Movie Updates

മലയാള സിനിമ രംഗത്ത് ഇപ്പോൾ ത്രില്ലർ ചിത്രങ്ങളുടെ കാലമാണ്. എത്തുന്ന ഓരോ ചിത്രവും ഒന്നിനൊന്ന് മികച്ചതുമാണ് . പുതിയൊരു ത്രില്ലർ ചിത്രം കൂടി പ്രേക്ഷകർക്കായി ഒരുങ്ങി കൊണ്ടിരിക്കുന്നു. എസ് . ജെ സിനുവിന്റെ സംവിധാനത്തിൽ ഒരുങ്ങുന്ന പുത്തൻ ചിത്രമാണ് തേര് . ഒരു ഫാമിലി ആക്ഷൻ ത്രില്ലർ ചിത്രമായി ഒരുക്കിയ തേരിന്റെ ഒഫീഷ്യൽ ടീസർ ഈ അടുത്താണ് പുറത്തുവിട്ടത്. അമിത് ചക്കാലക്കൽ ആണ് ചിത്രത്തിൽ നായകനായി എത്തുന്നത്. ജിബൂട്ടി എന്ന ചിത്രത്തിന് ശേഷം ഇരുവരും ഒന്നിക്കുന്ന ചിത്രമാണ് തേര്.

അമിത്തിനൊപ്പം ചിത്രത്തിൽ ബാബുരാജ്, വിജയരാഘവൻ , കലാഭവൻ ഷാജോൺ , അസീസ്, സഞ്ജു ശിവറാം , പ്രശാന്ത് അലക്സാണ്ടർ , വീണ നായർ ,പ്രമോദ് വെളിയനാട്, നിൽജാ , സുരേഷ് ബാബു ,ശ്രീജിത്ത് രവി എന്നിവരും പ്രധാന വേഷങ്ങളിൽ എത്തുന്നുണ്ട്. ജോബി പി സാം നിർമ്മിക്കുന്ന ഈ ചിത്രം ബ്ലൂ ഹിൽ നെയ്ൽ കമ്മ്യൂണിക്കേഷന്റെ ബാനറിൽ ആണ് ഒരുങ്ങുന്നത്.

ചിത്രത്തിന്റെ തിരക്കഥ, സംഭാഷണം എന്നിവ ഒരുക്കിയിരിക്കുന്നത് ഡിനിൽ പി.കെ ആണ്. ടി.ഡി ശ്രീനിവാസ് ആണ് ഛായഗ്രഹണം നിർവഹിച്ചിരിക്കുന്നത്. വിക്കി മാസ്റ്റർ, ദിനേശ് കാശി എന്നിവരാണ് ചിത്രത്തിലെ ആക്ഷൻ രംഗങ്ങൾ ഒരുക്കിയിരിക്കുന്നത് . ട്രൈലർ കണ്ട് ആവേശത്തിലായിരിക്കുകയാണ് പ്രേക്ഷകർ . സൂപ്പർ എന്നാണ് പ്രേഷകർ വീഡിയോയ്ക്ക് താഴെ കമന്റ് നൽകിയിരിക്കുന്നത് .

ഷാഹദ് സംവിധാനം ചെയ്യുന്ന ഏറ്റവും പുതിയ ചിത്രമാണ് പ്രകാശൻ പരക്കട്ടെ . ഒരു കുടുംബ ചിത്രമായി ഒരുക്കുന്ന ഈ ചിത്രത്തിലെ ഒരു ഗാനം ഇപ്പോൾ പുറത്തുവിട്ടിരിക്കുകയാണ് . കണ്ണു കൊണ്ട് നുള്ളി എന്ന വരികളോടെ ആരംഭിക്കുന്ന ഒരു ഗാനമാണ് മാജിക് ഫ്രെയിംസ് മ്യൂസിക് എന്ന യൂട്യൂബ് ചാനലിലൂടെ പുറത്തുവിട്ടിരിക്കുന്നത്.

