എന്ന കഥാപാത്രമായാണ് എത്തുന്നത്. രവി തേജ ഗിരിജാലയാണ് ചിത്രത്തിന്റെ എഡിറ്റർ.

നവഗതനായ അരുൺ ഡി ജോസിന്റെ സംവിധാന മികവിൽ ഒരുങ്ങിയ ചിത്രമാണ് ജോ ആൻഡ് ജോ. മലയാള സിനിമയിൽ ബാലതാരങ്ങളായി എത്തി പ്രേക്ഷക ഹൃദയം കീഴടക്കിയ മാത്യൂ തോമസ്, നസീലൻ കെ. ഗഫൂർ എന്നിവരാണ് ചിത്രത്തിലെ കേന്ദ്ര കഥാപാത്രങ്ങളായി എത്തിയത്. ചിത്രത്തിലെ നായിക വേഷം ചെയ്തിരിക്കുന്നത് നടി നിഖില വിമൽ ആണ് . മെയ് പതിമൂന്നിന് റീലീസ് ചെയ്ത ഈ കോമഡി എന്റർടൈനർ ചിത്രം മികച്ച പ്രേക്ഷക പ്രതികരണമാണ് നേടിയത്. ഈ അടുത്തായി ചിത്രത്തിലെ ഒരു ഗാനങ്ങളും സ്നീക്ക് പീക്ക് വീഡിയോസും പുറത്തിറങ്ങുകയും സോഷ്യൽ മീഡിയയിൽ വൈറലായി മാറുകയും ചെയ്തിട്ടുണ്ട്. ഇപ്പോഴിതാ ചിത്രത്തിലെ മറ്റൊരു സ്നീക്ക് പീക്ക് വീഡിയോ കൂടി റിലീസ് ചെയ്തിരിക്കുകയാണ്.

മാത്യൂ തോമസ്, നസീലൻ കെ. ഗഫൂർ , ഗോവിന്ദ് വസന്ത എന്നിവരുടെ മികച്ച അഭിനയ രംഗങ്ങൾ തന്നെയാണ് ഈ സീനിന്റെ ഹൈലൈറ്റ്. ഗോവിന്ദ് വസന്ത അവതരിപ്പിക്കുന്ന കഥാപാത്രത്തിന്റെ വീട്ടിൽ മൂവരും ഒത്തു ചേരുന്നതും അവരുടെ രസകരമായ സംഭാഷണവുമാണ് ഈ വീഡിയോയിൽ കാണിച്ചിരിക്കുന്നത്. വീഡിയോയ്ക്ക് താഴെ ഒട്ടേറെ ആരാധകരാണ് കമന്റുകൾ നൽകിയിരിക്കുന്നത്.

ഇമാജിൻ സിനിമാസ് ആൻഡ് സിഗ്‌നേച്ചർ സ്റ്റുഡിയോസ് ഒരുക്കുന്ന ഈ ചിത്രം നിർമ്മിക്കുന്നത് ഹാരിസ് ദേശം , ആദർശ് നാരായൺ , പി.ബി അനീഷ്, അനുമോദ് ബോസ് എന്നിവർ ചേർന്നാണ്. ചാമൻ ചാക്കോ ആണ് ചിത്രത്തിന്റെ എഡിറ്റിംഗ് കൈകാര്യം ചെയ്തിരിക്കുന്നത് . തിരക്കഥ , സംഭാഷണം എന്നിവ തയ്യാറാക്കിയിരിക്കുന്നത് രവീഷ് നാഥും സംവിധായകൻ അരുണും ഒന്നിച്ചാണ് .