Movie Updates

പൃഥ്വിരാജ് സംവിധാനം ചെയ്യുന്ന പുത്തൻ ചിത്രമാണ് ബ്രോ ഡാഡി. ചിത്രത്തിൽ മോഹൻലാലും സംവിധായകനായ പൃഥ്വിരാജും കേന്ദ്ര കഥാപാത്രങ്ങളായി എത്തുന്നു. ആന്റണി പെരുമ്പാവൂർ നിർമ്മിക്കുന്ന ഈ ചിത്രത്തിൽ അദ്ദേഹവും ഒരു ചെറിയ റോളിൽ എത്തുന്നുണ്ട്. ചിത്രത്തിന്റെ ട്രൈലറിൽ ആന്റണി പെരുമ്പാവൂരിന്റെ പോലീസ് വേഷം ശ്രദ്ധിക്കപ്പെട്ടിരുന്നു. ട്രൈലറിനും ടൈറ്റിൽ സോങ്ങിനും ശേഷം ബ്രോ ഡാഡിയിലെ മറ്റൊരു രസകരമായ വീഡിയോ ഇപ്പോൾ വൈറലായി മാറുകയാണ്.

ഈ വീഡിയോയിൽ സംവിധായകൻ പൃഥ്വിരാജിനേയും നിർമ്മാതാവ് ആന്റണി പെരുമ്പാവൂരിനേയുമാണ് കാണാനാവുന്നത്. തന്റെ ചിത്രത്തിന് ഡേറ്റ് ചോദിച്ച് എത്തുന്ന സംവിധായകൻ , എന്നാൽ ചിത്രം രണ്ട് ചിത്രങ്ങൾ കഴിഞ്ഞതിന് ശേഷം എന്നു പറഞ്ഞു നീട്ടിവയ്ക്കുന്ന നിർമ്മാതാവിനെ തന്റെ ചിത്രത്തിലെ പോലീസ് വേഷം വച്ച് നീട്ടി വീഴ്ത്തുന്ന സംവിധായകൻ . നർമ്മ മൂഹൂർത്തങ്ങളായി ഒരുക്കിയ ഈ വീഡിയോ ഏറ്റെടുത്തിരിക്കുകയാണ് ആരാധകർ. ഈ വീഡിയോ കണ്ടതോടെ ആന്റണി പെരുമ്പാവൂരിന്റെ എസ്.ഐ ആന്റണി ജോസഫ് എന്ന കഥാപാത്രത്തെ കാത്തിരിക്കുകയാണ് ആരാധകർ.

കേന്ദ്ര കഥാപാത്രങ്ങളായ മോഹൻലാലിനേയും പൃഥ്വിരാജിനേയും കൂടാതെ മീന, കല്യാണി പ്രിയദർശൻ, കനിഹ, ലാലു അലക്സ് , ജഗദീഷ്, മല്ലിക സുകുമാരൻ , സൗബിൻ, ഉണ്ണി മുകുന്ദൻ എന്നിവരും പ്രധാന വേഷത്തിൽ എത്തുന്നു. ജനുവരി ഇരുപത്തിയാറിന് ഓൺലൈൻ പ്ലാറ്റ് ഫോമായ ഡിസ്നി പ്ലസ് ഹോട്ട് സ്റ്റാറിലൂടെയാണ് ചിത്രം പ്രദർശിപ്പിക്കുന്നത്. ഇപ്പോൾ തരംഗമായി മാറുന്ന വീഡിയോയും ഡിസ്നി പ്ലസ് ഹോട്ട് സ്റ്റാർ മലയാളത്തിന്റെ യൂട്യൂബ് ചാനലിലൂടെയാണ് പുറത്തുവിട്ടിട്ടുള്ളത്.

സംവിധായകൻ ഷകുൻ ബത്രയുടെ സംവിധാന മികവിൽ ഒരുങ്ങുന്ന ബോളിവുഡ് ചിത്രമാണ് ഗെഹ്റയാൻ. ചിത്രത്തിൽ ദീപിക പദുകോൺ, സിദ്ദന്റ് ചതുർവേദി, അനന്യ പാണ്ഡെ, ധൈര്യ കർവ എന്നിവരാണ് കേന്ദ്ര കഥാപാത്രങ്ങളായി എത്തുന്നത്. ഒരു റൊമാന്റിക് ഡ്രാമ ചിത്രമായ ഗെഹ്റയാൻ ഇന്നത്തെ തലമുറയിലെ സങ്കീർണത നിറഞ്ഞ ബന്ധങ്ങളാണ് വെളിപെടുത്തുന്നത്.

ചിത്രത്തിൽ അനന്യ പാണ്ഡെ വിവാഹം കഴിക്കാൻ പോകുന്ന വ്യക്തിയാണ് സിദ്ദന്റ് ചതുർവേദി . എന്നാൽ ദീപിക അവതരിപ്പിക്കുന്ന അലിഷ എന്ന കഥാപാത്രവും സിദ്ദന്റിന്റെ സെയ്ൻ എന്ന കഥാപാത്രവും പരസ്പരം പ്രണയത്തിലാകുന്നു. ഇവർ നാലു പേർക്കും ഇടയിലൂടെ കടന്നു പോകുന്ന ശിഥിലമായ ബന്ധങ്ങളിലേക്കാണ് ഈ ചിത്രം വിരൽ ചൂണ്ടുന്നത്.

സുമിത് റോയ്, ആയിഷ ദേവിത്രേ, യാഷ് സഹായി എന്നിവർ ചേർന്നാണ് ചിത്രത്തിന്റെ തിരക്കഥ രചിച്ചിട്ടുള്ളത്. ഈ ചിത്രം നിർമ്മിക്കുന്നത് ധർമ്മ പ്രൊഡക്ഷൻസും വിയാകോം 18 സ്റ്റുഡിയോസും ജൗസ്കഫിലിംസും ചേർന്നാണ്. കൗശൽ ഷായാണ് ചിത്രത്തിന്റെ ഛായഗ്രഹണം. കബീർ കത്പാലിയ , സവേര മേത്ത എന്നിവരാണ് ചിത്രത്തിന് സംഗീതം നൽകിയിട്ടുള്ളത്. ഫെബ്രുവരി പതിനൊന്നിന് ആമസോൺ പ്രൈമിലൂടെയാണ് ചിത്രം റിലീസ് ചെയ്യുന്നത്. റീലീസ് ചെയ്ത മണിക്കൂറുകൾ പിന്നിടുമ്പോഴേക്കും ലക്ഷക്കണക്കിന് കാഴ്ച്ചക്കാരെയാണ് ഈ ട്രൈലർ സ്വന്തമാക്കിയത്.