സ്കൂൾ പ്രണയ രംഗങ്ങളും തമാശകളും നിറഞ്ഞ ഈ ഗാനത്തിൽ തണ്ണീർ മത്തൻ ദിനങ്ങൾ എന്ന ചിത്രത്തിലൂടെ ശ്രദ്ധ നേടിയ മാത്യു തോമസ് , പറവ എന്ന ചിത്രത്തിലൂടെ ശ്രദ്ധിക്കപ്പെട്ട ഗോവിന്ദ് പൈ പുതുമുഖ താരം മാളവിക മനോജ് എന്നിവരാണ് അഭിനയിച്ചിരിക്കുന്നത് . മനു മഞ്ജിത്ത് വരികൾ രചിച്ച ഈ ഗാനം ആലപിച്ചിരിക്കുന്നത് ജാസി ഗിഫ്റ്റ് ആണ് . ഈ ഗാനത്തിന് ഈണം നൽകിയിരിക്കുന്നത് ഷാൻ റഹ്മാൻ ആണ്.

മാത്യു തോമസ് ആണ് ചിത്രത്തിലെ കേന്ദ്രകഥാപാത്രത്തെ അവതരിപ്പിക്കുന്നത്. മാത്യുവിന്റെ സുഹൃത്തായി ഗോവിന്ദും പ്രണയിനിയായി മാളവികയും എത്തുന്നു. ഇവരെ കൂടാതെ അജു വർഗ്ഗീസ്, ധ്യാൻ ശ്രീനിവാസൻ , ദിലീഷ് പോത്തൻ, സൈജു കുറുപ്പ്, നിഷ സാരംഗ്, ശ്രീജിത്ത് രവി , ഋതുഞ്ജയ് ശ്രീജിത്ത് എന്നിവരും പ്രധാന വേഷങ്ങളിൽ എത്തുന്നു. ധ്യാൻ ശ്രീനിവാസൻ തിരക്കഥയും സംഭാഷണവും തയ്യാറാക്കിയ ഈ ചിത്രം നിർമ്മിക്കുന്നത് വൈശാഖ് സുബ്രഹ്മണ്യം , ടിനു തോമസ്, അജു വർഗീസ് എന്നിവർ ചേർന്നാണ്. എഡിറ്റിംഗ് കൈകാര്യം ചെയ്തിരിക്കുന്നത് രതിൻ രാധാകൃഷ്ണൻ ആണ്. ജൂൺ പതിനേഴിന് ചിത്രം പ്രദർശനത്തിന് എത്തും.

മലയാളത്തിലെ യുവതാരം ടൊവിനോ തോമസിനെ നായകനാക്കി വിനീത് കുമാർ സംവിധാനം ചെയ്യുന്ന ഏറ്റവും പുതിയ ചിത്രമാണ് ഡിയർ ഫ്രണ്ട്.
ഈ ചിത്രത്തിന്റെ ഒഫിഷ്യൽ ട്രൈലർ ഇപ്പോൾ റിലീസ് ചെയ്തിരിക്കുകയാണ്. ഈ ചിത്രം പറയുന്നത് അഞ്ച് സുഹൃത്തുക്കളുടെ കഥയാണ് എന്ന് ട്രൈലറിൽ നിന്നും മനസ്സിലാക്കാം. ഈ അഞ്ച് സുഹൃത്തുക്കളുടെ ഓരോ കാലഘട്ടത്തിലെ ബുദ്ധിമുട്ടുകളും സൗഹൃദവും എല്ലാമാണ് ഈ ചിത്രം തുറന്നുകാട്ടുന്നത്.

ട്രൈലറിൽ ടൊവിനോയ്ക്ക് ഒപ്പം ദർശന രാജേന്ദൻ , ബേസിൽ ജോസഫ് , അർജുൻ ലാൽ എന്നിവരേയും പ്രധാന വേഷങ്ങളിൽ കാണാം. ഹാസ്യവും ആകാംഷയും നിറച്ച ഒരു രസകരമായ ട്രൈലർ തന്നെയാണ് അണിയറ പ്രവർത്തകർ ഇപ്പോൾ പുറത്തുവിട്ടിരിക്കുന്നത് . ഹാപ്പി അവേഴ്സ് എന്റർടൈൻമെന്റ് എന്ന യൂട്യൂബ് ചാനലിലൂടെ ആണ് ഈ ട്രൈലർ പുറത്തുവിട്ടിരിക്കുന്നത്. ആകാംഷയോടെ കാത്തിരിക്കുന്നു എന്നാണ് വീഡിയോയ്ക്ക് താഴെ പ്രേക്ഷകർ നൽകുന്ന കമന്റ് .

ഹാപ്പി അവേഴ്സ് എന്റർടൈൻമെന്റ് , ആഷിഖ് ഉസ്മാൻ പ്രൊഡക്ഷൻസ് എന്നിവയുടെ ബാനറിൽ ഒരുങ്ങുന്ന ഈ ചിത്രം നിർമ്മിക്കുന്നത് സമീർ താഹിർ , ഷൈജു ഖാലിദ്, ആഷിഖ് ഉസ്മാൻ എന്നിവർ ചേർന്നാണ്. ഷർഫു, സുഹാസ് , അർജുൻ ലാൽ എന്നിവർ ചേർന്നാണ് ചിത്രത്തിന്റെ തിരക്കഥ തയ്യാറാക്കിയിരിക്കുന്നത് . ചിത്രത്തിനായി സംഗീതം ഒരുക്കിയിരിക്കുന്നത് ജസ്റ്റിൻ വർഗീസ് ആണ്. എഡിറ്റിംഗ് കൈകാര്യം ചെയ്തിരിക്കുന്നത് ദീപു ജോസഫ് ആണ് . ജൂണ്‍ 10ന് ഈ ചിത്രം തിയറ്ററുകളിൽ പ്രദർശനത്തിന് എത്തും.

ബാലതാരങ്ങളായി എത്തി പ്രേക്ഷക ശ്രദ്ധ നേടിയ മാത്യൂ തോമസ്, നസീലൻ കെ. ഗഫൂർ എന്നിവരെ കേന്ദ്ര കഥാപാത്രങ്ങളാക്കി നവഗതനായ അരുൺ ഡി ജോസ് ഒരുക്കിയ ഏറ്റവും പുതിയ ചിത്രമാണ് ജോ ആൻഡ് ജോ. നടി നിഖില വിമൽ ആണ് ചിത്രത്തിലെ നായിക വേഷം ചെയ്തിരിക്കുന്നത് . മെയ് പതിമൂന്നിന് റീലീസ് ചെയ്ത ഈ ചിത്രം മികച്ച ഒരു കോമഡി എന്റർടൈനറായതു കൊണ്ട് തന്നെ ഇപ്പോഴും തിയറ്ററുകളിൽ ഗംഭീര പ്രദർശനം തുടരുകയാണ്. മികച്ച പ്രതികരണമാണ് പ്രേക്ഷകരിൽ നിന്നും ചിത്രം നേടുന്നത് . കഴിഞ്ഞ ദിവസങ്ങളിൽ ചിത്രത്തിലെ ഒരു ഗാനം പുറത്തിറങ്ങുകയും വളരെയധികം പ്രേക്ഷക ശ്രദ്ധ നേടുകയും ചെയ്തിരുന്നു. അതിനു പിന്നാലെയായി ഇപ്പോഴിതാ ചിത്രത്തിലെ ഒരു സ്നീക്ക് പീക്ക് വീഡിയോ പുറത്തുവിട്ടിരിക്കുകയാണ്.

ഈ സീനിൽ മാത്യൂ തോമസ്, നസീലൻ കെ. ഗഫൂർ , ഗോവിന്ദ് വസന്ത എന്നിവരുടെ മികച്ച അഭിനയ പ്രകടനം തന്നെ കാണാം. ഒട്ടേറെ ആരാധകരാണ് വീഡിയോയ്ക്ക് താഴെ കമന്റുകൾ രേഖപ്പെടുത്തിയിരിക്കുന്നത്. തണ്ണീർ മത്തൻ ദിനങ്ങൾ എന്ന ചിത്രത്തിന് ശേഷം മാത്യൂവിന്റെയും നസീലന്റെയും കിടിലൻ കോമഡി രംഗങ്ങൾ കാണാൻ കഴിഞ്ഞത് ഈ ചിത്രത്തിൽ ആണ്.

ഹാരിസ് ദേശം , ആദർശ് നാരായൺ , പി.ബി അനീഷ്, അനുമോദ് ബോസ് എന്നിവർ ചേർന്ന് നിർമ്മിച്ച ഈ ചിത്രം ഇമാജിൻ സിനിമാസ് ആൻഡ് സിഗ്‌നേച്ചർ സ്റ്റുഡിയോസ് ആണ് ഒരു കിയിട്ടുള്ളത്. ചിത്രത്തിന്റെ എഡിറ്റർ ചാമൻ ചാക്കോ ആണ് . സംവിധായകൻ അരുണും രവീഷ് നാഥും ചേർന്നാണ് ചിത്രത്തിന്റെ തിരക്കഥ , സംഭാഷണം എന്നിവ ഒരുക്കിയിരിക്കുന്നത്.

ജോ ജോസഫ് പുതുമുഖങ്ങളെ അണിനിരത്തി ഒരുക്കുന്ന ഏറ്റവും പുതിയ ച്ചിത്രമാണ് ‘ദി പ്രൊപ്പോസല്‍’ . ഈ ചിത്രത്തിന്റെ ട്രെയിലര്‍ ഇപ്പോൾ പ്രേക്ഷക ശ്രദ്ധ നേടുകയാണ്. ചിത്രത്തിന്റെ തിരക്കഥ തയാറാക്കിയിരിക്കുന്നത് സംവിധായകൻ ജോ ജോസഫ് തന്നെയാണ്.

ഈ ചിത്രത്തില്‍ പ്രധാന കഥാപാത്രങ്ങളെ അവതരിപ്പിക്കുന്നത് അമര രാജ, ജോ ജോസഫ്, അനുമോദ് പോള്‍, ക്ലെയര്‍ സാറ മാർട്ടിൻ, സന സുബേദി, അനിൽ ജോർജ് എബ്രഹാം, എമിലി ഹന്ന , സുഹാസ് പാട്ടത്തില്‍, കാര്‍ത്തിക മേനോന്‍ തോമസ് എന്നിവരാണ് . ഒരു കല്യാണ ആലോചനയും തുടർ സംഭവങ്ങളുമാണ് ഈ ചിത്രത്തിൽ എന്നാണ് ട്രൈലർ നൽകുന്ന സൂചന. ” അപ്പോ വിസയ്ക്കാണ് കല്യാണം കഴിക്കുന്നത്; പക്ഷേ ഡവറി ചോദിക്കില്ല ” എന്ന ഡയലോഗ് ആണ് ടൈലറിന്റെ ഹൈലൈറ്റ്.

ചിത്രത്തിന്റെ എഡിറ്റിംഗ് നിര്‍വഹിക്കുന്നത് പ്രിന്‍സ് സാഗറാണ് . ഈ ചിത്രം നിര്‍മിക്കുന്നത് സില്‍വര്‍ ക്ലൗഡ് പിക്‌ചേഴ്‌സാണ് . ഫിവാസ് ബയ്സ് ആണ് ഛായാഗ്രഹണം . സൈന പ്ലേയില്‍ ഒടിടി റിലീസായാണ് ഈ ചിത്രം എത്തുന്നത്. സൈന മൂവീസ് എന്ന യൂടൂബ് ചാനലിലൂടെയാണ് ഈ വീഡിയോ റിലീസ് ചെയ്തിരിക്കുന്നത് . അടിപൊളി , കട്ട വെയറ്റിംഗ് തുടങ്ങി കമന്റുകളാണ് വീഡിയോയ്ക്ക് താഴെ പ്രേക്ഷകർ നൽകിയിരിക്കുന്നത്.

ജൂലൈ 22 ന് നെറ്റ് ഫ്ളിക്സിൽ റിലീസ് തയ്യാറായി നിൽക്കുന്ന ദി ഗ്രേമാൻ എന്ന ഹോളിവുഡ് ചിത്രത്തിന്റെ ഒഫീഷ്യൽ ട്രൈലർ ഇപ്പോൾ പുറത്തിറങ്ങി. കഴിഞ്ഞ ദിവസമാണ് ക്യാരക്ടർ പോസ്റ്റർ റിലീസ് ചെയ്തത്. അവ വളരെയധിക പ്രേക്ഷക ശ്രദ്ധ നേടിയിരുന്നു. അതിന് പിന്നാലെയാണ് ഇപ്പോൾ പ്രേക്ഷകർക്കായി ചിത്രത്തിന്റെ ട്രൈലർ പുറത്തുവിട്ടിട്ടുള്ളത്. നെറ്റ് ഫ്ലിക്സിന്റെ യൂട്യൂബ് ചാനലിലൂടെ പുറത്തുവിട്ട ഈ ട്രൈലർ വീഡിയോ മണിക്കൂറുകൾ പിന്നീടുമ്പോഴേക്കും നിരവധി കാഴ്ചക്കാരെയാണ് സ്വന്തമാക്കിയത്.

റൂസ്സോ ബ്രദേഴ്സ് ഒരുക്കുന്ന ഈ ചിത്രം 2009 ൽ പ്രസിദ്ധീകരിച്ച മാർക്ക് ഗ്രെയ്നിയുടെ ദി ഗ്രേ മാൻ എന്ന നോവലിനെ ആസ്പതമാക്കിയാണ് . സൂപ്പർ ഹീറോ ചിത്രങ്ങളായ അവഞ്ചേഴ്സ്, ക്യാപ്റ്റൻ അമേരിക്ക എന്നിവയുടെ സംവിധായകരാണ് റൂസ്സോ ബ്രദേഴ്സ് .നെറ്റ് ഫ്ലിളിക്സിന്റെ ഏറ്റവും ചിലവേറിയ ചിത്രമാണ് ദി ഗ്രേ മാൻ , 200 ദശലക്ഷം ഡോളർ ബഡ്ജറ്റിൽ ആണ് ഈ ചിത്രം ഒരുക്കിയിരിക്കുന്നത്.

തെന്നിന്ത്യൻ സൂപ്പർ താരം ധനുഷും ഈ ചിത്രത്തിന്റെ ഭാഗമാകുന്നു എന്നതാണ് ഈ ചിത്രത്തിന്റെ ഹൈലൈറ്റ്. റയാൻ ഗോസ്ലിങ്, ക്രിസ് ഇവാൻസ്, അന ഡെ ആർമ്സ് , റെഗെ ജീൻ – പേജ്, ജെസ്സിക്ക ഹെൻവിക്ക് , വാഗ്നർ മൗറ എന്നിവരാണ് ചിത്രത്തിലെ പ്രധാന താരങ്ങൾ . ഇവരുടെ ക്യാരക്ടർ പോസ്റ്ററുകൾ ആയിരുന്നു കഴിഞ്ഞ ദിവസം പുറത്തുവിട്ടത്. ധനുഷ് ആരാധകർ പ്രതിഷേധങ്ങൾ അറിയച്ചതോടെ മൂന്ന് മണിക്കൂറിന് ശേഷം അദ്ദേഹത്തിന്റെ ക്യാരക്ടർ പോസ്റ്ററും റിലീസ് ചെയ്തു. ആക്ഷൻ രംഗങ്ങൾ നിറച്ച ആവേശകരമായ ഒരു ട്രൈലറാണ് ഇപ്പോൾ റിലീസ് ചെയ്തിരിക്കുന്നത്. ട്രൈലറിന്റെ ഒരു രംഗത്തിൽ നടൻ ധനുഷിനേയും കാണാൻ സാധിക്കും. ദി ഗ്രേ മാൻ ധനുഷിന്റെ രണ്ടാമത്തെ അന്താരാഷ്ട്ര ചിത്രമാണ് . ഏതായാലും ധനുഷ് ആരാധകർ ഈ ചിത്രത്തിനായി ആകാംഷയോടെ കാത്തിരിക്കുകയാണ്.

മലയാളി പ്രേക്ഷകരുടെ ഹൃദയം കീഴടക്കിയ സൂപ്പർ ഹിറ്റ് ചിത്രമാണ് ജനുവരി 21 ന് പുറത്തിറങ്ങിയ “ഹൃദയം “. പ്രണവ് മോഹൻലാൽ നായകനായി എത്തിയ ഈ ചിത്രത്തിന്റെ രചനയും സംവിധാനവും നിർവഹിച്ചത് നടൻ വിനീത് ശ്രീനീവാസൻ ആണ്. ഈ ചിത്രത്തിൽ നായികമാരായി എത്തിയത് കല്യാണി പ്രിയദർശൻ , ദർശന രാജേന്ദൻ എന്നിവരായിരുന്നു. ഒരു യുവാവിന്റെ കോളേജ് കാലഘട്ടവും സൗഹൃദവും പ്രണയവും അതു കഴിഞ്ഞുള്ള ജീവിതവും എല്ലാമാണ് ഈ റൊമാന്റിക് ചിത്രം കാണിച്ചു തന്നത്.

പതിനഞ്ചിൽ പരം ഗാനങ്ങൾ ആണ് ഈ ചിത്രത്തിൽ വിനീത് ശ്രീനിവാസൻ ഒരുക്കിയത് . ചിത്രത്തിലെ ” മനസ്സേ മനസ്സേ ” എന്ന ഗാനത്തിന്റെ വീഡിയോ ഇപ്പോൾ പുറത്തുവിട്ടിരിക്കുകയാണ്. ഈ വീഡിയോ ഗാനം റിലീസ് ചെയ്തിരിക്കുന്നത് തിങ്ക് മ്യൂസിക്ക് ഇന്ത്യ എന്ന യൂട്യൂബ് ചാനലിലൂടെ ആണ് . കൈതപ്രം വരികൾ രചിച്ച ഈ ഗാനം ആലപിച്ചിരിക്കുന്നത് വിനീത് ശ്രീനിവാസൻ ആണ്. ഹിഷാം അബ്ദുൾ വഹാബ് ആണ് ചിത്രത്തിലെ ഗാനങ്ങൾ എല്ലാം ഒരുക്കിയിട്ടുള്ളത്. കോളേജിലെ ലാസ്റ്റ് ഡേ ആഘോഷങ്ങളാണ് ഗാനരംഗത്തിൽ കാണാൻ സാധിക്കുന്നത് . പ്രണവ് മോഹൻലാൽ , ദർശന രാജേന്ദൻ ,അരുൺ കുര്യൻ, അശ്വത് ലാൽ എന്നിവരാണ് ഈ ഗാനത്തിൽ അഭിനയിച്ചിരിക്കുന്നത്.

ചിത്രത്തിൽ അശ്വത് ലാൽ , അജു വർഗ്ഗീസ്, അന്നു ആന്റണി, അരുൺ കുര്യൻ, മേഘ തോമസ്, അഭിഷേക്, കലേഷ് രമാനന്ദ്, വിജയ രാഘവൻ , ജോണി ആന്റണി, എന്നിവരും മികച്ച റോളുകളിൽ എത്തിയിട്ടുണ്ട്. മെരിലാൻഡ് സിനിമാസിന്റെ ബാനറിൽ ഒരുങ്ങിയ ഈ ചിത്രം ഈ ചിത്രം നിർമ്മിച്ചത് വൈശാഖ് സുബ്രഹ്മണ്യനാണ് . എഡിറ്റിംഗ് നിർവഹിച്ചത് രഞ്ജൻ എബ്രഹാം ആണ്.

മലയാള സിനിമയിലെ യുവ താരങ്ങളിൽ ശ്രദ്ധേയനായ സിജു വില്‍സണ്‍ നായകനായി എത്തിയ വരയന്‍ എന്ന ചിത്രം മെയ് 20 നാണ് തിയേറ്ററുകളില്‍ പ്രദർശനത്തിന് എത്തിയത്. കുടുംബ പ്രേക്ഷകർ ഏറ്റെടുത്ത ഈ ചിത്രം ഇപ്പോൾ മികച്ച വിജയത്തിലേക്കാണ് മുന്നേറുന്നത്. നവാഗതനായ ജിജോ ജോസഫ് ആണ് ഈ ചിത്രം സംവിധാനം ചെയ്തിരിക്കുന്നത് . ഈ ചിത്രം നമ്മളോട് പറയുന്നത് കലിപ്പക്കര എന്ന ഗുണ്ടകളുടെയും ക്രിമിനലുകളുടെയും കേന്ദ്രമായ സ്ഥലത്തേക്ക് ഒരു കപ്പുച്ചിന്‍ വൈദികന്‍ എത്തുന്നതും അദ്ദേഹം വരുന്നതോടെ പിന്നീട് ആ നാട്ടില്‍ ഉണ്ടാകുന്ന മാറ്റങ്ങളുടെയും കഥയാണ് .

ഈ ചിത്രത്തിന്റെ ഹൈലൈറ്റ് ആയി മാറിയിട്ടുള്ളത് സിജു വിത്സൺ അവതരിപ്പിച്ച നായക കഥാപാത്രമായ എബി കപ്പൂച്ചിൻ എന്ന വൈദികന്റെ അതി ഗംഭീര പ്രകടനമാണ് . സിജു വില്‍സണ്‍ ആദ്യമായി നായകനായി എത്തിയത് ഒമര്‍ ലുലുവിന്റെ സംവിധാനത്തില്‍ പുറത്തിറങ്ങിയ ഹാപ്പി വെഡ്ഡിംഗ് എന്ന ചിത്രത്തിൽ ആണ് . ഈ ചിത്രത്തിൽ സിജു ചെയ്തത് ഒരു കോമഡി നായക കഥാപാത്രത്തെയാണ്. എന്നാൽ ഇപ്പോൾ പുറത്തിറങ്ങിയ വരയനിൽ പക്കാ ഹീറോയിസമാണ് സിജു പ്രേക്ഷകർക്ക് മുന്നിൽ കാഴ്ചവച്ചിരിക്കുന്നത്. പഞ്ച് ഡയലോഗുകളും മാസ്സ് ആക്ഷൻ സീനുകളും നിറഞ്ഞ ഈ ചിത്രത്തിൽ സിജു അതി ഗംഭീര പ്രകടനം തന്നെയാണ് കാഴ്ചവച്ചത് .

എബി കപ്പൂച്ചിൻ എന്ന വൈദികൻ പള്ളിയില്‍ പ്രസംഗിച്ചും വിശ്വാസികളെ ഉപദേശിച്ചും നടക്കുന്ന പതിവ് അച്ചൻമാരിൽ നിന്നും ഏറെ വ്യത്യസ്തനാണ്. ഒരു കോമഡി താരം ആകാൻ മാത്രമല്ല ഒരു പക്കാ മാസ് ഹീറോയാകാനും തനിക്ക് സാധിക്കുമെന്ന് വരയനിലൂടെ സിജു വില്‍സണ്‍ എന്ന നടൻ തെളിയിച്ചു. ഈ ചിത്രത്തിന്റെ അത്യുജ്ജ്വല വിജയത്തിലൂടെ സിജു വിൽസൺ എന്ന നായക നടന്റെ താരമൂല്യവും ഉയർന്നു കഴിഞ്ഞു. ഡാനി കപ്പുചിൻ ആണ് ഈ ചിത്രത്തിന്റെ തിരക്കഥയും സംഭാഷണങ്ങളും ഒരുക്കിയിരിക്കുന്നത് .

സത്യം സിനിമാസിന്റെ ബാനറിൽ ഒരിങ്ങിയ ഈ ചിത്രം നിർമ്മിച്ചിരിക്കുന്നത് പ്രേമചന്ദ്രൻ എ.ജിയാണ്. സിജുവിനെ കൂടാതെ മണിയൻപിള്ള രാജു,ജോയ് മാത്യു, വിജയരാഘവൻ ,അരിസ്റ്റോ സുരേഷ്, ജൂഡ് ആന്തണി ജോസഫ് എന്നിവരും ഈ ചിത്രത്തിൽ പ്രധാന വേഷങ്ങളിൽ എത്തുന്നു. ലിയോണ ലിഷോയ് ആണ് ഈ ചിത്രത്തിലെ നായികാ വേഷം ചെയ്തിരിക്കുന്നത്.

അനൂപ് ബന്ദ്രി സംവിധാനം ചെയ്യുന്ന ഏറ്റവും പുതിയ കന്നഡ ചിത്രമാണ് വിക്രാന്ത് റോണ. ഈച്ച എന്ന ചിത്രത്തിലൂടെ വില്ലൻ വേഷത്തെ അവതരിപ്പിച്ച് മലയാളി പ്രേക്ഷകർക്ക് സുപരിചിതനായ കിച്ച സുധീപ് ആണ് ചിത്രത്തിലെ നായകൻ. ഈ ചിത്രത്തിലെ ആദ്യ ഗാനം ഇപ്പോൾ റിലീസ് ചെയ്തിരിക്കുകയാണ് .

രാരാരാക്കമ്മാ എന്ന വരികളോടെ ആരംഭിക്കുന്ന ഈ ഗാനത്തിന്റെ ലെറിക്കൽ വീഡിയോ ആണ് ഇപ്പോൾ റിലീസ് ചെയ്തിരിക്കുന്നത് . ലെറിക്കൽ വീഡിയോ ആണെങ്കിൽ പോലും ഗാനത്തിന്റെ ചില രംഗങ്ങൾ ഉൾപ്പെടുത്തിയാണ് ഈ വീഡിയോ എത്തിയിരിക്കുന്നത് . സുധീപിനൊപ്പം നടി ജാക്വിലിൻ ഫെർനാൻഡസും ഗാന രംഗത്തിൽ എത്തുന്നുണ്ട് . ആരാധകരെ ത്രസിപ്പിക്കുന്ന നൃത്തവുമായി ഹോട്ട് ലുക്കിലാണ് ജാക്വിലിൻ എത്തിയിട്ടുള്ളത്. അനൂപ് ബന്ദാരി തന്നെ വരികൾ രചിച്ച ഈ ഗാനം ആലപിച്ചിരിക്കുന്നത് നകാഷ് അസിസ്, സുനിധി ചൗഹാൻ എന്നിവർ ചേർന്നാണ്. ബി. അജനീഷ് ലോക്‌നാഥ് ആണ് ഈ ഗാനം ഒരുക്കിയിട്ടുള്ളത്.

ഒരു സാഹസിക ഫാന്റസി ചിത്രമായ വിക്രാന്ത് റോണ , ത്രീഡി ഫോർമാറ്റിൽ ജൂലൈ 28 ന് ആഗോള റിലീസ് ആയി എത്തും. കിച്ച സുധീപ് , നിരൂപ് ഭണ്ഡാരി, നീത അശോക്, ജാക്വിലിൻ ഫെർനാൻഡസ് എന്നിവരാണ് ചിത്രത്തിലെ പ്രധാന കഥാപാത്രങ്ങൾ . ജാക്ക് മഞ്ജുനാഥ്, ശാലിനി മഞ്ജുനാഥ് എന്നിവർ ചേർന്നാണ് ഈ ചിത്രം നിർമ്മിക്കുന്നത്.

രാജീവ് രവി സംവിധാനം ചെയ്ത് ആസിഫ് അലി , സണ്ണി വെയ്ൻ, ഷറഫുദീൻ എന്നിവർ പ്രധാന വേഷങ്ങളിൽ എത്തുന്ന ഏറ്റവും പുതിയ ചിത്രമാണ് കുറ്റവും ശിക്ഷയും. മെയ് 27 ന് തിയറ്ററുകളിൽ റിലീസിന് എത്താൻ ഒരുങ്ങുന്ന ഈ ചിത്രത്തിന്റെ ഒഫീഷ്യൽ ട്രൈയ്ലർ ഇപ്പോൾ റിലീസ് ചെയ്തിരിക്കുകയാണ്. വൺ ടു ത്രീ മ്യൂസിക്സ് എന്ന യൂടൂബ് ചാനലിലൂടെയാണ് ഈ വീഡിയോ പുറത്തു വിട്ടിരിക്കുന്നത് .

ഒരു ഇൻവസ്റ്റിഗേഷൻ ത്രില്ലർ ചിത്രമാണ് കുറ്റവും ശിക്ഷയും എന്നത് ട്രൈലറിൻ നിന്ന് വ്യക്തമാണ്. ആസിഫ് അലി , സണ്ണി വെയ്ൻ, ഷറഫുദീൻ എന്നീ കേന്ദ്ര കഥാപാത്രങ്ങളെ കൂടാതെ അലൻസിയർ ലോപ്പസ്, സെന്തിൽ കൃഷ്ണ, ദിനേഷ് പ്രധാൻ , ശ്രിദ്ധ തുടങ്ങയവരും പ്രധാന വേഷങ്ങളിൽ എത്തുണ്ട്.

ചിത്രത്തിന്റെ രചന നിർവ്വഹിച്ചിരിക്കുന്നത് സിബി തോമസ്, ശ്രീജിത്ത് ദിവാകരൻ എന്നിവർ ചേർന്നാണ്. ചിത്രത്തിന്റെ ഛായഗ്രഹണം കൈകാര്യം ചെയ്തിരിക്കുന്നത് സുരേഷ് രാജൻ ആണ്. ഈ ചിത്രം നിർമ്മിക്കുന്നത് അരുൺ കുമാർ വി.ആർ ആണ്. എഡിറ്റിംഗ് നിർവഹിച്ചിരിക്കുന്നത് അജിത് കുമാർ ആണ്. റിലീസ് ചെയ്ത് മണിക്കൂറുകൾ പിന്നിടുമ്പോഴേക്കും നിരവധി കാഴ്ചക്കാരെയാണ് ഈ വീഡിയോ സ്വന്തമാക്കിയത് . ഒരു പാട് പ്രതീക്ഷ നൽകുന്ന ചിത്രം എന്നാണ് വീഡിയോയ്ക്ക് താഴെ പ്രേക്ഷകർ കമന്റ് ചെയ്തിരിക്കുന്നത്.